ಮಡಿಕೇರಿ, ಅ.10 : ಮಡಿಕೇರಿ ದಸರಾ ಮಹೋತ್ಸವದ ಕೊನೆಯ ದಿನ ನಡೆದ ದಶಮಂಟಪಗಳ ಶೋಭಾಯಾತ್ರೆಯಲ್ಲಿ ನಿಯಮ ಉಲ್ಲಂಘಿಸಿದ ಮಂಟಪಗಳಿಗೂ ಬಹುಮಾನ ನೀಡಲಾಗಿದೆ ಎಂದು ಆರೋಪಿಸಿರುವ ಮಡಿಕೇರಿ ಶೋಮ್ಯಾನ್ ಕ್ರಿಯೇಷನ್ಸ್ ಪ್ರಮುಖರು, ತೀರ್ಪಿನ ವಿರುದ್ಧ ನ್ಯಾಯಾಲಯದ ಮೊರೆ ಹೋಗುವದಾಗಿ ತಿಳಿಸಿದ್ದಾರೆ.ಸುದ್ದಿಗೋಷ್ಠಿಯಲ್ಲಿ ಸಂಸ್ಥೆಯ ಪ್ರಮುಖ ಎಂ.ವಿ.ನವೀನ್ ಹಾಗೂ ಎಂ.ಜೆ. ಸಂದೀಪ್ ಅವರು ಮಾತನಾಡಿ, ತಾವು ನಿರ್ಮಿಸಿದ ಶ್ರೀ ಕಂಚಿಕಾಮಾಕ್ಷಿಯಮ್ಮ ದೇವಾಲಯದ ಮಂಟಪವನ್ನು ಪೂರ್ವ ಸೂಚನೆಯಂತೆ ನಿಗದಿತ ಅವಧಿಯಲ್ಲಿ ಚಾಲನೆ ಮಾಡಿದ್ದೇವೆ. ಆದರೆ, ಕನಿಷ್ಟ ಐದು ಅಡಿಯಷ್ಟು ಚಾಲನೆ ದೊರಕದ ಮಂಟಪಕ್ಕೆ ಬಹುಮಾನವನ್ನು ನೀಡಲಾಗಿದೆ. ತಮ್ಮ ಮಂಟಪದ ತೀರ್ಪುಗಾರಿಕೆಗೆ ನೀಡಿದ್ದ ರಾತ್ರಿ 11.45 ಗಂಟೆಗೂ ಮುನ್ನವೆ ತೀರ್ಪುಗಾರರು ಸ್ಥಳಕ್ಕೆ ಬಂದು ಗಡಿಬಿಡಿ ಮಾಡಿರು ವದಲ್ಲದೆ, ಸಮಯ ಪಾಲಿಸದಿದ್ದರೆ ಹತ್ತು ಅಂಕ ಕಡಿಮೆ ಮಾಡುವದಾಗಿ ಹೇಳಿದ್ದರು. ಆದರೆ, ಸಮಯ ಪಾಲಿಸದೆ ಇದ್ದ ಮಂಟಪಗಳಿಗೆ ಬಹುಮಾನವನ್ನು ನೀಡಲಾಗಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.
ಮೆರವಣಿಗೆಯಲ್ಲಿ ಮೊದಲ ಸ್ಥಾನ ಪಡೆದ ಮಂಟಪ ನಿಗದಿತ ಸಮಯಕ್ಕೆ ಪ್ರದರ್ಶನ ನೀಡಿಲ್ಲವಾದರೂ ಅದಕ್ಕೆ ಬಹುಮಾನ ನೀಡಿದ್ದಾರೆ. ತೀರ್ಪು ನೀಡುವ ಸಂದರ್ಭ ನಿಯಮಗಳನ್ನು ಮೀರಿರುವದರಿಂದ ನ್ಯಾಯಾಲಯದ ಮೊರೆ ಹೋಗುತ್ತಿರುವದಾಗಿ ತಿಳಿಸಿದರು.
ಮಡಿಕೇರಿ ದಸರಾ ಜನೋತ್ಸವದ ದಶಮಂಟಪಗಳ ಶೋಭಾಯಾತ್ರೆಯ ತೀರ್ಪಿನ ಬಗ್ಗೆ ಶ್ರೀ ಕಂಚಿ ಕಾಮಾಕ್ಷಿ ದಶಮಂಟಪ ಸಮಿತಿ ಗೌರವಾಧ್ಯಕ್ಷ ಕೆ.ಟಿ.ಪ್ರಶಾಂತ್ ಕೂಡ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು.
ಮಡಿಕೇರಿ ದಸರಾ ಜನೋತ್ಸವದ ಮಂಟಪಗಳ ತೀರ್ಪಿನ ವಿಚಾರದಲ್ಲಿ ರಾಜಕೀಯ ನುಸುಳುತ್ತಿರುವದಾಗಿ ಟೀಕಿಸಿದರು. ದಶಮಂಟಪಗಳ ಮೆರವಣಿಗೆಗೂ ಮೊದಲೇ ತೀರ್ಪು ನಿಗದಿಯಾಗಿರುವ ಬಗ್ಗೆ ಶಂಕೆ ಇದೆ. ತಮ್ಮ ಮಂಟಪಕ್ಕೆ ಆಗಿರುವ ಅನ್ಯಾಯವನ್ನು ನ್ಯಾಯಾಲಯದಲ್ಲಿ ಪ್ರಶ್ನಿಸುವದಾಗಿ ಹೇಳಿದರು.
ದಶಮಂಟಪ ಸಮಿತಿಯ ಅಧ್ಯಕ್ಷ ಸ್ಥಾನ ಈ ಬಾರಿ ದಂಡಿನ ಮಾರಿಯಮ್ಮ
(ಮೊದಲ ಪುಟದಿಂದ) ದೇಗುಲದ ಮಂಟಪ ಸಮಿತಿಗೆ ದೊರಕಿದೆ. ಅವರು ಮಂಟಪಗಳ ಮೆರವಣಿಗೆಯ ತೀರ್ಪುಗಾರರನ್ನು ಆಯ್ಕೆ ಮಾಡುತ್ತಾರೆಯೇ ಹೊರತು ಇದು ಎಲ್ಲಾ ಮಂಟಪಗಳ ಸಾಮೂಹಿಕವಾದ ಆಯ್ಕೆಯಲ್ಲ. ಹೀಗೆ ಆಯ್ಕೆ ಮಾಡಿದ ನಾಲ್ವರು ತೀರ್ಪುಗಾರರ ಮಾಹಿತಿಯನ್ನು ವಿಜಯ ದಶಮಿಯ ಸಂಜೆಯ ವೇಳೆಯಷ್ಟೆ ನಮಗೆ ತಿಳಿಸಲಾಗಿದೆ ಎಂದು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು.
ಮಂಟಪಗಳ ತೀರ್ಪಿನ ಸಂದರ್ಭ ಕಥಾ ಸಾರಾಂಶ, ಚಲನವಲನ, ವಿದ್ಯುತ್ ಅಲಂಕಾರ ಮೊದಲಾದ ವಿಭಾಗಗಳಲ್ಲಿ ಪ್ರತ್ಯೇಕ ಪ್ರತ್ಯೇಕವಾಗಿ ಅಂಕಗಳನ್ನು ನೀಡಿ ಬಳಿಕ ಅಂತಿಮ ನಿರ್ಣಯ ಕೈಗೊಳ್ಳಲಾಗುತ್ತದೆ. ಆದರೆ, ಈ ಬಾರಿ ಒಟ್ಟಾಗಿ ಅಂಕವನ್ನು ನೀಡಲಾಗಿದ್ದು, ಇದನ್ನು ಅರ್ಥೈಸಿಕೊಳ್ಳುವದು ಹೇಗೆಂದು ಪ್ರಶ್ನಿಸಿದರು. ವರ್ಷಂಪ್ರತಿ ತೀರ್ಪುಗಾರರು ನೀಡುವ ಅಂಕಗಳ ಚೀಟಿಯನ್ನು ದಸರಾ ವೇದಿಕೆಯಲ್ಲಿ ತೆರೆದು ಮೊದಲ ಮೂರು ಸ್ಥಾನಗಳನ್ನು ನಿರ್ಧರಿಸಲಾಗುತ್ತಿತ್ತು, ಆದರೆ ಈ ಬಾರಿ ಅಂತಹ ಪ್ರಕ್ರಿಯೆ ನಡೆದಿಲ್ಲವೆಂದು ಆರೋಪಿಸಿದರು. ಸುದ್ದಿಗೋಷ್ಠಿಯಲ್ಲಿ ಶೋಮ್ಯಾನ್ ಕ್ರಿಯೇಷನ್ಸ್‍ನ ಸಂಕೇತ್ ಉಪಸ್ಥಿತರಿದ್ದರು.