ಮಡಿಕೇರಿ, ಮಾ. 27: ಮುಖ್ಯಮಂತ್ರಿ ಕುಮಾರಸ್ವಾಮಿಯವರು ತಾ. 28 ರಂದು (ಇಂದು) ಮಡಿಕೇರಿಗೆ ಆಗಮಿಸಲಿದ್ದಾರೆಯೇ ಅಥವಾ ಇಲ್ಲವೇ ಎಂಬ ಬಗ್ಗೆ ಗೊಂದಲ ಸೃಷ್ಟಿಯಾಗಿದೆ.ಜೆಡಿಎಸ್ ಜಿಲ್ಲಾಧ್ಯಕ್ಷ ಕೆ.ಎಂ. ಗಣೇಶ್ ಅವರು ಇತ್ತೀಚೆಗೆ ಸುದ್ದಿಗೋಷ್ಠಿ ನಡೆಸಿ, ಮುಖ್ಯಮಂತ್ರಿಗಳು ತಾ. 28 ರಂದು ಮಡಿಕೇರಿಗೆ ಆಗಮಿಸಲಿದ್ದಾರೆ ಎಂದು ಹೇಳಿಕೆ ನೀಡಿದ್ದರು. ಆದರೆ ಈ ಕುರಿತು ‘ಶಕ್ತಿ’ಯೊಂದಿಗೆ ಪ್ರತಿಕ್ರಿಯಿಸಿರುವ ಜೆಡಿಎಸ್ ನಾಯಕ, ಮಾಜಿ ಸಚಿವ ಜೀವಿಜಯ ಅವರು ಮುಖ್ಯಮಂತ್ರಿಗಳು ಕೊಡಗಿಗೆ ಭೇಟಿ ನೀಡುವದಾದರೆ ತನಗೆ ಅಧಿಕೃತವಾಗಿ ಮಾಹಿತಿ ಲಭ್ಯವಾಗುತ್ತಿತ್ತು. ಆದರೆ ತಾ. 28 ರಂದು (ಇಂದು) ಸಿಎಂ ಆಗಮಿಸುವ ಬಗ್ಗೆ ಯಾವದೇ ಖಚಿತತೆ ಇಲ್ಲ. ಚುನಾವಣಾ ಸಂಬಂಧ ಕುಮಾರಸ್ವಾಮಿಯವರು ‘ಬ್ಯುಸಿ’ಯಾಗಿದ್ದು, ಅವರು ಮಡಿಕೇರಿಗೆ ಭೇಟಿ ನೀಡುವದಿಲ್ಲ ಎಂದು ಹೇಳಿದರು.

(ಮೊದಲ ಪುಟದಿಂದ) ಇದೇ ವಿಚಾರವಾಗಿ ಜೆಡಿಎಸ್ ರಾಜ್ಯ ಉಪಾಧ್ಯಕ್ಷ ಮನೋಜ್ ಬೋಪಯ್ಯ ಅವರು ಕೂಡ ಪ್ರತಿಕ್ರಿಯೆ ನೀಡಿದ್ದು, ಕೆ.ಎಂ. ಗಣೇಶ್ ಅವರು ಸಿಎಂ ಬರುತ್ತಾರೆ ಎಂದು ಹೇಳಿ ಜನರನ್ನು ದಾರಿ ತಪ್ಪಿಸುವ ಕೆಲಸ ಮಾಡಿದ್ದಾರೆ. ಸಿಎಂ ಬರುವದಿಲ್ಲ ಎಂದು ನುಡಿದರು. ಆದರೆ, ಜೆಡಿಎಸ್ ಜಿಲ್ಲಾಧ್ಯಕ್ಷ ಗಣೇಶ್ ಅವರು ಮುಖ್ಯಮಂತ್ರಿ ಕುಮಾರಸ್ವಾಮಿ ಯವರು ತಾ. 28 ರಂದು (ಇಂದು) ಮಡಿಕೇರಿಗೆ ಬರಲಿದ್ದಾರೆ. ಈ ಕುರಿತು ಉಸ್ತುವಾರಿ ಸಚಿವರು ಕೂಡ ಖಚಿತ ಪಡಿಸಿದ್ದಾರೆ ಎಂದು ‘ಶಕ್ತಿ’ಗೆ ತಿಳಿಸಿದ್ದಾರೆ. ಈ ನಡುವೆ ನಗರದ ಬಾಲಭವನದ ಹಿಂಭಾಗ ಸಿಎಂ ಕಾರ್ಯಕ್ರಮಕ್ಕೆ ವೇದಿಕೆಯೂ ಸಿದ್ಧಗೊಂಡಿದೆ ಯಾದರೂ ಸಿಎಂ ಬರುತ್ತಾರೆಯೆ ಎಂಬ ಬಗ್ಗೆ ಗೊಂದಲ ಮಾತ್ರ ಮುಂದುವರಿದಿದೆ.