ಸೋಮವಾರಪೇಟೆ, ಮಾ. 27: ಆಸ್ತಿ ವೈಷಮ್ಯಕ್ಕೆ ಒಂದೇ ಕುಟುಂಬದ ಮೂವರು ಅಮಾನುಷವಾಗಿ ಜೀವತೆತ್ತಿರುವ ಘಟನೆ ತಾಲೂಕಿನ ಆಲೂರು ಸಿದ್ದಾಪುರದಲ್ಲಿ ಇಂದು ನಡೆದಿದೆ.ಆಲೂರು ಸಿದ್ದಾಪುರ ನಿವಾಸಿ, ನಿವೃತ್ತ ಪೊಲೀಸ್ ಸೂದನ ಗಣೇಶ್ (63) ಮತ್ತು ಅವರ ಪತ್ನಿ ಸರೋಜಮ್ಮ (52) ಅವರುಗಳನ್ನು, ಗಣೇಶ್ ಅವರ ಅಣ್ಣ ಬೋಜಪ್ಪ ಅವರ ಪುತ್ರ ದಿಲೀಪ್ ಎಂಬಾತ ಕತ್ತಿಯಿಂದ ಕೊಚ್ಚಿ ಕೊಲೆಗೈದು ಅದೇ ಮನೆಯ ಅಟ್ಟದಲ್ಲಿ ತಾನೂ ಸಹ ನೇಣಿಗೆ ಶರಣಾಗಿದ್ದಾನೆ.

ಸೂದನ ಗಣೇಶ್ ಮತ್ತು ಬೋಜಪ್ಪ ಅವರುಗಳು ಸಹೋದರ ರಾಗಿದ್ದು, ಈ ಹಿಂದಿನಿಂದಲೂ ಆಸ್ತಿ ವಿಚಾರದ ಬಗ್ಗೆ ವೈಷಮ್ಯ ಇತ್ತು ಎನ್ನಲಾಗಿದೆ. ಇಂದು ಸಂಜೆ 6 ಗಂಟೆ ಸುಮಾರಿಗೆ ಗಣೇಶ್ ಅವರ ಮನೆಗೆ ಆಗಮಿಸಿದ ದಿಲೀಪ್ ತನ್ನ ಬಳಿಯಿದ್ದ ಕತ್ತಿಯಿಂದ ದಂಪತಿಗೆ ಯದ್ವಾತದ್ವಾ ಕಡಿದಿದ್ದಾನೆ ಎನ್ನಲಾಗಿದೆ. ಇದೇ ಸಂದರ್ಭ ಮನೆಯಲ್ಲಿದ್ದ ಗಣೇಶ್ ಅವರ ಪುತ್ರ ಹರ್ಷಿತ್ ಬಿಡಿಸಲು ಬಂದಾಗ, ಅವನಿಗೂ ಸಹ ತಲೆ, ಕುತ್ತಿಗೆ ಹಿಂಭಾಗ, ಬೆನ್ನಿಗೆ ಕಡಿದಿದ್ದು ಜೀವನ್ಮರಣ ಸ್ಥಿತಿಗೆ ತಲುಪಿದ್ದಾನೆ. ಗಣೇಶ್ ದಂಪತಿ ಸ್ಥಳದಲ್ಲೇ ಮೃತಪಟ್ಟಿದ್ದು,

ಇಂತಹ ಭೀಭತ್ಸ್ಯ ದೃಶ್ಯ ನಡೆಸಿದ ಆರೋಪಿ ದಿಲೀಪ್ (32) ಅದೇ ಮನೆಯ ಅಟ್ಟಕ್ಕೆ ತೆರಳಿ ನೇಣು ಬಿಗಿದು ಕೊಂಡಿದ್ದಾನೆ. ಗಂಭೀರ ಗಾಯಗೊಂಡಿದ್ದ ಹರ್ಷಿತ್ (23) ಹೊರಬಂದು ಕೂಗಾಟ ನಡೆಸಿದ್ದು, ಸ್ಥಳೀಯರನ್ನು ಸಹಾಯಕ್ಕೆ ಕರೆದಿದ್ದಾನೆ. ಈ ಸಂದರ್ಭ ಕೋಡಿ ಜೀವನ್, ಕಡ್ಯದ ಪಾಪಣ್ಣ, ಕಿರಣ್ ಸೇರಿದಂತೆ ಇತರರು ಗಾಯಾಳು ವನ್ನು ಶನಿವಾರಸಂತೆ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿದ್ದು, ಅಲ್ಲಿ ಪ್ರಾಥಮಿಕ ಚಿಕಿತ್ಸೆ ಕೊಡಿಸಿದ ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಹಾಸನದ ಜನಪ್ರಿಯ ಆಸ್ಪತ್ರೆಗೆ ಸಾಗಿಸಿದ್ದಾರೆ.

ಮೃತ ಗಣೇಶ್ ದಂಪತಿ ಓರ್ವ ಪುತ್ರ ಹಾಗೂ ಓರ್ವ ಪುತ್ರಿಯನ್ನು ಅಗಲಿದ್ದಾರೆ. ಸ್ಥಳಕ್ಕೆ ಸೋಮವಾರಪೇಟೆ ಪೊಲೀಸ್ ವೃತ್ತ ನಿರೀಕ್ಷಕ ನಂಜುಂಡೇಗೌಡ, ಶನಿವಾರಸಂತೆ ಠಾಣಾಧಿಕಾರಿ ತಿಮ್ಮಶೆಟ್ಟಿ ಸೇರಿದಂತೆ ಸಿಬ್ಬಂದಿಗಳು ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದಾರೆ.

- ವಿಜಯ್ ಹಾನಗಲ್/ದಿನೇಶ್ ಮಾಲಂಬಿ