ಮಡಿಕೇರಿ, ಮಾ. 18 : ಕೊಡಗು ಜಿಲ್ಲೆಯ ಔಷಧಿ ಅಂಗಡಿಗಳಲ್ಲಿ ಮಾಸ್ಕ್, ಹ್ಯಾಂಡ್ ಗ್ಲ್ವೌಸ್, ಸ್ಚಾನಿಟೈಸರ್ ಮಾರಾಟ ಮಾಡುವುದನ್ನು ಸ್ಥಗಿತಗೊಳಿಸಲು ಕೊಡಗು ಜಿಲ್ಲಾ ಔಷಧಿ ವ್ಯಾಪಾರಸ್ಥರ ಸಂಘ ನಿರ್ಧರಿಸಿದೆ. ಅಧಿಕಾರಿಗಳು ಔಷಧಿ ಅಂಗಡಿಗಳ ಮೇಲೆ ಧಾಳಿ ನಡೆಸಿ ಸೂಕ್ತ ಕಾರಣವಿಲ್ಲದೇ ದಂಡ ವಿಧಿಸಿದ ಹಿನ್ನೆಲೆಯಲ್ಲಿ ಮುಂದಿನ ದಿನಗಳಲ್ಲಿ ಮಾಸ್ಕ್‍ನಂಥ ಅತ್ಯಗತ್ಯ ಪರಿಕರಗಳ ಮಾರಾಟಕ್ಕೆ ಸಮಸ್ಯೆಯಾಗುವ ಸಾಧ್ಯತೆ ಹಿನ್ನೆಲೆಯಲ್ಲಿ ಇಂಥವುಗಳನ್ನು ಮಾರಾಟ ಮಾಡದೇ ಇರಲು ಔಷಧಿ ವ್ಯಾಪಾರಸ್ಥರು ನಿರ್ಧರಿಸಿದ್ದಾರೆ.ಕೊರೊನಾ ವೈರಸ್ ಹಬ್ಬುತ್ತಿರುವ ಸಂದರ್ಭ ಮಾಸ್ಕ್, ಹ್ಯಾಂಡ್ ಗ್ಲ್ವೌಸ್, ಸ್ಚಾನಿಟೈಸರ್‍ಗಳು ಅತ್ಯಗತ್ಯವಾಗಿದ್ದು, ಇವುಗಳನ್ನು ಕೊಡಗು ಜಿಲ್ಲೆಯ ಔಷಧಿ ವ್ಯಾಪಾರಸ್ಥರಿಗೆ ಹೆಚ್ಚಿನ ಬೆಲೆಯಲ್ಲಿ ಸಗಟು ವ್ಯಾಪಾರಸ್ಥರು ಮಾರಾಟ ಮಾಡುತ್ತಿದ್ದಾರೆ. ತಮಗೆ ಎಷ್ಟು ಬೆಲೆಗೆ ಸಿಗುತ್ತಿದೆಯೋ ಅದೇ ದರಕ್ಕೆ ಇವುಗಳನ್ನು ಜಿಲ್ಲೆಯ ಔಷಧಿ ಅಂಗಡಿಗಳ ಮಾಲೀಕರು ಮಾರಾಟ ಮಾಡುತ್ತಿದ್ದರು. ಆದರೆ ಎರಡು ದಿನಗಳಿಂದ ವಿವಿಧ ಇಲಾಖಾಧಿಕಾರಿಗಳು ಕೊಡಗಿನ ಔಷಧಿ ಮಾರಾಟದ ಅಂಗಡಿಗಳ ಮೇಲೆ ಧಾಳಿ ನಡೆಸಿ ಅಧಿಕ ದಂಡವನ್ನು ವಿನಾಕಾರಣ ವಿಧಿಸುತ್ತಿದ್ದಾರೆ.ಮಾಸ್ಕ್, ಹ್ಯಾಂಡ್ ಗ್ಲ್ವೌಸ್, ಸ್ಚಾನಿಟೈಸರ್‍ಗಳು ಈ ಮೊದಲು 100ರ ಪ್ಯಾಕ್‍ನಲ್ಲಿ ಲಭಿಸುತ್ತಿತ್ತು. ಆಗ ಅದರ ಮೇಲೆ ಎಂ.ಆರ್.ಪಿ. ದರ ನಮೂದಾಗಿರುತ್ತಿತ್ತು. ಆದರೆ ಇತ್ತೀಚೆಗೆ ಹೆಚ್ಚಿರುವ ಬೇಡಿಕೆಯಿಂದಾಗಿ ವಿತರಕರು ಬಿಡಿಬಿಡಿಯಾಗಿ ಇವುಗಳನ್ನು ಮಾರಾಟ ಮಾಡುತ್ತಿದ್ದು, ಹೀಗೆ ಬಿಡಿಯಾಗಿ ಮಾರಾಟ ಮಾಡಲಾಗುತ್ತಿರುವ ಮಾಸ್ಕ್, ಹ್ಯಾಂಡ್ ಗ್ಲ್ವೌಸ್, ಸ್ಚಾನಿಟೈಸರ್‍ಗಳ ಮೇಲೆ ಎಂ.ಆರ್.ಪಿ. ಬೆಲೆ ನಮೂದಾಗಿರುವುದಿಲ್ಲ. ಇದೇ ಕಾರಣವನ್ನು ಅಧಿಕಾರಿಗಳು ಮುಂದೊಡ್ಡಿ ಮಾರಾಟಗಾರರಿಗೆ ಅಧಿಕ ದಂಡ ವಿಧಿಸುತ್ತಿದ್ದಾರೆ.ಮಾರಾಟ ಮಾಡಿದ ವಸ್ತುವಿಗೆ ಅಧಿಕಾರಿಗಳು ವಿಧಿಸುತ್ತಿರುವ ದಂಡದ ಮೊತ್ತವೇ ಅತ್ಯಧಿಕವಾಗಿರುವ ಹಿನ್ನೆಲೆಯಲ್ಲಿ ವಿನಾಕಾರಣ ದಂಡ ಕಟ್ಟುವ ಬದಲು ಮಾಸ್ಕ್, ಹ್ಯಾಂಡ್ ಗ್ಲ್ವೌಸ್, ಸ್ಚಾನಿಟೈಸರ್‍ಗಳನ್ನು ಮಾರಾಟ ಮಾಡದಿರಲು ಕೊಡಗು ಜಿಲ್ಲೆಯ ಔಷಧಿ ವ್ಯಾಪಾರಸ್ಥರು ನಿರ್ಧರಿಸಿದ್ದು, ಜಿಲ್ಲಾಧಿಕಾರಿಗಳಿಗೆ ಈ ಬಗ್ಗೆ ಮಾಹಿತಿಯನ್ನು ನೀಡಿದ್ದಾರೆ.

ಮುಂದೆ ಪ್ರತೀ ಬಿಡಿ ಮಾಸ್ಕ್, ಹ್ಯಾಂಡ್ ಗ್ಲ್ವಾಸ್, ಸ್ಯಾನಿಟೈಸರ್‍ಗಳ ಮೇಲೆ ಎಂ.ಆರ್.ಪಿ. ಮುದ್ರಣವಾಗಿ ಬರುವವರೆಗೆ ಕೊಡಗು ಜಿಲ್ಲೆಯ ಔಷಧಿ ವ್ಯಾಪಾರಸ್ಥರು ತಮ್ಮ ಔಷಧಿ ಅಂಗಡಿಗಳಲ್ಲಿ ಇವುಗಳನ್ನು ಮಾರಾಟ ಮಾಡದಿರಲು ನಿರ್ಧರಿಸಿದ್ದಾರೆ ಎಂದು ಸಂಘದ ಜಿಲ್ಲಾ ಅಧ್ಯಕ್ಷ ಹಾಗೂ ರಾಜ್ಯ ಔಷಧಿ ವ್ಯಾಪಾರಸ್ಥರ ಸಂಘದ ಕಾರ್ಯದರ್ಶಿ ಎ.ಕೆ .ಜೀವನ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.