ಮಡಿಕೇರಿ, ಜು. 23 : ಅಂಗಡಿ ಮಳಿಗೆಗಳಿಗೆ ಕೊರೊನಾ ಸೋಂಕಿತ ವ್ಯಕ್ತಿ ಭೇಟಿ ನೀಡಿದಲ್ಲಿ ಅಂತಹ ಮಳಿಗೆಗಳನ್ನು ಸೋಂಕು ನಿವಾರಣೆ ಗೊಳಿಸುವ ನಿಟ್ಟಿನಲ್ಲಿ ಕನಿಷ್ಟ 24 ರಿಂದ 48 ಗಂಟೆಗಳ ಕಾಲ ಬಂದ್ ಮಾಡಲಾಗು ವುದು ಎಂದು ಜಿಲ್ಲಾಧಿಕಾರಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.ಅಂಗಡಿ ಮಳಿಗೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದವರು ಸೋಂಕಿತರ ಪ್ರಾಥಮಿಕ ಸಂಪರ್ಕಗಳಾಗಿರುವುದರಿಂದ ಅಂದಿನಿಂದಲೇ ಗೃಹ ಸಂಪರ್ಕ ತಡೆಯಲ್ಲಿ ಇರತಕ್ಕದ್ದು. ಅವರ ಮಾದರಿ ಪರೀಕ್ಷೆಯನ್ನು 10ನೇ ದಿನ ನಡೆಸಲಾಗುವುದು. ಪರೀಕ್ಷಾ ವರದಿ ಬರುವವರೆಗೆ ಕಡ್ಡಾಯವಾಗಿ ಗೃಹ ಸಂಪರ್ಕ ತಡೆಯಲ್ಲಿಯೇ ಇರಬೇಕಾಗಿರುತ್ತದೆ. ಮಳಿಗೆ ನಡೆಸಲು ಪರ್ಯಾಯ ಸಿಬ್ಬಂದಿಗಳಿದ್ದಲಿ ಮಳಿಗೆಯನ್ನು ಸೋಂಕು ನಿವಾರಣೆ ಗೊಳಿಸಿದ ನಂತರ ಕಾರ್ಯಾಚರಿಸಲು ಅವಕಾಶ ನೀಡಲಾಗುವುದು.

ಅಂಗಡಿ ಮಳಿಗೆಗಳಲ್ಲಿ ಕರ್ತವ್ಯ ನಿರ್ವಹಿಸುವವರಿಗೆ ಸೋಂಕು ದೃಢಪಟ್ಟಿದ್ದಲ್ಲಿ ಅಥವಾ ಅವರು ಸೋಂಕಿತರ ಪ್ರಾಥಮಿಕ ಸಂಪರ್ಕಗಳಾಗಿದ್ದಲ್ಲಿ ಮಳಿಗೆ ನಡೆಸಲು ಪರ್ಯಾಯ ಸಿಬ್ಬಂದಿಗಳ ಲಭ್ಯತೆ ಇರದಿದ್ದಲ್ಲಿ ಅಂತಹ ಮಳಿಗೆಯನ್ನು ನಿಯಮಾನುಸಾರ 14 ದಿನಗಳ ಕಾಲ ಬಂದ್ ಮಾಡುವುದು.

ವ್ಯಕ್ತಿಗೆ ಕೋವಿಡ್-19 ಸೋಂಕು ದೃಢಪಟ್ಟಲ್ಲಿ, ಆ ವ್ಯಕ್ತಿಯ ಪ್ರಾಥಮಿಕ ಸಂಪರ್ಕದ ವ್ಯಕ್ತಿಗಳನ್ನು ಪತ್ತೆಹಚ್ಚಲು ಮತ್ತು ನಿಯಮಾನುಸಾರ ಮಾದರಿ ಸಂಗ್ರಹಿಸಿ ಪರೀಕ್ಷೆ ಮಾಡುವ ನಿಟ್ಟಿನಲ್ಲಿ ಸೋಂಕಿತ ವ್ಯಕ್ತಿ ವಾಸವಿದ್ದ ಪ್ರದೇಶವನ್ನು 14 ದಿನಗಳ ಕಾಲ ಸೀಲ್ ಡೌನ್ ಮಾಡಲಾಗುತ್ತದೆ. ಈ ಅವಧಿಯಲ್ಲಿ ಆ ಪ್ರದೇಶದಲ್ಲಿ ಹೊಸ ಪ್ರಕರಣ ವರದಿಯಾದಲ್ಲಿ ಕೊನೆಯ ಪ್ರಕರಣ ವರದಿಯಾದಲ್ಲಿಂದ 14 ದಿನಗಳ ಕಾಲ ಸೀಲ್‍ಡೌನ್ ಚಾಲ್ತಿಯಲ್ಲಿರುತ್ತದೆ.

ಆಸ್ಪತ್ರೆಯ ವೈದ್ಯಾಧಿಕಾರಿ / ಸಹಾಯಕ ಸಿಬ್ಬಂದಿಗಳಿಗೆ ಸೋಂಕು ದೃಢಪಟ್ಟಲ್ಲಿ, ಅವರನ್ನು 10 ದಿನಗಳ ಕಾಲ ಹೋಂ ಐಸೋಲೇಷನ್‍ನಲ್ಲಿ ಇರಿಸಲಾಗುವುದು ಮತ್ತು ಆಸ್ಪತ್ರೆಯನ್ನು ಸೋಂಕು ನಿವಾರಣೆಗೊಳಿಸಿ ಬದಲಿ ವೈದ್ಯಾಧಿಕಾರಿಗಳು ಲಭ್ಯರಿದ್ದಲ್ಲಿ ಅವರ ಮುಖಾಂತರ ಆಸ್ಪತ್ರೆಯನ್ನು 24 ರಿಂದ 48 ಗಂಟೆಗಳ ಒಳಗಾಗಿ ಮರು ಆರಂಭಿಸಲಾಗುವುದು.