ವೀರಾಜಪೇಟೆ, ಮಾ. 31: ಅನೇಕ ತಿಂಗಳುಗಳ ಹಿಂದೆ ಕರ್ನಾಟಕದಿಂದ ಕೂಲಿ ಕೆಲಸವನ್ನು ಅರಸಿ ಕೇರಳಕ್ಕೆ ವಲಸೆ ಹೋಗಿದ್ದ ಕರ್ನಾಟಕದ ಕಾರ್ಮಿಕರನ್ನು ಕೊರೊನಾ ವೈರಸ್ ಹರಡುತ್ತಿರುವ ಹಿನ್ನೆಲೆಯಲ್ಲಿ ಎಲ್ಲ ವಲಸೆ ಕಾರ್ಮಿಕರಿಗೆ ತವರಿಗೆ ತೆರಳಲು ಕೇರಳ ಗೇಟ್ ಪಾಸ್ ನೀಡುತ್ತಿದೆ. ಕಳೆದ ಏಳು ದಿನಗಳ ಅವಧಿಯಲ್ಲಿ ಕೇರಳದ ವಿವಿಧೆಡೆಗಳಲ್ಲಿ ಕೆಲಸ ಮಾಡಿಕೊಂಡಿದ್ದ ಸುಮಾರು 234 ಮಂದಿಯನ್ನು ಮಾಕುಟ್ಟ ಗಡಿಯ ಮಾರ್ಗವಾಗಿ ಕರ್ನಾಟಕಕ್ಕೆ ಕಳಿಸಲಾಗಿದೆ.ಈಗ 5 ದಿನಗಳ ಹಿಂದೆ ಕೇರಳದ ತಲಚೇರಿ, ಕಣ್ಣನೂರು ಸೇರಿದಂತೆ ವಿವಿಧೆಡೆಗಳಿಂದ ಸುಮಾರು 133 ಮಂದಿ ಕಾರ್ಮಿಕರು, ಮಹಿಳೆಯರು ಕಾಲ್ನಡಿಗೆಯಲ್ಲಿಯೇ ಮಾಕುಟ್ಟದ ಚೆಕ್ ಪೋಸ್ಟ್ ಮಾರ್ಗವಾಗಿ ಪೆರುಂಬಾಡಿಗೆ ತಲುಪಿದ್ದಾರೆ. ಈ ಕಾರ್ಮಿಕರುಗಳಿಗೆ ತಾಲೂಕು ಆಡಳಿತ ತರ್ಮಲ್ ಸ್ಕ್ರೀನ್‍ನ ಮೊದಲ ತಪಾಸಣೆ ಮಾಡಿ ನಂತರ ಆರ್ಜಿ ಗ್ರಾಮದ ಮೊರಾರ್ಜಿ ವಸತಿ ಶಾಲೆ ಹಾಗೂ ಬಾಳುಗೋಡಿನ ಏಕಲವ್ಯ ಶಾಲೆಯ ನಿಗಾ ಘಟಕದಲ್ಲಿರಿಸಲಾಗಿತ್ತು. ಇವರ ನಂತರ ಕಾಲ್ನಡಿಗೆಯಲ್ಲಿ ಬಂದ ಇನ್ನು 23 ಮಂದಿಯನ್ನು ತಪಾಸಣೆಗೊಳಪಡಿಸಿ ನಿಗಾ ಘಟಕಕ್ಕೆ ಸ್ಥಳಾಂತರಿಸಲಾಗಿತ್ತು.ರಾಯಚೂರು, ಗುಲ್ಬರ್ಗ, ಗದಗ, ಹಾವೇರಿ, ಕೊಪ್ಪಳ, ಉತ್ತರ ಕನ್ನಡ, ಶಿವಮೊಗ್ಗ ಹಾಗೂ ದಾವಣಗೆರೆ ಯಿಂದ ಈ ಕಾರ್ಮಿಕರು ಕೇರಳಕ್ಕೆ ವಲಸೆ ಹೋಗಿದ್ದರೆಂದು ಅಧಿಕಾರಿಗಳ ತನಿಖೆಯಿಂದ ತಿಳಿದು ಬಂದುದರಿಂದ ಎಲ್ಲರಿಗೂ ತಪಾಸಣೆ ಮುಂದುವರೆಸ ಲಾಗಿತ್ತು. ತಾ. 29ರಂದು ಈ ಕಾರ್ಮಿಕರ ತವರು ಮನೆ ವಿಭಾಗದ ಸಂಬಂಧಿಸಿದ ಶಾಸಕರು ಪೊಲೀಸರೊಂದಿಗೆ ಪ್ರಯಾಣದ ಪಾಸು ಕೊಟ್ಟು ಪೆರುಂಬಾಡಿಗೆ ವಾಹನಗಳ ಸಮೇತ ಕಳಿಸಿದ್ದರಿಂದ ಒಟ್ಟು 156 ಮಂದಿಯನ್ನು ಕಾರ್ಮಿಕರ ಸ್ವ ಇಚ್ಚೆಯಂತೆ

(ಮೊದಲ ಪುಟದಿಂದ) ತವರು ಮನೆಗೆ ಕಳಿಸಲಾಗಿದೆ. 156 ಮಂದಿ ಕಾರ್ಮಿಕರುಗಳನ್ನು ಪೆರುಂಬಾಡಿಯಿಂದ ತವರು ಮನೆಗೆ ಕಳಿಸಿದ ಬೆನ್ನಲ್ಲೇ ಕೇರಳ ರಾಜ್ಯದಿಂದ ಅದೇ ದಿನ ಸಂಜೆ ಇನ್ನು ಸುಮಾರು 78 ಕಾರ್ಮಿಕರುಗಳನ್ನು ಕೇರಳ ಸರಕಾರ ವಾಹನಗಳ ಮೂಲಕ ಕರೆ ತಂದು ಮಾಕುಟ್ಟದ ಗೇಟ್‍ನ ಬಳಿ ಬಿಡಲಾಗಿದೆ. ಈ ಸಂಬಂಧ ತಾಲೂಕು ಆಡಳಿತಕ್ಕೆ ದೊರೆತ ಸಂದೇಶದ ನಂತರ ಈ ಎಲ್ಲರನ್ನು ಸರಕಾರಿ ವಾಹನಗಳಲ್ಲಿ ವೀರಾಜಪೇಟೆಗೆ ಸಾಗಿಸಿ 13 ಮಂದಿಯನ್ನು ಇಲ್ಲಿನ ಛತ್ರಕೆರೆ ಬಳಿಯಿರುವ ಬಿ.ಸಿ.ಎಂ. ಹಾಸ್ಟೆಲ್‍ನಲ್ಲಿ ಹಾಗೂ ಉಳಿದ 65 ಮಂದಿಯನ್ನು ಮೊರಾರ್ಜಿ ದೇಸಾಯಿ ಹಾಗೂ ಏಕಲವ್ಯ ವಸತಿ ಶಾಲೆಯಲ್ಲಿ ಕ್ವಾರಂಟೈನ್‍ನಲ್ಲಿರಿಸಲಾಗಿದೆ. ಎಲ್ಲರಿಗೂ ಮೊದಲು ತರ್ಮಲ್ ಸ್ಕ್ರೀನ್ ಮಾಡಿ ನಂತರ ನಿಗಾ ಘಟಕಕ್ಕೆ ಸ್ಥಳಾಂತರಿಸಲಾಗಿದೆ.

ರಾಜ್ಯದ ಮುಖ್ಯ ಕಾರ್ಯದರ್ಶಿಯ ಆದೇಶದಂತೆ ಈ 78 ಮಂದಿಯನ್ನು ತಪಾಸಣೆಗೊಳಪಡಿಸಿ 14 ದಿನಗಳ ನಿಗಾ ಘಟಕದ ನಂತರ ಅವರುಗಳನ್ನು ತವರು ಮನೆಗೆ ಕಳಿಸುವಂತೆ ಸೂಚಿಸಲಾಗಿದೆ ಎಂದು ತಾಲೂಕು ತಹಶೀಲ್ದಾರ್ ನಂದೀಶ್ ತಿಳಿಸಿದರು.

ಕೊಡಗು ಕೇರಳದ ಗಡಿಗೆ ಒತ್ತಾಗಿರುವ ಇನ್ನು 100ಮಂದಿಗೂ ಅಧಿಕ ಕಾರ್ಮಿಕರುಗಳು ಕೇರಳದಲ್ಲಿಯೇ ಇದ್ದು ಇವರುಗಳನ್ನು ಕೇರಳ ಸರಕಾರ ಕರ್ನಾಟಕದ ಗಡಿ ಭಾಗದ ಗೇಟ್‍ಗೆ ಕಳುಹಿಸುವ ವ್ಯವಸ್ಥೆಯಲ್ಲಿದೆ. ಈ ಕಾರ್ಮಿಕರಿಗೂ ತಪಾಸಣೆ ಮಾಡಿ ಮುಂದಿನ ಕ್ರಮ ಕೈಗೊಳ್ಳುವುದಾಗಿ ತಹಶೀಲ್ದಾರ್ ನಂದೀಶ್ ತಿಳಿಸಿದ್ದಾರೆ.