ಮಡಿಕೇರಿ, ಮಾ. ೨೩: ಕಾಫಿಯ ಪ್ರಮುಖ ಕೀಟಗಳಾದ ಕಾಫಿ ಬಿಳಿ ಕಾಂಡ ಕೊರಕ ಮತ್ತು ಕಾಫಿ ಕಾಯಿ ಕೊರಕ ಕೀಟಗಳಿಗೆ ಸಮಗ್ರ ಕೀಟ ನಿರ್ವಹಣೆ ಕ್ರಮಗಳಲ್ಲಿ ಕ್ಲೋರೊಪೈರಿಫೋಸ್ ಅನ್ನು ಕೀಟ ನಿರ್ವಹಣೆ ಕ್ರಮವಾಗಿ ಬಳಸಲಾಗುತ್ತಿದೆ.

ಈಗಾಗಲೇ ಕ್ಲೋರೊಪೈರಿಫಾಸ್ ಕೀಟನಾಶಕವನ್ನು ನಿಷೇಧಿಸಲ್ಪಡುವ ಕೀಟನಾಶಕಗಳ ಪಟ್ಟಿಯಲ್ಲಿ ಪ್ರಕಟಿಸಲಾಗಿದೆ. ಕ್ಲೋರೊಪೈರಿಫೋಸ್ ಮನುಷ್ಯನ ಅರೋಗ್ಯದ ಮೇಲೆ ಉಂಟು ಮಾಡುವ ದುಷ್ಪರಿಣಾಮಗಳಿಂದಾಗಿ, ಹಲವಾರು ದೇಶಗಳು ಈಗಾಗಲೇ ಈ ರಾಸಾಯನಿಕದ ಬಳಕೆಯನ್ನು ನಿಷೇಧಿಸಿವೆ ಮತ್ತು ಕಠಿಣ ನಿರ್ಬಂಧ ವಿಧಿಸಿವೆ ಹಾಗೂ ಈ ಕೀಟನಾಶಕದ ಬಳಕೆಯನ್ನು ನಿಲ್ಲಿಸಲು ಕಡಿಮೆ ಮಟ್ಟದ ಶೇಷ ಮಿತಿಗಳನ್ನು (ಖesiಜue ಟimiಣ) ನಿಗದಿಪಡಿಸಿದೆ.

ಇತ್ತೀಚಿನ ದಿನಗಳಲ್ಲಿ ಭಾರತದಿಂದ ರಫ್ತಾದ ಕಾಫಿಯಲ್ಲಿ ಕ್ಲೋರೊಪೈರಿಫೋಸ್‌ನ ಪ್ರಮಾಣವು ಅನುಮತಿಸಲಾದ ಮಿತಿಯನ್ನು ಮೀರಿದೆ ಎಂದು ತಿಳಿಸಲಾಗಿದೆ. ಈ ಬೆಳವಣಿಗೆಯು ಶೇ. ೭೦ ರಷ್ಟು ರಫ್ತಿನ ಮೇಲೆ ಅವಲಂಬಿತವಾಗಿರುವ ಭಾರತದ ಕಾಫಿ ಮಾರುಕಟ್ಟೆಯ ಮೇಲೆ ವ್ಯತಿರಿಕ್ತ ಪರಿಣಾಮಗಳನ್ನು ಉಂಟುಮಾಡುತ್ತದೆ. ಹಾಗೂ ಅದು ಭಾರತೀಯ ಕಾಫಿಯ ಗುಣಮಟ್ಟವನ್ನು ಹಾಳುಮಾಡುತ್ತಿದೆ. ಆದ್ದರಿಂದ, ಕಾಫಿ ಕೃಷಿಯ ಯಾವುದೇ ಹಂತದಲ್ಲಿ ಕ್ಲೋರೊಪೈರಿಫೋಸ್ ಅನ್ನು ಬಳಸದಿರಲು ಎಲ್ಲಾ ಕಾಫಿ ಬೆಳೆಗಾರರಲ್ಲಿ ಈ ಮೂಲಕ ಕೇಳಿಕೊಳ್ಳುತ್ತೇವೆ.

ಕ್ಲೋರೊಪೈರಿಫೋಸ್ ಕೀಟನಾಶಕದ ಬಳಕೆಯ ಬದಲಾಗಿ ಬಿಳಿ ಕಾಂಡ ಕೊರಕ: ಉತ್ತಮ ನೆರಳಿನ ನಿರ್ವಹಣೆ. ಬಿಳಿ ಕಾಂಡ ಕೊರೆಕ ಬಾಧಿತ ಗಿಡಗಳ ಪತ್ತೆ ಮತ್ತು ಸುಡುವಿಕೆ. ಕಾಂಡಗಳನ್ನು ನುಣುಪುಗೊಳಿಸಲು ತೊಗಟೆಯನ್ನು ಉಜ್ಜುವುದು. ಶೇ. ೧೦ ಸುಣ್ಣದ ದ್ರಾವಣ ಬಳಸಿ ಮುಖ್ಯ ಕಾಂಡ ಮತ್ತು ದಪ್ಪ ಪ್ರಾಥಮಿಕಗಳ ರೆಕ್ಕೆಗಳಿಗೆ ಲೇಪನ ಮಾಡುವುದು. ಬಿಳಿ ಕಾಂಡ ಕೊರಕ ಬಾಧಿತ ಗಿಡಗಳ ಕಾಂಡವನ್ನು ನೇಯ್ಗೆ ಮಾಡದ ಬಟ್ಟೆಯಿಂದ ಸುತ್ತುವುದು. ಫೆರೋಮೋನ್ ಟ್ರಾಪುಗಳನ್ನು ಬಳಸುವುದು.

ಕಾಫಿ ಕಾಯಿ ಕೊರಕ: ಕೊಯ್ಲು ಮಾಡುವಾಗ ಹನಕಲು ತಪ್ಪಿಸಲು ಚಾಪೆಗಳನ್ನು ಬಳಸುವುದು. ಹನಕಲು ಸಂಗ್ರಹಿಸಲು ಮತ್ತು ಮಣ್ಣಿನಲ್ಲಿ ಹೂಳುವುದು. ಬ್ರೋಕಾ ಟ್ರಾಪುಗಳನ್ನು ಬಳಸುವುದು. ಕಾಫಿ ಬೆಳೆಗಾರರಿಗೆ ರಾಸಾಯನಿಕ ಬಳಕೆ ಅನಿವಾರ್ಯವಾದಲ್ಲಿ, ಕ್ಲೋರೊಪೈರಿಫೋಸ್ ಬದಲಿಗೆ ಪ್ರತಿ ಬ್ಯಾರೆಲ್‌ಗೆ ೪೦೦ ಮಿಲಿ "ಫೆಂಥೋಯೇಟ್ ೫೦ ಇಸಿ" ಅನ್ನು ಬಳಸಬೇಕು. ಹೆಚ್ಚಿನ ಮಾಹಿತಿಗೆ ಹತ್ತಿರದ ಯಾವುದೇ ಕಾಫಿ ಮಂಡಳಿ ಕಚೇರಿಯಲ್ಲಿ ಮಾಹಿತಿ ಪಡೆಯಬಹುದಾಗಿದೆ ಎಂದು ಕಾಫಿ ಮಂಡಳಿ ಉಪ ನಿರ್ದೇಶಕ ಶಿವಕುಮಾರ ಸ್ವಾಮಿ ತಿಳಿಸಿದ್ದಾರೆ.