ಸೋಮವಾರಪೇಟೆ, ಮಾ. 31: ಕಳೆದ ತಾ. 20ರಂದು ಮಂಗಳೂರಿನಿಂದ ಸೋಮವಾರಪೇಟೆಗೆ ಆಗಮಿಸಿದ್ದ ವ್ಯಕ್ತಿಯೋರ್ವರು ಮನೆಯೊಳಗಿನ ಶೌಚಗೃಹದಲ್ಲಿ ಆಯತಪ್ಪಿ ಕೆಳಬಿದ್ದು ಸ್ಥಳದಲ್ಲೇ ಸಾವನ್ನಪ್ಪಿರುವ ಘಟನೆ ತಾಲೂಕಿನ ಗಣಗೂರು ಗ್ರಾ.ಪಂ. ವ್ಯಾಪ್ತಿಯ ಉಂಜಿಗನಹಳ್ಳಿಯಲ್ಲಿ ನಡೆದಿದ್ದು, ವ್ಯಕ್ತಿಗೆ ಕೊರೊನಾ ಸೋಂಕು ತಗುಲಿರುವ ಸಂಶಯದಿಂದ ಸ್ಥಳೀಯರು ತಕ್ಷಣ ಸಹಾಯಕ್ಕೆ ಧಾವಿಸದೇ ಭಯಾತಂಕಕ್ಕೆ ಒಳಗಾದ ಬಗ್ಗೆ ವರದಿಯಾಗಿದೆ.ಉಂಜಿಗನಹಳ್ಳಿ ಗ್ರಾಮ ನಿವಾಸಿ ದಿ. ಕೆ.ಎಂ. ಸೋಮಯ್ಯ ಮತ್ತು ಕೆ.ಎಸ್. ಪೊನ್ನಮ್ಮ ಅವರ ಪುತ್ರ ರೋಷನ್ (41) ಎಂಬವರೇ ಆಕಸ್ಮಿಕ ಅವಘಡದಿಂದ ಮೃತಪಟ್ಟವರು. ರೋಷನ್ ಅವರು ಮಂಗಳೂರಿನಲ್ಲಿ ಫ್ರೀಲ್ಯಾನ್ಸ್ ಟ್ರೈನರ್ ಆಗಿ ಕೆಲಸ ಮಾಡಿಕೊಂಡಿದ್ದು, ಕಳೆದ ತಾ. 20ರಂದು ಬೈಕ್‍ನಲ್ಲಿ ಮಡಿಕೇರಿ, ಕುಶಾಲನಗರ ಮಾರ್ಗವಾಗಿ ಉಂಜಿಗನಹಳ್ಳಿಯ ಮನೆಗೆ ಬಂದಿದ್ದರು.ಇದಾದ ಎರಡು ದಿನದಲ್ಲೇ ಜನತಾ ಕಫ್ರ್ಯೂ ಘೋಷಣೆಯಾಗಿ, ನಂತರ ಲಾಕ್‍ಡೌನ್ ಆಗಿದ್ದರಿಂದ ಮರಳಿ ಮಂಗಳೂರಿಗೆ ತೆರಳದೇ ಮನೆಯಲ್ಲೇ ಉಳಿದಿದ್ದರು. ಮಂಗಳೂರಿನಿಂದ ಬರುವಾಗ ವಯಸ್ಸಾದ ತಾಯಿಯ ಆರೋಗ್ಯ ಸುಧಾರಣೆಗಾಗಿ ಹೋಮಿಯೋಪತಿ ಔಷಧಿ ತಂದಿದ್ದು, ಮನೆಯಲ್ಲಿದ್ದ ಸಂದರ್ಭ ತಾವೂ ಸಹ ಔಷಧಿಯನ್ನು ಸೇವಿಸುತ್ತಿದ್ದರು ಎನ್ನಲಾಗಿದೆ.(ಮೊದಲ ಪುಟದಿಂದ) ನಿನ್ನೆ ಮಧ್ಯಾಹ್ನ ಖರ್ಜೂರವನ್ನು ನೆನೆಸಿದ ನೀರನ್ನು ಕುಡಿದು ಶೌಚಗೃಹಕ್ಕೆ ತೆರಳಿದ ಸಂದರ್ಭ ಆಯತಪ್ಪಿ ಕೆಳಬಿದ್ದಿದ್ದು, ತಲೆ, ಹಣೆಯ ಭಾಗ ನೆಲಕ್ಕೆ ಬಡಿದಿದೆ.

ಇದಾದ ಕೆಲಹೊತ್ತಿನ ನಂತರ ಮಗ ವಾಪಸ್ ಬಾರದ ಹಿನ್ನೆಲೆ ತಾಯಿ ಪೊನ್ನಮ್ಮ ಅವರು ಶೌಚಗೃಹದ ಬಾಗಿಲು ತೆರೆದು ನೋಡುವಾಗ ಪುತ್ರ ರೋಷನ್ ಮಕಾಡೆ ಬಿದ್ದಿರುವದು ಕಂಡುಬಂದಿದೆ. ಈ ಸಂದರ್ಭ ಗಾಬರಿಗೊಂಡು ಸಹಾಯಕ್ಕಾಗಿ ಅಕ್ಕಪಕ್ಕದವರನ್ನು ಕರೆದರೂ ಯಾರೂ ಕೂಡ ಮನೆಯೊಳಗೆ ಸಹಾಯಕ್ಕೆ ಆಗಮಿಸಿಲ್ಲ ಎನ್ನಲಾಗಿದೆ.

ಕೊರೊನಾ ಆತಂಕ ವ್ಯಕ್ತವಾದ ಸಮಯದಲ್ಲೇ ರೋಷನ್ ಅವರು ಮಂಗಳೂರಿನಿಂದ ಆಗಮಿಸಿದ್ದು, ಇದರೊಂದಿಗೆ ಹೋಮಿಯೋಪತಿ ಔಷಧಿ ಸೇವಿಸುತ್ತಿದ್ದುದನ್ನೇ ಕೊರೊನಾಕ್ಕೆ ಔಷಧಿ ತೆಗೆದುಕೊಳ್ಳುತ್ತಿದ್ದಾರೆ ಎಂಬ ಸಂಶಯದಿಂದ ಸ್ಥಳೀಯರು ತಕ್ಷಣ ಸಹಾಯಕ್ಕೆ ಆಗಮಿಸಲಿಲ್ಲ ಎನ್ನಲಾಗಿದ್ದು, ರಾತ್ರಿ 8.30ರ ಸುಮಾರಿಗೆ ಆಂಬ್ಯುಲೆನ್ಸ್ ಮೂಲಕ ಮೃತದೇಹವನ್ನು ಸೋಮವಾರಪೇಟೆಯ ಶವಾಗಾರಕ್ಕೆ ಸಾಗಿಸಲಾಯಿತು.

ಇಂದು ಬೆಳಿಗ್ಗೆ ಮಡಿಕೇರಿಯಿಂದ ಆಗಮಿಸಿದ ವಿಧಿ ವಿಜ್ಞಾನ ಪ್ರಯೋಗಾಲಯದ ವೈದ್ಯ ಯೋಗೇಶ್ ಅವರು ಮರಣೋತ್ತರ ಪರೀಕ್ಷೆ ನಡೆಸಿದ ನಂತರ ಮೃತದೇಹವನ್ನು ವಾರಸುದಾರರಿಗೆ ಒಪ್ಪಿಸಲಾಯಿತು. ಮಧ್ಯಾಹ್ನ 3 ಗಂಟೆಗೆ ಸ್ವಗ್ರಾಮದಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಯಿತು.

ತಲೆಭಾಗಕ್ಕೆ ಗಂಭೀರ ಪ್ರಮಾಣದ ಪೆಟ್ಟಾಗಿ ತಲೆಯೊಳಗೆ ರಕ್ತ ಹೆಪ್ಪುಗಟ್ಟಿರುವದರಿಂದ ಸಾವು ಸಂಭವಿಸಿದೆ ಎಂದು ಮೇಲ್ನೋಟಕ್ಕೆ ತಿಳಿದುಬಂದಿದ್ದು, ಹೆಚ್ಚಿನ ವರದಿಗಾಗಿ ದೇಹದ ಒಳಗಿನ ಅಂಗಾಂಶಗಳನ್ನು ಮೈಸೂರಿನ ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸಲಾಗುವದು ಎಂದು ಪೊಲೀಸ್ ಪೇದೆ ಶಿವಕುಮಾರ್ ತಿಳಿಸಿದ್ದಾರೆ.