ಮಡಿಕೇರಿ, ಮಾ. 31: ದೇಶದಲ್ಲಿ ಯಾರಾದರೂ ಅತ್ಯುತ್ತಮ ರೀತಿಯಲ್ಲಿ ಸಾಧನೆ ಮಾಡಿದಲ್ಲಿ, ವೃತ್ತಿಪರತೆಯನ್ನು ಎತ್ತಿ ಹಿಡಿದಲ್ಲಿ ಅಂತಹ ಮೇರು ವ್ಯಕ್ತಿತ್ವದ ಸಾಧಕರನ್ನು ಜನತೆ ಯಾವದೇ ಸಂದರ್ಭದಲ್ಲೂ ಸ್ಮರಿಸಿಕೊಳ್ಳುತ್ತಾರೆ, ಗೌರವಿಸುತ್ತಾರೆ ಎಂಬದಕ್ಕೆ ವೀರ ಸೇನಾನಿ, ಕೊಡಗಿನ ಪದ್ಮಭೂಷಣ ಜನರಲ್ ಕೆ.ಎಸ್. ತಿಮ್ಮಯ್ಯ ಅವರು ಸಾಕ್ಷಿಯಾದರು.ತಿಮ್ಮಯ್ಯ ಅವರ 114ನೇ ಜನ್ಮದಿನ ಇಂದಾಗಿತ್ತು. ಆದರೆ ಪ್ರಸ್ತುತ ಕೊರೊನಾದ ಕಾರಣದಿಂದಾಗಿ ದೇಶವೇ ಸಂಕಷ್ಟದಲ್ಲಿದ್ದು; ಲಾಕ್‍ಡೌನ್ ಆಗಿದೆ. ಆದರೂ ಅವರು ಈ ಹಿಂದೆ ದೇಶಕ್ಕಾಗಿ ಮಾಡಿರುವ ಸೇವೆ - ಸಾಧನೆಗಳನ್ನು ಜನತೆ ಸಂಕಷ್ಟದ ನಡುವೆಯೂ ಸ್ಮರಿಸಿಕೊಂಡು ಗೌರವಿಸಿದ್ದು; ವಿಶೇಷವಾಗಿತ್ತು. ಈ ಬಾರಿ ಜನ್ಮದಿನಾಚರಣೆಯ ಕಾರ್ಯಕ್ರಮ ಸಾರ್ವತ್ರಿಕವಾಗಿ ಬಹಿರಂಗವಾಗಿ ಆಚರಣೆಯಾಗಲಿಲ್ಲ. ಆದರೆ ಫೀ.ಮಾ. ಕಾರ್ಯಪ್ಪ, ಜನರಲ್ ತಿಮ್ಮಯ್ಯ ಫೋರಂನ ಚಿಂತನೆ ಇದರ ಸಂಚಾಲಕ ಮೇಜರ್ ನಂದಾ ಸೇರಿದಂತೆ ಹಲವರ ಪರಿಶ್ರಮದಿಂದಾಗಿ ಇವರ ಜನ್ಮದಿನವನ್ನು ಸಾಮಾಜಿಕ ಜಾಲತಾಣವಾದ ವಾಟ್ಸಾಪ್‍ನ ಮೂಲಕ ಮನೆ - ಮನೆಗಳಿಂದಲೇ ಆಚರಿಸಿ ಸೇನಾನಿಯನ್ನು ಗೌರವಿಸಿ, ಸ್ಮರಿಸಿಕೊಳ್ಳಲಾಯಿತು.ಈ ಕರೆಗೆ ಹಲವಾರು ಮಂದಿ ಸ್ಪಂದಿಸಿದ್ದು ವಿಶೇಷವಾಗಿತ್ತು; ಸೇನಾನಿಯ ಕುರಿತಾಗಿ ರಸಪ್ರಶ್ನೆ, ದೇಶಭಕ್ತಿಗೀತೆಗಳು ಅವರ ಕುರಿತಾಗಿ ಹೊರ ಬಂದಿರುವ ಪುಸ್ತಕಗಳು, ರಚನೆಯಾಗಿರುವ ಹಾಗೂ ಹೊಸದಾಗಿ ರಚಿಸಲ್ಪಟ್ಟ ಹಾಡುಗಳು, ಅಪರೂಪದ ಚಿತ್ರಗಳು, ಅವರ ಸೇವೆಯ ಸಂದರ್ಭದಲ್ಲಿ ತೋರಿದ ಕರ್ತವ್ಯ ಪರತೆ, ಸಾಹಸ ಮತ್ತಿತರ ವಿಚಾರಗಳನ್ನು ಸಂದೇಶಗಳ ಮೂಲಕ ಹಂಚಿಕೊಳ್ಳುವದರೊಂದಿಗೆ ಜನ್ಮದಿನಾಚರಣೆ ಕಾರ್ಯಕ್ರಮ ಈ ವರ್ಷ ವಿಶಿಷ್ಟ ರೀತಿಯಲ್ಲಿ ಆಚರಣೆಗೊಂಡಿತು.

ಸೇನೆಯಲ್ಲಿ ಸೇವೆಯಲ್ಲಿರುವ ಹಿರಿಯ ಅಧಿಕಾರಿಗಳು, ನಿವೃತ್ತರು, ಮಕ್ಕಳು, ತಿಮ್ಮಯ್ಯ ಅವರ ಹಾಗೂ ಭಾರತೀಯ ಸೇನೆಯ ಅಭಿಮಾನಿಗಳು ಇದರಲ್ಲಿ ಪಾಲ್ಗೊಂಡಿದ್ದರು. ಕೆಲವೊಂದು ಉತ್ತಮ ಸನ್ನಿವೇಶಗಳು, ಖ್ಯಾತ ಹಾಡುಗಾರರಿಂದ ಮೊಳಗಿದ ವಂದೇ ಮಾತರಂ ಗೀತೆಗಳು, ಸೇನಾನಿಗೆ ಗೌರವದ ದ್ಯೋತಕವಾಗಿತ್ತು. ರಸಪ್ರಶ್ನೆ, ದೇಶಭಕ್ತಿಗೀತೆಯಂತಹ ಸ್ಪರ್ಧೆಗಳಲ್ಲಿ ವಿಜೇತರಾದವರ ಬ್ಯಾಂಕ್ ಖಾತೆಗೆ ಬಹುಮಾನದ ಮೊತ್ತವನ್ನು ಹಾಕಲಾಗುವದು ಎಂದು ಫೋರಂನ ಸಂಚಾಲಕ ನಂದಾ ನಂಜಪ್ಪ ಅವರು ತಿಳಿಸಿದ್ದಾರೆ.