ಮಡಿಕೇರಿ, ಸೆ. ೧೦: ಕೈಲ್ ಮುಹೂರ್ತ ಹಬ್ಬದ ಪ್ರಯುಕ್ತ ಕೋಕೇರಿ ಗ್ರಾಮದ ಪ್ರಾಥಮಿಕ ಶಾಲಾ ಮೈದಾನದಲ್ಲಿ ಕ್ರೀಡಾಕೂಟ ಏರ್ಪಡಿಸಲಾಗಿತ್ತು. ತೆಂಗಿನ ಕಾಯಿಗೆ ಗುಂಡು ಹೊಡೆಯುವುದು, ಭಾರದ ಕಲ್ಲೆಸೆತ, ಒಂದು ಸಾವಿರ ಮೀಟರ್ ಓಟ, ೫೦ ವರ್ಷ ಮೀರಿದ ಪುರುಷರಿಗೆ ಹಾಗೂ ಮಹಿಳೆಯರಿಗೆ ವಿವಿಧ ಸ್ಪರ್ಧೆಗಳು ನಡೆದವು. ನಂತರ ನಡೆದ ಸಭೆಯಲ್ಲಿ ಕ್ರೀಡಾಕೂಟದ ಅಧ್ಯಕ್ಷ ಪೆಮ್ಮಂಡ ನಾಣಯ್ಯ ಸ್ವಾಗತಿಸಿದರು. ಈ ಸಂದರ್ಭ ಆರಕ್ಷಕ ಗುಪ್ತಚರ ವಿಭಾಗದಲ್ಲಿ ಸಹಾಯಕ ಉಪನಿರೀಕ್ಷಕರಾಗಿ ಉತ್ತಮ ಸೇವೆ ಸಲ್ಲಿಸಿ ಆರಕ್ಷಕ ಉಪನಿರೀಕ್ಷಕರಾಗಿ ಬಡ್ತಿ ಪಡೆದಂತಹ ಕೋಕೇರಿ ಗ್ರಾಮಸ್ಥ ಮಚ್ಚಂಡ ಮನು ಮುತ್ತಣ್ಣ ಅವರನ್ನು ಸನ್ಮಾನಿಸಲಾಯಿತು.

ವಿವಿಧ ಸ್ಪರ್ಧೆಗಳಲ್ಲಿ ಬಹುಮಾನ ಪಡೆದವರನ್ನು ಗ್ರಾಮ ಪಂಚಾಯಿತಿ ಅಧ್ಯಕ್ಷ ಬಿದ್ದಂಡ ರಾಜೇಶ್, ಗ್ರಾಮ ಪಂಚಾಯಿತಿ ಸದಸ್ಯೆ ಪೆಮ್ಮಂಡ ಕೌಶಿ ಹಾಗೂ ವೇದಿಕೆಯಲ್ಲಿ ಉಪಸ್ಥಿತರಿದ್ದ ಗಣ್ಯರು ಬಹುಮಾನ ನೀಡಿ ಗೌರವಿಸಿದರು. ಚೇನಂಡ ಸಂಪತ್ ವಂದಿಸಿದರು. ವಾರ್ಷಿಕವಾಗಿ ನಡೆಯುವ ಈ ಕ್ರೀಡಾಕೂಟ ಸರದಿಯಂತೆ ಈ ಬಾರಿ ಪೊನ್ನಚಂಡ ಕುಟುಂಬಸ್ಥರದಾಗಿತ್ತು. ಮಧ್ಯಾಹ್ನದ ಭೋಜನದ ವ್ಯವಸ್ಥೆಯನ್ನು ಪೊನ್ನಚಂಡ ಗಣಪತಿ, ಸುರೇಂದ್ರ ನೇತೃತ್ವದ ತಂಡ ನೆರವೇರಿಸಿತು. - ಚೇನಂಡ ಎ. ಉತ್ತಪ್ಪ, ರಘು.