ಕುಶಾಲನಗರ, ಏ. 1: ಡಾ.ಶಿವಕುಮಾರ ಸ್ವಾಮೀಜಿಯವರ 113ನೇ ವರ್ಷದ ಜನ್ಮದಿನಾಚರಣೆ ಕೊಡಗು ಜಿಲ್ಲಾ ವಚನ ಸಾಹಿತ್ಯ ಪರಿಷತ್ತು ವತಿಯಿಂದ ಚಿಕ್ಕಹೊಸೂರು ಗ್ರಾಮದ ಶ್ರೀ ಬಸವೇಶ್ವರ ದೇವಾಲಯದ ಆವರಣದಲ್ಲಿ ನಡೆಸಲಾಯಿತು. ವೀರಶೈವ ಸಮಾಜದ ಕೊಡಗು ಜಿಲ್ಲಾಧ್ಯಕ್ಷ ಎಚ್.ವಿ.ಶಿವಪ್ಪ, ವಚನ ಸಾಹಿತ್ಯ ಪರಿಷತ್ತಿನ ಜಿಲ್ಲಾಧ್ಯಕ್ಷ ಕೆ.ಎಸ್.ಮೂರ್ತಿ, ವಕೀಲ ಸಿ.ಎಸ್.ಮಂಜುನಾಥ್, ಜಯಣ್ಣ, ಪುಟ್ಟಸ್ವಾಮಿ, ಮಂಜು, ಸೋಮಣ್ಣ, ಮಲ್ಲಿಕಾರ್ಜುನ, ಅರುಣ, ಯೋಗಾ ನಂದ, ಅರ್ಚಕ ದೀಕ್ಷಿತ್ ಇದ್ದರು.

ಗುಡ್ಡೆಹೊಸೂರು: ಇಲ್ಲಿನ ಡಾ. ಶಿವಕುಮಾರ ಸ್ವಾಮೀಜಿಯವರ ವೃತ್ತದಲ್ಲಿ ಸ್ವಾಮೀಜಿಯವರ ಭಾವಚಿತ್ರಕ್ಕೆ ಪೂಜೆ ನಡೆಸಲಾಯಿತು. ನಡೆದಾಡುವ ದೇವರು ಎಂದು ಪ್ರಖ್ಯಾತಿ ಪಡೆದಿದ್ದ ಮತ್ತು ಅನ್ನದಾಸೋಹಿ, ಅಕ್ಷರದಾಸೋಹಿ ಸಿದ್ಧಗಂಗಾಮಠದ ಸ್ವಾಮಿಗಳ ಹುಟ್ಟುಹಬ್ಬದ ದಿನ ಜಿಲ್ಲೆಯಲ್ಲಿ ಸೆಕ್ಷನ್ 144 ಇದ್ದು ಗ್ರಾಮ ಲಾಕ್‍ಡೌನ್ ಆಗಿದೆ. ಆದರೂ ಗ್ರಾಮದ ಇಬ್ಬರಿಂದ ಸರಳ ಪೂಜೆಯನ್ನು ಸರ್ವರ ಆರೋಗ್ಯ ದೃಷ್ಟಿಯಿಂದ ನಾಡಿನ ಜನತೆಯ ಪರವಾಗಿ ಗ್ರಾಮಸ್ಥರಾದ ಶುಭಶೇಖರ್, ಮುಳ್ಳುಸೋಗೆಯ ಮಹೇಂದ್ರ ಅವರಿಂದ ನೆರವೇರಿಸಲಾಯಿತು. ಅವರ 113ನೇ ವರ್ಷದ ಹುಟ್ಟುಹಬ್ಬದ ಸಂದರ್ಭ ಈ ಪೂಜೆಯನ್ನು ನಡೆಸಲಾಯಿತು.

ಶನಿವಾರಸಂತೆ: ಕೊರೊನಾ ವೈರಸ್ ಹರಡುವಿಕೆಯ ಹಿನ್ನೆಲೆಯಲ್ಲಿ ಸಿದ್ಧಗಂಗಾಶ್ರೀಗಳ 113 ನೇ ಜಯಂತಿಯನ್ನ ಕಿರಿಕೊಡಲಿ ಮಠದಲ್ಲಿ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸುವುದರ ಮೂಲಕ ಸರಳವಾಗಿ ಆಚರಿಸಲಾಯಿತು.