ಮಡಿಕೇರಿ, ಮಾ. ೬: ಕೊಡಗು ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಯಲ್ಲಿ ಕಿವಿ, ಮೂಗು ಮತ್ತು ಗಂಟಲು ವಿಭಾಗದಿಂದ ಇತ್ತೀಚೆಗೆ ವಿಶ್ವ ಶ್ರವಣ ದಿನವನ್ನು ಆಚರಿಸಲಾಯಿತು. ಕಿವಿ, ಮೂಗು ಮತ್ತು ಗಂಟಲು ವಿಭಾಗದಿಂದ ‘ಕೊಡಗು ಸುರಕ್ಷಿತವಾಗಿ ಆಲಿಸಿರಿ’ ಎಂಬ ಅಭಿಯಾನಕ್ಕೆ ಚಾಲನೆ ದೊರೆಯಿತು.

ಕೊಡಗು ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆ, ಬೋಧಕ ಆಸ್ಪತ್ರೆ, ಮಡಿಕೇರಿಯ ಉಪನ್ಯಾಸ ಸಭಾಂಗಣದಲ್ಲಿ ಕೊಡಗು ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಯ ಡೀನ್ ಹಾಗೂ ನಿರ್ದೇಶಕ ಡಾ. ಕೆ.ಬಿ. ಕಾರ್ಯಪ್ಪ ಅಧ್ಯಕ್ಷತೆ ವಹಿಸಿದ್ದರು. ಜಿಲ್ಲಾ ಶಸ್ತçಚಿಕಿತ್ಸಕರು ಮತ್ತು ಪ್ರಾಂಶುಪಾಲ ಡಾ. ವಿಶಾಲ್ ಕುಮಾರ್, ಕಿವಿ, ಮೂಗು ಮತ್ತು ಗಂಟಲು ವಿಭಾಗದ ಮುಖ್ಯಸ್ಥೆ ಡಾ. ಶ್ವೇತಾ ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.

ಡಾ. ಕೆ.ಬಿ. ಕಾರ್ಯಪ್ಪ ಅವರು ಮಾತನಾಡಿ ವಿಶ್ವ ಆರೋಗ್ಯ ಸಂಸ್ಥೆಯ ೨೦೨೨ರ ಧ್ಯೇಯವಾಕ್ಯದ ಬಗ್ಗೆ ಒತ್ತು ನೀಡುತ್ತಾ ಹೆಚ್ಚು ಕಾಲ ಹೆಡ್‌ಪೋನ್ ಗಳನ್ನು ಉಪಯೋಗಿಸಬಾರದು ಎಂದು ತಿಳಿಸಿದರು. ‘ಕೊಡಗು ಸುರಕ್ಷಿತವಾಗಿ ಆಲಿಸಿರಿ’ ಆಭಿಯಾನವು ತಮ್ಮ ಕಿವಿಗಳನ್ನು ಹೇಗೆ ರಕ್ಷಿಸಿ ಕೊಳ್ಳುವುದು ಹಾಗೂ ಆಲಿಸುವುದರ ಕುರಿತು ಸಾರ್ವಜನಿ ಕರಲ್ಲಿ ಜಾಗೃತಿ ಮೂಡಿಸುವ ಗುರಿ ಹೊಂದಿದೆ ಎಂದರು.

ಕೋವಿಡ್ ಸಾಂಕ್ರಾಮಿಕ ರೋಗವು ಪ್ರತಿಯೊಬ್ಬರ ಜೀವನದಲ್ಲಿ ಹಲವಾರು ಬದಲಾವಣೆ ತಂದಿದೆ. ಅಂತಹ ಒಂದು ಬದಲಾವಣೆಯೆಂದರೆ ವೈಯಕ್ತಿಕವಾಗಿ ಆಲಿಸುವ ಸಾಧನಗಳಾದ ಇಯರ್ ಪೋನ್‌ಗಳು, ಹೆಡ್‌ಪೋನ್‌ಗಳನ್ನು ಬಳಸುವುದು. ಇದರ ನಿರಂತರ ಬಳಕೆ ಮಾಡುವುದರಿಂದ ಶೇ.೬೦ ಕ್ಕಿಂತ ಹೆಚ್ಚಿನ ಪ್ರಮಾಣದಲ್ಲಿ ಆಲಿಸಿದರೆ ಶ್ರವಣ ನಷ್ಟವಾಗುತ್ತದೆ ಎಂದು ಡಾ.ಕಾರ್ಯಪ್ಪ ಅವರು ತಿಳಿಸಿದರು.

ಶಾಲಾ ಮಕ್ಕಳು, ಕಾಲೇಜು ವಿದ್ಯಾರ್ಥಿಗಳು ಯುವ ವಯಸ್ಕರು ಇಯರ್ ಫೋನ್‌ಗಳು, ಹೆಡ್‌ಫೋನ್‌ಗಳನ್ನು ಹೆಚ್ಚಾಗಿ ಬಳಸಿ, ಜೋರಾದ ಧ್ವನಿಯಲ್ಲಿ ಕೇಳುವುದರಿಂದ ಕಿವಿಗೆ ಹಾನಿ ಉಂಟಾಗುತ್ತದೆ. ಇದರ ಅರಿವು ಮೂಡಿಸುವ ಸಲುವಾಗಿ ಕೊಡಗು ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಯ ವತಿಯಿಂದ ‘ಕೊಡಗು ಸುರಕ್ಷಿತವಾಗಿ ಆಲಿಸಿರಿ’ ಎಂಬ ಅಭಿಯಾನ ಪ್ರಾರಂಭಿಸಲಾಯಿತು. ಇದರಲ್ಲಿ ಕೈ ಜೋಡಿಸಿ ಕೊಡಗಿನ ಸಾರ್ವಜನಿಕರು ಈ ಅಭಿಯಾನದ ಉಪಯೋಗ ಅರಿತು ಇದನ್ನು ಯಶಸ್ವಿಗೊಳಿಸುವಂತೆ ಕೋರಿದರು.

ಪ್ರಾಂಶುಪಾಲರು ಹಾಗೂ ಜಿಲ್ಲಾ ಶಸ್ತçಚಿಕಿತ್ಸಕ ಡಾ. ವಿಶಾಲ್ ಕುಮಾರ್ ಅವರು ವಿದ್ಯಾರ್ಥಿಗಳು ಹೆಚ್ಚಾಗಿ ಹೆಡ್‌ಪೋನ್ ಉಪಯೋಗಿಸುವುದನ್ನು ಕಂಡಿದ್ದು, ಈ ರೀತಿ ಉಪಯೋಗಿ ಸುವುದರಿಂದ ಕೇಳುವಿಕೆಯಲ್ಲಿ ತೊಂದರೆ ಉಂಟಾಗಬಹುದೆAದು ತಿಳಿಸಿರುತ್ತಾರೆ. ಕಿವಿ, ಮೂಗು ಮತ್ತು ಗಂಟಲು ವಿಭಾಗದ ಮುಖ್ಯಸ್ಥೆ ಡಾ. ಶ್ವೇತಾ ಅವರು ಮಾತನಾಡಿ, ಕಿವಿ ಕೇಳುವಿಕೆಯಲ್ಲಿ ತೊಂದರೆಗೆ ಹಲವಾರು ಕಾರಣಗಳನ್ನು ವಿವರಿಸಿ, ಅದರಲ್ಲಿ ಅತಿಯಾದ ಶಬ್ಧದಿಂದ ಉಂಟಾಗುವ ಕಿವುಡುತನವು ಒಂದಾಗಿದೆ ಎಂದರು.

ಅಖಿಲ ಭಾರತ ವಾಕ್ ಶ್ರವಣ ಸಂಸ್ಥೆ ಬಾಹ್ಯ ಸೇವಾ ಕೇಂದ್ರದ ಅಡಿಯೋಲಾಜಿಸ್ಟ್ ಆದ ಜಿಜಿನು ಅವರು ಮಾತನಾಡಿ ಕಿವಿಯ ರಕ್ಷಣೆಯ ಕುರಿತು ಆರೋಗ್ಯ ಕಾರ್ಯ ಕರ್ತರಿಗೆ ಮಾಹಿತಿ ನೀಡಿದರು.

ಸಂಗೀತ ಆಲಿಸುವ ಪ್ರಮಾಣದಲ್ಲಿ ಶೇ. ೬೦ ಕ್ಕಿಂತ ಹೆಚ್ಚಾಗಿ ಯಾವುದೇ ಕಾರಣಕ್ಕೂ ನಮ್ಮ ಪೋನ್‌ಗಳಲ್ಲಿ ಆಲಿಸಬಾರದು ಹಾಗೂ ೬೦ ನಿಮಿಷಕ್ಕಿಂತ ಹೆಚ್ಚಾಗಿ ಸತತವಾಗಿ ಕೇಳಬಾರದು ಎಂದು ತಿಳಿಸಿದರು. ಈ ಕಾರ್ಯಕ್ರಮವನ್ನು ಪಂಚಮ್ ಪೊನ್ನಣ್ಣ ಅವರು ನಡೆಸಿಕೊಟ್ಟರು. ಡಾ. ಪ್ರೇರಣ ಪ್ರಾರ್ಥನೆ ಸಲ್ಲಿಸಿದರು, ಡಾ. ಲಾವಣ್ಯ ಸ್ವಾಗತಿಸಿದರು. ಡಾ. ನಳಿನಿ ವಂದಿಸಿದರು.