ಕಣಿವೆ, ಏ. ೧೦ : ಕುಶಾಲನಗರ ತಾಲೂಕಿನ ಐತಿಹಾಸಿಕ ಹಿನ್ನೆಲೆಯನ್ನು ಹೊಂದಿರುವ ಕಣಿವೆ ಗ್ರಾಮದ ಕಾವೇರಿ ನದಿ ದಂಡೆಯಲ್ಲಿರುವ ಶ್ರೀ ರಾಮಲಿಂಗೇಶ್ವರ ಸ್ವಾಮಿಯ ಬ್ರಹ್ಮರಥೋತ್ಸವ ಭಾನುವಾರ ಶ್ರದ್ಧಾ ಭಕ್ತಿಯಿಂದ ಜರುಗಿತು.

ರಾಜ್ಯ ಹೆದ್ದಾರಿ ಹಾಗೂ ಹಾರಂಗಿ ಬಲದಂಡೆ ನಾಲೆಯ ನಿರ್ಮಾಣದಿಂದಾಗಿ ನಿರ್ನಾಮ ಗೊಂಡ ಪುಟ್ಟ ಬೆಟ್ಟದ ಎರಡೂ ಬದಿಗಳಲ್ಲಿರುವ ಐತಿಹಾಸಿಕ ಹಿನ್ನೆಲೆಯ ಹರಿಹರೇಶ್ವರ ಹಾಗೂ ಲಕ್ಷö್ಮಣೇಶ್ವರ ದೇಗುಲಗಳ ನಡುಭಾಗದಲ್ಲಿ ಕಾವೇರಿ ನದಿಯ ದಂಡೆಯಲ್ಲಿ ಪೂರ್ವಾಭಿಮುಖ ವಾಗಿರುವ ರಾಮಲಿಂಗೇಶ್ವರ ಸನ್ನಿಧಿ ಇದಾಗಿದ್ದು, ಬಯಲು ಸೀಮೆ ಪ್ರದೇಶವಾದ ಕಣಿವೆ ಸುತ್ತಮುತ್ತಲಿನ ಹತ್ತಾರು ಗ್ರಾಮಗಳಿಂದ ಆಗಮಿಸಿದ್ದ ಭಕ್ತರು ರಥೋತ್ಸವವನ್ನು ಸಾಕ್ಷೀಕರಿಸಿದರು. ರಥೋತ್ಸವಕ್ಕೂ ಮುನ್ನಾ ಕಾಶಿಯಿಂದ ಅಂಚೆಯಲ್ಲಿ ತರಿಸಿದ ಪವಿತ್ರ ಗಂಗಾಜಲವನ್ನು ಭಾನುವಾರ ಬೆಳಗ್ಗೆ ನೆರೆಯ ಹೆಬ್ಬಾಲೆ ಗ್ರಾಮಸ್ಥರು ಅಲಂಕೃತ ಮಂಟಪ ದಲ್ಲಿಟ್ಟು ಮಂಗಳವಾದ್ಯಗಳೊAದಿಗೆ ಮೆರವಣಿಗೆಯಲ್ಲಿ ತಂದ ನಂತರ ಶ್ರೀ ಸ್ವಾಮಿಗೆ ಗಂಗೋಧಕದಿAದ ರುದ್ರಾಭಿಷೇಕ ನೆರವೇರಿಸಿದ ನಂತರ ರಥಬಲಿ ನೆರವೇರಿಸಿದರು. ಶ್ರೀ ಸ್ವಾಮಿ ಯನ್ನು ಬಗೆ ಬಗೆಯ ಪುಷ್ಪ ಹಾಗೂ ವಸ್ತçಗಳೊಂದಿಗೆ ಅಲಂಕರಿಸಿದ್ದ ರಥದಲ್ಲಿ ಮಧ್ಯಾಹ್ನ ಒಂದೂವರೆ ಗಂಟೆಯ ಅಭಿಜಿನ್ ಮುಹೂರ್ತದಲ್ಲಿ ಪ್ರತಿಷ್ಠಾಪಿಸ ಲಾಯಿತು.

ಇದೇ ಸಂದರ್ಭ ಹಲವು ಭಕ್ತರು ಬಾಳೆಹಣ್ಣು ಹಾಗೂ ಜವುನಗಳನ್ನು ರಥದ ಮೇಲೆ ಎಸೆದು ಪುನೀತರಾದುದು ಕಂಡು ಬಂತು.

ಬಸವಾಪಟ್ಟಣದ ವೇದ ಬ್ರಹ್ಮ ಬೆಂಗಳೂರಿನ ನರಹರಿಶರ್ಮಾ ನೇತೃತ್ವದಲ್ಲಿ ದೇವಾಲಯದ ಪ್ರಧಾನ ಅರ್ಚಕ ಹೆಚ್.ಆರ್. ರಾಘವೇಂದ್ರ ಚಾರ್ ತಂಡದಿAದ ದೇವಾಲಯ ಪೂಜಾವಿಧಿಗಳು ನೆರವೇರಿದವು.

ರಥೋತ್ಸವದ ನಂತರ ನೆರೆದಿದ್ದ ಭಕ್ತಸಮೂಹಕ್ಕೆ ದೇವಾಲಯದ ಆವರಣದಲ್ಲಿ ಪ್ರಸಾದ ವಿತರಣೆ ಹಾಗೂ ಅನ್ನದಾನ ನಡೆಯಿತು.

(ಮೊದಲ ಪುಟದಿಂದ)

ಕೊರೊನಾ ಅಬ್ಬರದಿಂದಾಗಿ ಕಳೆದ ಎರಡು ವರ್ಷಗಳಲ್ಲಿ ರಥೋತ್ಸವ ಭಕ್ತರು ಇಲ್ಲದೆಯೇ ಮುಂಜಾನೆಯೇ ನಡೆದಿತ್ತು.

ಹಾಗಾಗಿ ಈ ವರ್ಷ ರಥೋತ್ಸವದಲ್ಲಿ ಹೆಚ್ಚಿನ ಭಕ್ತರು ಪಾಲ್ಗೊಂಡಿದ್ದುದು ಕಂಡು ಬಂತು. ರಥೋತ್ಸವದ ಅಂಗವಾಗಿ ಕಣಿವೆ, ಹಕ್ಕೆ ಹಾಗೂ ಹುಲುಸೆ ಗ್ರಾಮಗಳ ಮುಖ್ಯ ಬೀದಿಗಳಲ್ಲಿ ಭಕ್ತಾಧಿಗಳು ತಮ್ಮ ಮನೆಗಳನ್ನು ತಳಿರು ತೋರಣಗಳಿಂದ ಸಿಂಗರಿಸಿ ಮನೆ ಮುಂದಿನ ಬಾಗಿಲಲ್ಲಿ ಬಣ್ಣದ ರಂಗೋಲಿಯನ್ನು ಹಾಕಿ ಭಕ್ತಿ ಭಾವ ಮೆರೆದರು.

ರಥೋತ್ಸವದ ಅಂಗವಾಗಿ ದೇವಾಲಯದ ಆವರಣದಲ್ಲಿ ಮೂರು ದಿನಗಳ ಕಾಲ ಜಾತ್ರೆ ನಡೆಯಲಿದೆ. ದೇವಾಲಯದ ಅಭಿವೃದ್ದಿ ಸಮಿತಿ ಅಧ್ಯಕ್ಷ ಕೆ.ಎನ್.ಸುರೇಶ್, ಗೌರವ ಅಧ್ಯಕ್ಷ ಇ.ಎಸ್.ಗಣೇಶ್, ಕಾರ್ಯಾಧ್ಯಕ್ಷ ಕೆ.ಎಸ್.ಮಾಧವ, ಉಪಾಧ್ಯಕ್ಷ ಕೆ.ಕೆ.ಮಂಜುನಾಥಸ್ವಾಮಿ, ಕಾರ್ಯದರ್ಶಿ ಟಿ.ಎನ್.ಶೇಷಾಚಲ, ಸಹಕಾರ್ಯದರ್ಶಿ ಕೆ.ಎಲ್.ಮಹೇಶಕುಮಾರ್ ಸೇರಿದಂತೆ ಪ್ರಮುಖರಾದ ಕೆ.ಸಿ.ನಂಜುAಡಸ್ವಾಮಿ, ಆರ್.ವಿ.ನಾರಾಯಣಮೂರ್ತಿ, ಕೆ.ಎಸ್.ಮಹೇಶ್, ಶಿರಗಜೆ ನವೀನ್, ಆರ್.ಆರ್.ಮಧು, ಕಾರ್ತಿಕ್, ನರಸಿಂಹಸ್ವಾಮಿ ಶೆಟ್ಟಿ ಮೊದಲಾದವರಿದ್ದರು. ರಥೋತ್ಸವದ ಅಂಗವಾಗಿ ಕುಶಾಲನಗರ ಗ್ರಾಮಾಂತರ ಠಾಣೆ ಪೊಲೀಸರು ಸೂಕ್ತ ಪೊಲೀಸ್ ಬಂದೋಬಸ್ತ್ ಕಲ್ಪಿಸಿದ್ದರು.

ಪಾನಕ ಮಜ್ಜಿಗೆ ವಿತರಣೆ

ಮಧ್ಯಾಹ್ನದ ರಣ ಬಿಸಿಲಿನಲ್ಲಿ ನಡೆದ ರಥೋತ್ಸವದಲ್ಲಿ ಭಾಗಿಯಾದ ಭಕ್ತಸಮೂಹಕ್ಕೆ ಗ್ರಾಮದ ಭಕ್ತರು ಅಲ್ಲಲ್ಲಿ ತಂಪನೆಯ ಪಾನಕ ಹಾಗೂ ಮಜ್ಜಿಗೆಯನ್ನು ವಿತರಿಸುತ್ತಿದ್ದುದು ಕಂಡು ಬಂತು.

ಮೂರು ದಿನಗಳ ಕಾಲ ನಡೆವ ಜಾತ್ರೋತ್ಸವದಲ್ಲಿ ವ್ಯಾಪಾರ ವಹಿವಾಟು ನಡೆಸಲು ಅನ್ಯಕೋಮಿನವರಿಗೆ ಅವಕಾಶವಿಲ್ಲ ಎಂದು ದೇವಾಲಯ ಸಮಿತಿ ತೀರ್ಮಾನಿಸಿದ್ದರಿಂದ ಕೇವಲ ಹಿಂದೂ ವರ್ತಕರು ಅಂಗಡಿಗಳನ್ನು ಹಾಕಿಕೊಂಡಿದ್ದರು.

ಗಮನ ಸೆಳೆದ ತೂಗುಸೇತುವೆ

ನೆರೆಯ ಮೈಸೂರು ಜಿಲ್ಲೆಯ ನೂರಾರು ಭಕ್ತರು ರಥೋತ್ಸವಕ್ಕೆ ಆಗಮಿಸಿದ ಕಾರಣ ಕಾವೇರಿ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ತೂಗು ಸೇತುವೆ ಎಲ್ಲರ ಗಮನ ಸೆಳೆಯಿತು. ದೇವಾಲಯಕ್ಕೆ ಬಂದ ಭಕ್ತರು ಮಕ್ಕಳು ಮಹಿಳೆಯರಾದಿಯಾಗಿ ಬಹುತೇಕರು ತೂಗು ಸೇತುವೆ ಮೇಲೆ ಹೆಜ್ಜೆ ಹಾಕಿದರು. ಫೋಟೋ ತೆಗೆಸಿಕೊಂಡರು.

-ವರದಿ : ಕೆ.ಎಸ್.ಮೂರ್ತಿ