ಮಡಿಕೇರಿ, ಅ. 10: ಐ ಸೈಕಲ್ ಸೊಲೂಷನ್ಸ್ ಪ್ರೈವೇಟ್ ಲಿಮಿಟೆಡ್ ಮತ್ತು ಗ್ರೀನ್ ಸಿಟಿ ಫೋರಂ ವತಿಯಿಂದ ಗ್ರೇಟ್ ಮಲೆನಾಡ್ ಚಾಲೆಂಜ್‍ನ ‘ಪರಿಸರ ಸ್ನೇಹಿ ಪ್ರವಾಸೋದ್ಯಮ’ದ 10ನೇ ಆವೃತ್ತಿಯ ಸೈಕಲ್ ಜಾಗೃತಿ ಜಾಥಾಕ್ಕೆ ತಾ. 12 ರಂದು ನಗರದಲ್ಲಿ ಚಾಲನೆ ದೊರೆಯಲಿದೆ.

ಈ ಬಗ್ಗೆ ಪತ್ರಿಕಾ ಹೇಳಿಕೆ ನೀಡಿರುವ ಗ್ರೀನ್ ಸಿಟಿ ಫೋರಂ ಅಧ್ಯಕ್ಷ ಕುಕ್ಕೇರ ಜಯಾಚಿಣ್ಣಪ್ಪ ಅವರು ಸುಮಾರು 40 ಸೈಕಲ್‍ಗಳ ಮೂಲಕ 500 ಕಿ.ಮೀ ದೂರ ಜಾಥಾ ಸಾಗಲಿದೆ ಎಂದು ತಿಳಿಸಿದ್ದಾರೆ.

ಶನಿವಾರ ಬೆಳಗ್ಗೆ 7 ಗಂಟೆಗೆ ನಗರದ ಸಂಪಿಗೆಕಟ್ಟೆಯ ವೃಂದಾವನ್ ಕೂರ್ಗ್ ರೆಸಾರ್ಟ್‍ನಲ್ಲಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಡಾ.ಸುಮನ್ ಡಿ.ಪನ್ನೇಕರ್ ಅವರು ಜಾಥಾಕ್ಕೆ ಚಾಲನೆ ನೀಡಲಿದ್ದಾರೆ. ನಗರಸಭಾ ಪೌರಾಯುಕ್ತ ಎಂ.ಎಲ್. ರಮೇಶ್ ಅವರು ಮುಖ್ಯ ಅತಿಥಿಗಳಾಗಿ ಪಾಲ್ಗೊಳ್ಳಲಿದ್ದಾರೆ.

ಪ್ರವಾಸೋದ್ಯಮದೊಂದಿಗೆ ಪರಿಸರವನ್ನೂ ಸಂರಕ್ಷಿಸಬೇಕೆನ್ನುವ ಉದ್ದೇಶದಿಂದ ಮಲೆನಾಡು ಪ್ರದೇಶದ ಪ್ರತಿ ಊರಿನಲ್ಲಿ ಐ ಸೈಕಲ್‍ನ ಸ್ವಯಂ ಸೇವಕರು ಜಾಥಾದ ಮೂಲಕ ಪರಿಸರ ಜಾಗೃತಿ ಮೂಡಿಸಲಿದ್ದಾರೆ. ಜಾಥಾ ತಾ. 18 ರಂದು ಕುಂದಾಪುರದಲ್ಲಿ ಸಮಾರೋಪಗೊಳ್ಳಲಿದೆ ಎಂದು ಜಯಾಚಿಣ್ಣಪ್ಪ ತಿಳಿಸಿದ್ದಾರೆ.