ಮಡಿಕೇರಿ, ಜು. 15: ಭವಿಷ್ಯದ ಪೀಳಿಗೆಗೆ ಅತ್ಯುತ್ತಮ ಸಮಾಜ ನೀಡುವ ನಿಟ್ಟಿನಲ್ಲಿ ಮಹಿಳೆಯರ ಪಾತ್ರ ಅತ್ಯಂತ ಮಹತ್ವದ್ದು ಎಂದು ಇನ್ನರ್ ವೀಲ್ ಜಿಲ್ಲೆ 318 ನ ಖಜಾಂಚಿ ಪೂರ್ಣಿಮಾ ರವಿ ಅಭಿಪ್ರಾಯಪಟ್ಟಿದ್ದಾರೆ.

ಮಡಿಕೇರಿ ಇನ್ನರ್ ವೀಲ್‍ನ ನೂತನ ಅಧ್ಯಕ್ಷೆಯಾಗಿ ನಿಶಾ ಮೋಹನ್ ಮತ್ತು ಕಾರ್ಯದರ್ಶಿಯಾಗಿ ಶಫಾಲಿ ರೈ ಅವರಿಗೆ ಪದಗ್ರಹಣ ನೆರವೇರಿಸಿ ಮಾತನಾಡಿದ ಪೂರ್ಣಿಮಾ ರವಿ, ಈ ವರ್ಷ ಇನ್ನರ್ ವೀಲ್ ಜಿಲ್ಲೆ 318, ಇದೀಗ 50ನೇ ವರ್ಷದ ಸಂಭ್ರಮಾಚರಣೆಯಲ್ಲಿದ್ದು ಪ್ರತಿ ಇನ್ನರ್ ವೀಲ್ ಕ್ಲಬ್‍ಗಳು ಕೂಡ ವಿಶಿಷ್ಟ ಕಾರ್ಯಕ್ರಮ ಆಯೋಜಿಸುವಂತೆ ಕರೆ ನೀಡಿದರು.

ಇನ್ನರ್ ವೀಲ್ ಜಗತ್ತಿನಲ್ಲಿ ಮಹಿಳೆಯರಿರುವ ಅತಿ ದೊಡ್ಡ ಸೇವಾ ಸಂಸ್ಥೆಯಾಗಿದ್ದು ಇನ್ನೂ ಹೆಚ್ಚಿನ ಸದಸ್ಯೆಯರನ್ನು ಸೇರ್ಪಡೆಗೊಳಿಸಿ ಇನ್ನರ್ ವೀಲ್‍ನ್ನು ಬಲಗೊಳಿಸುವಂತೆ ಸೂಚಿಸಿದ ಪೂರ್ಣಿಮಾ ರವಿ, ಮುಂದಿನ ಪೀಳಿಗೆಗೆ ಉತ್ತಮ ಸಮಾಜ ರೂಪಿಸುವ ನಿಟ್ಟಿನಲ್ಲಿ ಮಹಿಳೆಯರ ಪಾತ್ರ ಮುಖ್ಯವಾಗಿದ್ದು ಈ ನಿಟ್ಟಿನಲ್ಲಿ ಇನ್ನರ್ ವೀಲ್ ಕೂಡ ಕಾರ್ಯಕ್ರಮ ಗಳನ್ನು ಆಯೋಜಿಸುವಂತೆ ಹೇಳಿದರು.

ಈ ವರ್ಷ ಮಿರ್ಯಾಕಲ್ ಎಂಬ ಸಂದೇಶದಡಿ ಇನ್ನರ್ ವೀಲ್ ಕಾರ್ಯಕ್ರಮ ರೂಪಿಸಿದ್ದು ಅಂತೆಯೇ ಮಮತಾ ಯೋಜನೆಯಡಿ, ದೇಶದಲ್ಲಿನ ಅನಾಥ ಮಕ್ಕಳನ್ನು ರಕ್ಷಿಸಿ ಅವರಿಗೆ ಸೂಕ್ತ ಆಶ್ರಯ ನೀಡಲಾಗುತ್ತದೆ. ಓರ್ವ ಇನ್ನರ್ ವೀಲ್ ಸದಸ್ಯೆ ಓರ್ವ ಅನಾಥ ಮಗುವಿನ ಪಾಲಕರಾಗುವಂಥ ಯೋಜನೆ ರೂಪಿಸಲಾಗಿದೆ ಎಂದರು. ಮುಂದಿನ ವರ್ಷ ಮಾರ್ಚ್‍ನಲ್ಲಿ ಭಾರತದಲ್ಲಿ ಮೊದಲ ಬಾರಿಗೆ ಇನ್ನರ್ ವೀಲ್‍ನ 18ನೇ ಅಂತರರಾಷ್ಟ್ರೀಯ ಸಮಾವೇಶ ಜೈಪುರದಲ್ಲಿ ಆಯೋಜಿತವಾಗಿರುವದು ಸಂತಸದ ವಿಚಾರ ಎಂದು ಹರ್ಷ ವ್ಯಕ್ತಪಡಿಸಿದ ಪೂರ್ಣಿಮಾ ರವಿ, 1 ಗ್ರಾಮ, ಆ ಗ್ರಾಮದಲ್ಲಿನ 1 ಶಾಲೆ,ಶಾಲೆಯಲ್ಲಿ ವಿದ್ಯಾರ್ಥಿನಿಯರಿಗೆ ಶೌಚಾಲಯ ಸೇರಿದಂತೆ ಅಗತ್ಯ ಸೌಕರ್ಯಗಳನ್ನು ಕಲ್ಪಿಸುವ ನಿಟ್ಟಿನಲ್ಲಿಯೂ ಅಂತರರಾಷ್ಟ್ರೀಯ ಇನ್ನರ್ ವೀಲ್ ನಿಂದ ಯೋಜನೆ ರೂಪುಗೊಂಡಿದೆ ಎಂದರು.

ಹೆಣ್ಣುಮಕ್ಕಳ ಶಿಕ್ಷಣಕ್ಕೂ ಹೆಚ್ಚಿನ ಗಮನ ಹರಿಸಲಾಗಿದ್ದು, ಶಾಲಾ ಪರಿಸರದಲ್ಲಿ ಸ್ವಚ್ಛತೆ, ಸೂಕ್ತ ಶೌಚಾಲಯ, ಉತ್ತಮ ಸಮವಸ್ತ್ರ, ಕುಡಿಯುವ ನೀರಿನ ಅನುಕೂಲತೆಗೆ ಇನ್ನರ್ ವೀಲ್ ಆದ್ಯತೆ ನೀಡಿದೆ ಎಂದು ಮಾಹಿತಿ ನೀಡಿದ ಪೂರ್ಣಿಮಾ ರವಿ, ಸಾರ್ವಜನಿಕರಲ್ಲಿ ಇನ್ನರ್ ವೀಲ್ ಕಾರ್ಯಕ್ರಮಗಳ ಬಗ್ಗೆ ಹೆಚ್ಚಿನ ಅರಿವು ಮೂಡಿಸುವ ನಿಟ್ಟಿನಲ್ಲಿ ಪ್ರತೀ ಯೋಜನೆಗೂ ಇನ್ನರ್ ವೀಲ್‍ನ ಹೆಸರನ್ನು ಬಳಸುವಂತೆಯೂ ಸಲಹೆ ನೀಡಿದರು.

ಕಾರ್ಯಕ್ರಮದಲ್ಲಿ ಮಾತನಾಡಿದ ಮಡಿಕೇರಿ ಇನ್ನರ್ ವೀಲ್ ಸ್ಥಾಪಕಾಧ್ಯಕ್ಷೆ ಡಾ. ಜಯಲಕ್ಷ್ಮಿ ಪಾಟ್ಕರ್, ಕಳೆದ ಸಾಲಿನಲ್ಲಿ ಮಡಿಕೇರಿ ಇನ್ನರ್ ವೀಲ್ ಅಧ್ಯಕ್ಷೆಯಾಗಿ ಲತಾ ಚಂಗಪ್ಪ, ಕಾರ್ಯದರ್ಶಿಯಾಗಿ ಕನ್ನು ದೇವರಾಜ್ ಮತ್ತು ತಂಡ ಅತ್ಯುತ್ತಮವಾಗಿ ಕಾರ್ಯನಿರ್ವಹಿಸಿದೆ ಎಂದು ಶ್ಲಾಘಿಸಿದರಲ್ಲದೇ, ಹಲವಷ್ಟು ಜನಪರ ಸೇವಾ ಕಾರ್ಯಗಳನ್ನು ಮಹಿಳಾ ಸದಸ್ಯೆಯರು ಕೈಗೊಂಡಿದ್ದಾರೆ ಎಂದು ಹರ್ಷ ವ್ಯಕ್ತಪಡಿಸಿದರು.

ಮಡಿಕೇರಿ ಇನ್ನರ್ ವೀಲ್ ನ ನೂತನ ಅಧ್ಯಕ್ಷೆಯಾಗಿ ನಿಶಾ ಮೋಹನ್, ಕಾರ್ಯದರ್ಶಿಯಾಗಿ ಶಫಾಲಿ ರೈ, ಖಚಾಂಚಿಯಾಗಿ ನಮಿತಾ ರೈ, ಉಪಾಧ್ಯಕ್ಷೆಯಾಗಿ ಬೊಳ್ಳು ಮೇದಪ್ಪ, ಜಂಟಿ ಕಾರ್ಯದರ್ಶಿಯಾಗಿ ಡಾ.ರೇಣುಕಾ ಸುಧಾಕರ್, ಅಂತರರಾಷ್ಟ್ರೀಯ ಸೇವಾ ಪ್ರತಿನಿಧಿಯಾಗಿ ವಿಜಯಲಕ್ಷ್ಮಿ ಚೇತನ್, ವಾರ್ತಾ ಪತ್ರ ಸಂಪಾದಕಿಯಾಗಿ ಲಲಿತಾ ರಾಘವನ್, ಶಿಕ್ಷಣ ಮತ್ತು ಮಿಷನ್ ಮಮತಾ ಸಮಿತಿ ಸದಸ್ಯೆ ರೂಪಾಸುಮಂತ್ ಅಧಿಕಾರ ಸ್ವೀಕರಿಸಿದರು.

ಇದೇ ಸಂದರ್ಭ ಜಿಲ್ಲಾ ಇನ್ನರ್ ವೀಲ್‍ಗೆ 50 ವರ್ಷ ತುಂಬಿದ ಸಂಭ್ರಮಕ್ಕಾಗಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡವರಿಗೆ ಸಸಿಗಳನ್ನು ವಿತರಿಸಲಾಯಿತು. ಮಡಿಕೇರಿ ರೋಟರಿ ಅಧ್ಯಕ್ಷ ರತನ್ ತಮ್ಮಯ್ಯ ಕ್ಲಬ್‍ನ ವಾರ್ತಾ ಸಂಚಿಕೆ ಬಿಡುಗಡೆಗೊಳಿಸಿದರು. ಸದಸ್ಯೆಯರಾದ ಲಕ್ಷ್ಮೀ ಈಶ್ವರಭಟ್, ಪ್ರಿಯಾ ಜಗದೀಶ್ ಪ್ರಾರ್ಥಿಸಿ, ಬೊಳ್ಳು ಮೇದಪ್ಪ ವಂದಿಸಿದರು.