ಗೋಣಿಕೊಪ್ಪಲು, ಏ. 1: ದೇಶದೆಲ್ಲೆಡೆ ಕೊರೊನಾ ವೈರಸ್ ಭೀತಿಯ ಹಿನ್ನೆಲೆಯಲ್ಲಿ ರೈತ ತನ್ನ ಮನೆಯನ್ನು ಬಿಟ್ಟು ಹೊರಬಾರದ ಪರಿಸ್ಥಿತಿಯಲ್ಲಿ ಸಿಲುಕಿದ್ದಾನೆ. ಇದರಿಂದಾಗಿ ಭತ್ತ ಖರೀದಿ ಕೇಂದ್ರಗಳಲ್ಲಿ ತಾನು ಇಟ್ಟಿರುವ ಬೆಳೆಗೆ ಹಣ ಬಿಡುಗಡೆ ಮಾಡುವಂತೆ ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆಯ ಕೊಡಗು ಜಿಲ್ಲಾ ಘಟಕದ ಜಿಲ್ಲಾಧ್ಯಕ್ಷ ಕಾಡ್ಯಮಾಡ ಮನುಸೋಮಯ್ಯ ಜಿಲ್ಲಾಡಳಿತ ವನ್ನು ಆಗ್ರಹಿಸಿದ್ದಾರೆ.

ರೈತ ತಾನು ಬೆಳೆದ ಭತ್ತದ ಬೆಳೆಯನ್ನು ಸರಕಾರದ ಭತ್ತ ಕೇಂದ್ರ ದಲ್ಲಿ ಜಮಾ ಮಾಡಿ ಈಗಾಗಲೇ ಹಲವು ಸಮಯ ಕಳೆದಿದೆ.ಆದರೆ ಭತ್ತ ಖರೀದಿಸಿದ ನಂತರ ಸಕಾಲದಲ್ಲಿ ಹಣ ನೀಡಬೇಕಾದ ಸರಕಾರ ಇನ್ನೂ ಕೂಡಾ ರೈತರ ಬ್ಯಾಂಕ್ ಖಾತೆಗಳಿಗೆ ಹಣ ಜಮಾ ಮಾಡಿಲ್ಲ.ಇದರಿಂದ ರೈತ ಸಂಕಷ್ಟಕ್ಕೆ ಸಿಲುಕಿದ್ದಾನೆ. ರೈತ ಈ ಹಣವನ್ನೆ ನಂಬಿ ಜೀವನ ಸಾಗಿಸುತ್ತಿದ್ದಾನೆ.ಆದರೆ ಇನ್ನೂ ಕೂಡಾ ತಾನು ಭತ್ತ ಖರೀದಿ ಕೇಂದ್ರಕ್ಕೆ ನೀಡಿದ ಭತ್ತ ಬೆಳೆಗೆ ಹಣ ಸಿಕ್ಕಿಲ್ಲ.ಕೂಡಲೇ ಜಿಲ್ಲಾಡಳಿತ ರೈತರ ಬ್ಯಾಂಕ್ ಖಾತೆಗಳಿಗೆ ಹಣ ಜಮಾ ಮಾಡುವಂತೆ ಒತ್ತಾಯಿಸಿದ್ದಾರೆ.