ಮಡಿಕೇರಿ, ಮಾ. 31: ವಿಶ್ವವನ್ನೇ ಬೆಚ್ಚಿ ಬೀಳಿಸಿರುವ ಮಹಾಮಾರಿ ಕೊರೊನಾ ವೈರಸ್ ಹಿನ್ನೆಲೆಯಲ್ಲಿ ದೇಶಾದ್ಯಂತ ‘ಲಾಕ್‍ಡೌನ್’ ವ್ಯವಸ್ಥೆ ಜಾರಿಯಲ್ಲಿದೆ. ಕೊಡಗು ಜಿಲ್ಲೆಯಲ್ಲೂ ಈ ವ್ಯವಸ್ಥೆ ಜಾರಿಯಲ್ಲಿದ್ದು; ಜನತೆಗೆ ಅಗತ್ಯ ವಸ್ತುಗಳ ಖರೀದಿಗಾಗಿ ಜಿಲ್ಲಾಡಳಿತದ ವತಿಯಿಂದ ವಾರದಲ್ಲಿ ಮೂರು ದಿನಗಳ ಕಾಲ 6 ಗಂಟೆ ಸಮಯಾವಕಾಶ ನೀಡಲಾಗಿದೆ. ಹಾಲು, ಪತ್ರಿಕೆ, ತರಕಾರಿ, ದಿನಸಿ ಸಾಮಗ್ರಿಗಳನ್ನು ಖರೀದಿಸಲು ಅವಕಾಶ ನೀಡಲಾಗಿತ್ತು. ಇದೀಗ ಉಸ್ತುವಾರಿ ಸಚಿವರ ಸಮ್ಮುಖದಲ್ಲಿ ಜರುಗಿದ ಸಭೆಯಲ್ಲಿ ಜನಪ್ರತಿನಿಧಿಗಳ ಸಲಹೆ, ಕೋರಿಕೆ ಮೇರೆಗೆ ಬೆಳೆಗಾರರು ಬೆಳೆದಂತಹ ಕಾಫಿ ಮಾರಾಟಕ್ಕೆ ಹಾಗೂ ವ್ಯಾಪಾರಿಗಳಿಗೆ ಶುಂಠಿ ಮತ್ತು ಕರಿಮೆಣಸು ಸಾಗಾಟ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ಕಾಫಿಯನ್ನು ಕೊಡಗು ಜಿಲ್ಲಾ ಕಾಫಿ ಬೆಳೆಗಾರರ ಸಹಕಾರ ಸಂಘಕ್ಕೆ ಮಾರಾಟ ಮಾಡಬಹುದಾಗಿದ್ದು; ಸಂಘದಿಂದ ತುರ್ತಾಗಿ ಬೆಳೆಗಾರನಿಗೆ ಮುಂಗಡ ಹಣ ನೀಡಲಾಗುವದು. ಇದಕ್ಕಾಗಿ ಕೊಡಗು ಜಿಲ್ಲಾ ಕೇಂದ್ರ ಸಹಕಾರ ಬ್ಯಾಂಕ್‍ನಿಂದ ರೂ. 1 ಕೋಟಿ ಸಾಲ ನೀಡಲಾಗುತ್ತಿದೆ. ಇನ್ನುಳಿದಂತೆ ವಲಸಿಗ ಕಾರ್ಮಿಕರಿಗೆ ಆಹಾರ ಪೂರೈಕೆ, ಗ್ರಾಮೀಣ ಭಾಗಕ್ಕೆ ತರಕಾರಿ ಸರಬರಾಜು, ವಿದ್ಯಾರ್ಥಿ ಗಳಿಗೆ ಬಿಸಿಯೂಟದ ಅಕ್ಕಿ, ಧಾನ್ಯ ಪೂರೈಕೆ ಮಾಡಲು, ಜಿಲ್ಲೆಗೆ 10 ವೆಂಟಿಲೇಟರ್ ವ್ಯವಸ್ಥೆ ಮಾಡಲು ಇಂದಿನ ಸಭೆಯಲ್ಲಿ ತೀರ್ಮಾನ ಕೈಗೊಳ್ಳಲಾಗಿದೆ.ಜಿ.ಪಂ. ಸಭಾಂಗಣದಲ್ಲಿ ನಡೆದ ಸಭೆಯ ಬಳಿಕ ಸುದ್ದಿಗೋಷ್ಠಿಯನ್ನು ದ್ದೇಶಿಸಿ ಮಾತನಾಡಿದ ಕೊಡಗು ಜಿಲ್ಲಾ ಉಸ್ತುವಾರಿ ಸಚಿವ ವಿ.ಸೋಮಣ್ಣ ಅವರು, ಶಾಸಕ ಕೆ.ಜಿ. ಬೋಪಯ್ಯ ಹಾಗೂ ಅಪ್ಪಚ್ಚುರಂಜನ್ ಅವರುಗಳ ಸಲಹೆ ಮೇರೆಗೆ ಜಿಲ್ಲೆಯ ಬೆಳೆಗಾರರು ಬೆಳೆದ ಕಾಫಿ ಬೀಜಗಳು ಅವರವರ ಮನೆಗಳಲ್ಲಿ ದಾಸ್ತಾನಿದೆ; ಅವುಗಳ ಮಾರಾಟಕ್ಕೆ ಕಾಫಿ ಬೆಳೆಗಾರರ ಸಹಕಾರ ಸಂಘದ ಮೂಲಕ ಅವಕಾಶ ಕಲ್ಪಿಸಲಾಗಿದೆ. ಬೆಳೆಗಾರರು ಕಾಫಿಯನ್ನು ಬೆಳೆಗಾರರ ಸಂಘದಲ್ಲಿ ದಾಸ್ತಾನಿರಿಸಿ ಮುಂಗಡ ಹಣ ಪಡೆಯಬಹುದಾಗಿದೆ. ನಂತರದಲ್ಲಿ ಮಾರಾಟ ಮಾಡುವ ವೇಳೆಗೆ ಉಳಿಕೆ ಹಣವನ್ನು ಪಡೆದುಕೊಳ್ಳಬಹುದಾಗಿದೆ ಎಂದು ಸಚಿವರು ತಿಳಿಸಿದರು. ಬೆಳೆಗಾರರಿಗೆ ಮುಂಗಡ ಹಣ ನೀಡಲು ಬೆಳೆಗಾರರ ಸಂಘಕ್ಕೆ ಕೇಂದ್ರ ಸಹಕಾರ ಬ್ಯಾಂಕ್‍ನಿಂದ ರೂ. 1 ಕೋಟಿ ಸಾಲ ಒದಗಿಸಲಾಗುವದು ಎಂದು ತಿಳಿಸಿದರು.

ಈ ಬಗ್ಗೆ ಇನ್ನಷ್ಟು ಮಾಹಿತಿ ನೀಡಿದ ಶಾಸಕ ಕೆ.ಜಿ. ಬೋಪಯ್ಯ ಅವರು; ಬೆಳೆಗಾರರು ಸಂಘದಲ್ಲಿ ದಾಸ್ತಾನಿಡುವ ಪ್ರತಿ 50 ಕೆ.ಜಿ. ತೂಕದ ಚೀಲಗಳ ಆಧಾರದಲ್ಲಿ ಮುಂಗಡ ಹಣ ನೀಡಲಾಗುವದು. ರೋಬಸ್ಟಾ ಚೆರಿ ಚೀಲವೊಂದಕ್ಕೆ

ರೂ. 1 ಸಾವಿರ, ಪಾರ್ಚಿಮೆಂಟ್‍ಗೆ ರೂ. 3 ಸಾವಿರದಂತೆ, ಅರೆಬಿಕಾ ಚೆರಿಗೆ ರೂ. 2000 ಹಾಗೂ ಅರೆಬಿಕಾ ಪಾರ್ಚ್‍ಮೆಂಟ್‍ಗೆ ಚೀಲಕ್ಕೆ ರೂ. 5 ಸಾವಿರದಂತೆ ಮುಂಗಡ ಹಣ ನೀಡಲಾಗುವದು. ಈ ಸಂಬಂಧ ಡಿಸಿಸಿ ಬ್ಯಾಂಕ್ ಹಾಗೂ ಬೆಳೆಗಾರರ ಸಂಘದೊಂದಿಗೆ ಮಾತುಕತೆ ನಡೆಸಿರುವದಾಗಿ ತಿಳಿಸಿದರು.

ಶುಂಠಿ - ಮೆಣಸು ಸಾಗಾಟ

ಜಿಲ್ಲೆಯಲ್ಲಿ ಬಹಳಷ್ಟು ರೈತರು ಶುಂಠಿ ಹಾಗೂ ಕರಿಮೆಣಸು ಬೆಳೆಯುತ್ತಾರೆ. ಅವುಗಳನ್ನು ದಾಸ್ತಾನಿರಿಸಲು ಸಾಧ್ಯವಿಲ್ಲ. ಸಾಗಾಟಕ್ಕೆ ಅನುಮತಿ ನೀಡಬೇಕೆಂಬ ಶಾಸಕರ ಮನವಿಗೆ ಪೂರಕವಾಗಿ ಶುಂಠಿ ಹಾಗೂ ಕರಿಮೆಣಸು ಉತ್ಪನ್ನಗಳನ್ನು ಕೊಡಗಿನ ಗಡಿದಾಟಿ ಸಾಗಾಟಕ್ಕೆ ಅನುಮತಿ ನೀಡಲಾಗುವದು. ಈ ಸಂಬಂಧ ಜಿಲ್ಲಾಧಿಕಾರಿಗಳಿಂದ ಅನುಮತಿ ಪತ್ರ ಪಡೆದು ಸಾಗಾಟ ಮಾಡಬಹುದೆಂದು ಸಚಿವರು ತಿಳಿಸಿದರು. ಜಿಲ್ಲೆಯ ಗಡಿಭಾಗಗಳು ಮುಚ್ಚಿರುವ ಬಗ್ಗೆ ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸಿದ ಸಂಸದ ಪ್ರತಾಪ್ ಸಿಂಹ ಹಾಗೂ ಶಾಸಕ ರಂಜನ್ ಅವರು; ಗುಂಡ್ಲುಪೇಟೆ, ಗೂಡ್ಲೂರು, ಅರಕಲಗೂಡು ಮೂಲಕ ಸಾಗಾಟ ಮಾಡಬಹುದಾಗಿದೆ. ಇದಕ್ಕೆ ಅನುಮತಿ ನೀಡಲಾಗುವದು ಎಂದು ತಿಳಿಸಿದರು.

ವಲಸಿಗರಿಗೆ ಆಹಾರ

ಜಿಲ್ಲೆಯಾದ್ಯಂತ ಒಟ್ಟು 1900 ರಷ್ಟು ವಲಸಿಗ ಕಾರ್ಮಿಕರಿದ್ದಾರೆ; ಇವರುಗಳಲ್ಲಿ ಪಡಿತರ, ಇನ್ನಿತರ ಸೌಲಭ್ಯ ಹೊಂದಿಕೊಳ್ಳಲು ಯಾವದೇ ದಾಖಲಾತಿಗಳಿಲ್ಲ. ಹಾಗಾಗಿ ಇವರುಗಳು ಉಪವಾಸ ಇರಬಾರ ದೆಂಬ ಉದ್ದೇಶದೊಂದಿಗೆ ಜಿಲ್ಲಾಡಳಿತದ ಮೂಲಕ ಪಡಿತರ ಸಾಮಗ್ರಿ ವಿತರಿಸಲು ಕ್ರಮಕೈಗೊಳ್ಳ ಲಾಗಿದೆ ಎಂದು ಸಚಿವರು ಹೇಳಿದರು.

ಗ್ರಾಮಗಳಿಗೆ ತರಕಾರಿ

‘ಲಾಕ್‍ಡೌನ್’ ಜಾರಿಯಲ್ಲಿರುವ ದರಿಂದ ಗ್ರಾಮೀಣ ವಿಭಾಗಕ್ಕೆ ತರಕಾರಿ ಪೂರೈಕೆ ಮಾಡುವಲ್ಲಿ ಸಮಸ್ಯೆ ಯಾಗುತ್ತಿರುವ ಬಗ್ಗೆ ತಿಳಿದು ಬಂದಿದೆ. ಈ ನಿಟ್ಟಿನಲ್ಲಿ ಜಿ.ಪಂ. ಸಿಇಓ, ತಾ.ಪಂ. ಇಓ, ಗ್ರಾ.ಪಂ. ಅಭಿವೃದ್ಧಿ ಅಧಿಕಾರಿಗಳ ತಂಡಗಳ ಮೂಲಕ ಮೈಸೂರು ಕಡೆಯಿಂದ ತರಕಾರಿ ತರಿಸಿ, ಎಪಿಎಂಸಿಗಳ ಮೂಲಕ ಗ್ರಾಮೀಣ ಪ್ರದೇಶಗಳಿಗೆ ವಿತರಣೆ ಮಾಡುವ ವ್ಯವಸ್ಥೆ ಮಾಡಲಾಗಿದೆ ಎಂದು ಸಚಿವರು ಮಾಹಿತಿಯಿತ್ತರು.

ವಿದ್ಯಾರ್ಥಿಗಳಿಗೆ ಅಕ್ಕಿ

ಶಾಲೆಯಲ್ಲಿ ಬಿಸಿಯೂಟ ಪಡೆದುಕೊಳ್ಳುತ್ತಿದ್ದ ವಿದ್ಯಾರ್ಥಿ ಗಳನ್ನು ಶಿಕ್ಷಣ ಇಲಾಖೆ ವತಿಯಿಂದ ಮಾಹಿತಿ ಸಂಗ್ರಹಿಸಿ; ವಿದ್ಯಾರ್ಥಿಗಳಿಗೆ 21 ದಿನಗಳ ಕಾಲದ ಅಕ್ಕಿ ಹಾಗೂ ಧಾನ್ಯ ನೀಡಲು ಕ್ರಮಕೈಗೊಳ್ಳಲಾಗಿದೆ. ಕೊಡಗು ಗುಡ್ಡಗಾಡು ಪ್ರದೇಶವಾಗಿ ರುವದರಿಂದ ಆಯಾ ಗ್ರಾಮ ಪಂಚಾಯಿತಿಗಳಲ್ಲಿ ವಿದ್ಯಾರ್ಥಿಗಳ ಪೋಷಕರಿಗೆ ಧಾನ್ಯವನ್ನು ತಲಪಿಸುವ ವ್ಯವಸ್ಥೆ ಮಾಡಲಾಗು ವದೆಂದು ತಿಳಿಸಿದರು.

(ಮೊದಲ ಪುಟದಿಂದ)

ವೆಂಟಿಲೇಟರ್‍ಗಳ ವ್ಯವಸ್ಥೆ

ಜಿಲ್ಲೆಯಲ್ಲಿ ಓರ್ವ ವ್ಯಕ್ತಿಗೆ ಕೊರೊನಾ ಸೋಂಕು ದೃಢಪಟ್ಟಿತ್ತಾ ದರೂ ಇದೀಗ ಸಹಜ ಸ್ಥಿತಿಗೆ ಮರಳಿದೆ. 359 ಮಂದಿಗೆ ಮನೆಯಲ್ಲಿ ತಡೆಮಾಡಲಾಗಿದೆ. 45 ಮಂದಿಗೆ ನೆಗೆಟಿವ್ ವರದಿ ಬಂದಿದೆ. ಇದೀಗ ಪ್ರತ್ಯೇಕ ವಾರ್ಡ್‍ಗಳಲ್ಲಿ ನಾಲ್ವರ ಮೇಲೆ ನಿಗಾ ಇಡಲಾಗಿದೆ. ಸದ್ಯಕ್ಕೆ ಜಿಲ್ಲೆಯಲ್ಲಿ ಯಾವದೇ ತೊಂದರೆ ಇಲ್ಲವಾಗಿದೆ. ಆದರೂ ಮುನ್ನೆಚ್ಚರಿಕಾ ಕ್ರಮವಾಗಿ ಜಿಲ್ಲೆಗೆ 10 ವೆಂಟಿಲೇಟರ್ ವ್ಯವಸ್ಥೆ ಮಾಡಿಕೊಳ್ಳಲು ಜಿಲ್ಲಾಡಳಿತಕ್ಕೆ ಸೂಚನೆ ನೀಡಲಾಗಿದೆ ಎಂದು ಸಚಿವರು ಮಾಹಿತಿ ನೀಡಿದರು.

ಜಿಲ್ಲೆಯಲ್ಲಿ ಯಾರಾದರೂ ವ್ಯಕ್ತಿಗಳು ಸಾವನ್ನಪ್ಪಿದರೆ ಅಂತ್ಯಕ್ರಿಯೆ ಸಂದರ್ಭ 20 ಮಂದಿ ಮಾತ್ರ ಸೇರಲು ಅವಕಾಶ ನೀಡಲಾಗಿದೆ. ಧಾರ್ಮಿಕ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರಾರ್ಥನೆ, ಪೂಜೆಗಳ ಮೇಲಿನ ನಿಷೇಧ ಮುಂದುವರಿಯಲಿದೆ; ತುರ್ತು ಸೇವೆಗೆ ಒಟ್ಟು 16 ಮಂದಿ ನೋಡಲ್ ಅಧಿಕಾರಿಗಳನ್ನು ನೇಮಕ ಮಾಡಿರುವದಾಗಿ ಸಚಿವರು ಹೇಳಿದರು.

ಸಡಿಲಿಕೆ ಇಲ್ಲ

ಕೇರಳ ಸಂಪರ್ಕ ರಸ್ತೆ ಬಂದ್ ಮಾಡಿರುವ ಹಿನ್ನೆಲೆಯಲ್ಲಿ ಕೇರಳ ರಾಜ್ಯ ತಕರಾರು ಎತ್ತಿರುವ ಬಗ್ಗೆ ಸಚಿವರಲ್ಲಿ ಪ್ರಶ್ನಿಸಿದ ಸಂದರ್ಭ ಉತ್ತರಿಸಿದ ಸಚಿವರಾದಿಯಾಗಿ ಶಾಸಕರು, ಸಂಸದರು, ಕೇರಳದವರಿಗೆ ಬೇರೆ ಕಡೆಗೆ ಸಂಪರ್ಕ ಸಾಧಿಸಲು ಹಲವಷ್ಟು ಮಾರ್ಗಗಳಿವೆ. ಕೇರಳದ ಸಂಸದರು ನ್ಯಾಯಾಲಯದ ಮೊರೆ ಹೋಗಿದ್ದಾರೆ. ಮುಖ್ಯವಾಗಿ ಕಾಸರಗೋಡು - ಮಂಗಳೂರು ರಸ್ತೆ ಬಗ್ಗೆ ಉಲ್ಲೇಖಿಸಿದ್ದು; ಕೊಡಗಿನ ಗಡಿ ಬಗ್ಗೆ ಸೇರಿಸಿಕೊಂಡಿದ್ದಾರಷ್ಟೆ. ನಮಗೆ ನಮ್ಮ ಜಿಲ್ಲೆಯ ಜನರ ರಕ್ಷಣೆ ಮುಖ್ಯ; ನಮ್ಮ ರಕ್ಷಣೆ ನಾವು ಮಾಡಿಕೊಂಡಿದ್ದೇವೆ. ಯಾವದೇ ಕಾರಣಕ್ಕೂ ತೀರ್ಮಾನದಲ್ಲಿ ಸಡಿಲಿಕೆ ಇಲ್ಲವೆಂದು ಸ್ಪಷ್ಟಪಡಿಸಿದರು.

ಗೋಷ್ಠಿಯಲ್ಲಿ ವಿಧಾನ ಪರಿಷತ್ ಸದಸ್ಯರಾದ ಸುನಿಲ್ ಸುಬ್ರಮಣಿ, ವೀಣಾ ಅಚ್ಚಯ್ಯ, ಜಿ.ಪಂ. ಅಧ್ಯಕ್ಷ ಬಿ.ಎ. ಹರೀಶ್, ಉಪಾಧ್ಯಕ್ಷೆ ಲೋಕೇಶ್ವರಿ ಗೋಪಾಲ್, ಜಿಲ್ಲಾಧಿಕಾರಿ ಅನೀಸ್ ಕಣ್ಮಣಿ ಜಾಯ್, ಜಿ.ಪಂ. ಸಿಇಓ ಲಕ್ಷ್ಮೀಪ್ರಿಯ ಇದ್ದರು.