ಮಡಿಕೇರಿ, ಸೆ. ೯: ನೇತಾಜಿ ಯುವಕ ಮಂಡಲ, ನೆಹರು ಯುವ ಕೇಂದ್ರ ಮಡಿಕೇರಿ, ಯುವಜನ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ, ಜಿಲ್ಲಾ ಯುವ ಒಕ್ಕೂಟ, ಕೊಡಗು, ತಾಲೂಕು ಯುವ ಒಕ್ಕೂಟ, ಮಡಿಕೇರಿ ಮತ್ತು ನೇತಾಜಿ ಯುವತಿ ಮಂಡಳಿ, ತಾಳತ್ತಮನೆ ಇವರ ಸಂಯುಕ್ತ ಆಶ್ರಯದಲ್ಲಿ ಇತ್ತೀಚೆಗೆ ತಾಳತ್ತಮನೆಯ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಆಟದ ಮೈದಾನದಲ್ಲಿ ೩೮ನೇ ವರ್ಷದ ಗ್ರಾಮೀಣ ಕ್ರೀಡಾಕೂಟವನ್ನು ನಡೆಸಲಾಯಿತು.

ಜೀವನ್ ಪರ್ಲಕೋಟಿ, ಸದಸ್ಯರು, ಮದೆ ಗ್ರಾಮ ಪಂಚಾಯಿತಿ ಹಾಗೂ ಅಧ್ಯಕ್ಷರು, ನೇತಾಜಿ ಯುವಕ ಮಂಡಲ ಇವರು ಕಾರ್ಯಕ್ರಮವನ್ನು ಧ್ವಜಾರೋಹಣದ ಮೂಲಕ ಉದ್ಘಾಟಿಸಿದರು. ನಂತರ ವಂದೇ ಮಾತರಂ ಗೀತೆಯೊಂದಿಗೆ ಕ್ರೀಡಾ ಕೂಟಕ್ಕೆ ಚಾಲನೆ ನೀಡಲಾಯಿತು. ಸುಮಾರು ೨೧ ಬಗೆಯ ವಿವಿಧ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿತ್ತು. ಪುರುಷರು, ಮಹಿಳೆಯರು, ಮಕ್ಕಳು ಹಾಗೂ ವೃದ್ಧರು ಸೇರಿದಂತೆ ಎಲ್ಲಾ ವಯೋಮಾನದವರು ಅತ್ಯಂತ ಉತ್ಸಾಹದಿಂದ ಭಾಗವಹಿಸಿದ್ದರು. ಪುಟಾಣಿ ಮಕ್ಕಳಿಗೆ ಕಾಳು ಹೆಕ್ಕುವುದು, ಕಪ್ಪೆ ಹಾರುವುದು, ಸಾರ್ವಜನಿಕರಿಗೆ ಗುಡ್ಡಗಾಡು ಓಟ, ಸಂಗೀತ ಕುರ್ಚಿ, ವಿಷದ ಚೆಂಡು, ನಿಂಬೆ ಚಮಚದ ಓಟ ಸೇರಿದಂತೆ ವಿವಿಧ ಸ್ಪರ್ಧೆಗಳನ್ನು ನಡೆಸಲಾಯಿತು. ಸಮಾರೋಪ ಸಮಾರಂಭದ ಅಧ್ಯಕ್ಷತೆಯನ್ನು ಪಿ.ಪಿ. ಸುಕುಮಾರ್, ಅಧ್ಯಕ್ಷರು, ಜಿಲ್ಲಾ ಯುವ ಒಕ್ಕೂಟ ಇವರು ವಹಿಸಿದ್ದರು. ಮುಖ್ಯ ಅತಿಥಿಗಳಾಗಿ ಜಬ್ಬಂಡ ಸುರೇಶ್ ಮುತ್ತಣ್ಣ, ಬೆಳೆಗಾರರು, ತಾಳತ್ತಮನೆ, ಎ.ಆರ್. ನೇತ್ರಾವತಿ, ಕಾರ್ಯದರ್ಶಿ, ತಾಲೂಕು ಯುವ ಒಕ್ಕೂಟ, ಜೀವನ್ ಪರ್ಲಕೋಟಿ, ಬಿ.ಎಸ್. ನವೀನ್, ಸದಸ್ಯರು, ಮದೆ ಗ್ರಾಮ ಪಂಚಾಯಿತಿ, ಗಿರೀಶ್ ತಾಳತ್ತಮನೆ, ಮಾಜಿ ಅಧ್ಯಕ್ಷರು ಹಾಗೂ ಸಲಹೆಗಾರರು, ನೇತಾಜಿ ಯುವಕ ಮಂಡಲ, ವಿಶಾಲಕ್ಷಿ, ಅಧ್ಯಕ್ಷರು, ನೇತಾಜಿ ಯುವತಿ ಮಂಡಳಿ ಇವರುಗಳು ಪಾಲ್ಗೊಂಡಿದ್ದರು.