ಮಡಿಕೇರಿ, ಸೆ. ೧೦: ರೈತರ ಕೊಟ್ಟಿಗೆಯಿಂದ ಗೋವುಗಳನ್ನು ಕದ್ದೊಯ್ಯುತ್ತಿರುವ ಕಳ್ಳರನ್ನು ಬಂಧಿಸಿ ಅಕ್ರಮ ಗೋಸಾಗಾಟ - ಗೋಹತ್ಯೆ - ಗೋಮಾಂಸ ಮಾರಾಟ ಪ್ರಕರಣ ಗಳಿಗೆ ಕಡಿವಾಣ ಹಾಕಬೇಕೆಂದು ಆಗ್ರಹಿಸಿ ಮಡಿಕೇರಿ ತಾಲೂಕು ಹಿಂದೂ ಜಾಗರಣಾ ವೇದಿಕೆ ವತಿಯಿಂದ ಕಡಗದಾಳುವಿನಲ್ಲಿ ಪ್ರತಿಭಟನೆ ನಡೆಯಿತು.

ಕಡಗದಾಳುವಿನಲ್ಲಿ ತಾ.೮ರಂದು ಸ್ಥಳೀಯ ರೈತರಾದ ಮುಕ್ಕಾಟಿರ ಅಶೋಕ ಅವರ ಕೊಟ್ಟಿಗೆಯಿಂದ ೨ ಗೋವುಗಳನ್ನು ದುಷ್ಕರ್ಮಿಗಳು ರಾತ್ರಿ ಹೊತ್ತಿನಲ್ಲಿ ಕದ್ದೊಯ್ದಿದ್ದಾರೆ. ಈ ಬಗ್ಗೆ ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಮಾತ್ರವಲ್ಲದೆ, ಕಳೆದ ಕೆಲವು ತಿಂಗಳುಗಳ ಹಿಂದೆ ಕಡಗದಾಳುವಿನ ರೈತರಾದ ಮುಕ್ಕಾಟಿರ ದಿನು ಸೋಮಣ್ಣ ಅವರ ಕೊಟ್ಟಿಗೆಯಿಂದಲೂ ಗೋವನ್ನು ರಾತ್ರಿ ದುಷ್ಕರ್ಮಿಗಳು ಕದ್ದೊಯ್ದಿದ್ದು, ಈ ಬಗ್ಗೆಯೂ ಪ್ರಕರಣ ದಾಖಲಾಗಿದ್ದು, ಈವರೆಗೂ ಆರೋಪಿಗಳ ಬಂಧನವಾಗಿಲ್ಲ. ಇದರೊಂದಿಗೆ ಕಳೆದ ಕೆಲವು ದಿನಗಳ ಹಿಂದೆ ಸ್ಥಳೀಯರಾದ ಮುಕ್ಕಾಟಿರ ಮಂಜುಳಾ ಎಂಬವರು ಮೇಯಲು ಬಿಟ್ಟಿದ್ದ ಒಂದು ಗೋವು ಹಾಗೂ ಮುಕ್ಕಾಟಿರ ರಿನೇಶ್ ಅವರ ೨ ಗೋವುಗಳು ನಾಪತ್ತೆಯಾಗಿದ್ದು, ಎಲ್ಲಾ ಪ್ರಕರಣಗಳನ್ನು ಪೊಲೀಸ್ ಇಲಾಖೆ ಗಂಭೀರವಾಗಿ ಪರಿಗಣಿಸಿ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಪ್ರತಿಭಟನಾಕಾರರು ಒತ್ತಾಯಿಸಿದರು.

ಪ್ರತಿಭಟನೆಯಲ್ಲಿ ಹಿಂ.ಜಾ.ವೇ. ಮಂಗಳೂರು ವಿಭಾಗ ಸಂಯೋಜಕ ಮಹೇಶ್, ಮಡಿಕೇರಿ ತಾಲೂಕು ಸಂಯೋಜಕ ಮಗೇರನ ಬೆಳ್ಯಪ್ಪ, ಸಹ ಸಂಯೋಜಕ್ ಚೇತನ್ ಮತ್ತಿತರರು ಪಾಲ್ಗೊಂಡಿದ್ದರು.