ಪೆರಾಜೆ, ಏ. 1: ಸಂಪಾಜೆ ಹೋಬಳಿ ನೋಡೆಲ್ ಅಧಿಕಾರಿಗಳು ಕೊಡಗು ಕೇರಳ ಅಂತರ್ ರಾಜ್ಯ ಸಂಪರ್ಕದ ಪೆರಾಜೆ ಕೂರ್ನಡ್ಕ ರಸ್ತೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಕೇರಳ ರಾಜ್ಯದಲ್ಲಿ ಕೊರೊನಾ ಸೋಂಕು ಹೆಚ್ಚಾದ ಪರಿಣಾಮ ಕೇರಳದಿಂದ ಕೊಡಗಿನ ಪೆರಾಜೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಸಂಪರ್ಕ ಕಲ್ಪಿಸುವ ಮೂರು ರಸ್ತೆಗಳನ್ನು ಮಣ್ಣು ಹಾಕಿ ಸಂಪೂರ್ಣ ಬಂದ್ ಮಾಡಲಾಗಿತ್ತು. ಈ ಹಿನ್ನೆಲೆ ನೋಡೆಲ್ ಅಧಿಕಾರಿಗಳು ಭೇಟಿ ನೀಡಿ ತಪಾಸಣೆ ಮಾಡಿದರು. ಈ ಸಂದರ್ಭ ಸಂಪಾಜೆ ಹೋಬಳಿ ಶಿರಸ್ತೇದಾರ ಸದಾನಂದ ಮೂಲೆಮಜಲು, ಪಂಚಾಯಿತಿ ಸದಸ್ಯರಾದ ಉದಯಚಂದ್ರ ಕುಂಬಳಚೇರಿ, ಪ್ರಕಾಶ್ ದೊಡ್ಡಡ್ಕ ಇದ್ದರು.