ಮಡಿಕೇರಿ, ಸೆ. ೧೦: ನಗರದ ಎ. ಎಲ್.ಜಿ. ಕ್ರೆಸೆಂಟ್ ಶಾಲೆಯಲ್ಲಿ ಬ್ರಹ್ಮಗಿರಿ ಸಹೋದಯ ಕಾಂಪ್ಲೆಕ್ಸ್ ವತಿಯಿಂದ ಸಿಬಿಎಸ್‌ಇ ಅಂತರ್ ಶಾಲಾ ಚರ್ಚಾ ಸ್ಪರ್ಧೆಯನ್ನು ನಡೆಸಲಾಯಿತು.

ಕಾರ್ಯಕ್ರಮದ ಉದ್ಘಾಟನೆ ಯನ್ನು ಅತಿಥಿಗಳಾದ ಡಾ. ಅರ್ಶಕ್, ರಕ್ಷಿತ್ ಗೌಡ, ಶಾಲಾ ಆಡಳಿತ ಮಂಡಳಿಯ ನಿರ್ದೇಶಕರುಗಳಾದ ಫಯಾಜ್, ಮುನೀರ್, ಶಾಲೆಯ ಪ್ರಾಂಶುಪಾಲೆ ಜೋಯಿಸಿ ವಿನಯ ನಿರ್ವಹಿಸಿದರು.

ಮೂರು ಸುತ್ತುಗಳಲ್ಲಿ ಚರ್ಚಾ ಸ್ಪರ್ಧೆಗಳು ನಡೆಯಿತು. ಇದರಲ್ಲಿ ೧೪ ತಂಡಗಳಲ್ಲಿ ಒಟ್ಟು ೨೮ ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಕೊನೆಯ ಸುತ್ತು ಪ್ರತ್ಯಾರೋಪ ಸುತ್ತಾಗಿದ್ದು, ಇದಕ್ಕೆ ೩ ತಂಡಗಳು ಆಯ್ಕೆಯಾಗಿ, ಭಾರತೀಯ ವಿದ್ಯಾಭವನ ಕೊಡಗು ವಿದ್ಯಾಲಯ ಪ್ರಥಮ ಸ್ಥಾನ, ಎಸ್‌ಎಂಎಸ್ ಅಕಾಡೆಮಿ ಆಫ್ ಎಜುಕೇಶನ್ ಎರಡನೇ ಸ್ಥಾನ, ಅಂಕುರ್ ಪಬ್ಲಿಕ್ ಸ್ಕೂಲ್, ನಾಪೋಕ್ಲು ಮೂರನೇ ಸ್ಥಾನ ಪಡೆದುಕೊಂಡಿತು. ಸೈನಿಕ ಶಾಲೆಯ ಪಾರ್ಥ್ ಎಸ್.ಎಸ್. ಮತ್ತು ಕೆವಿಜಿ ಇಂಟರ್‌ನ್ಯಾಶನಲ್ ಸ್ಕೂಲ್‌ನ ಕೆ. ಅತುಲ್ಯ ಅತ್ಯುತ್ತಮ ಭಾಷಣಕಾರ ಪ್ರಶಸ್ತಿಯನ್ನು ತಮ್ಮ ಮುಡಿಗೇರಿಸಿ ಕೊಂಡರು. ಸಮಾರೋಪ ಸಮಾರಂಭದ ಮುಖ್ಯ ಅತಿಥಿಗಳಾದ ಶಕ್ತಿ ದಿನಪತ್ರಿಕೆಯ ಸಲಹಾ ಸಂಪಾದಕ ಬಿ.ಜಿ. ಅನಂತಶಯನ ಅವರು ಮಾತನಾಡಿ, ಚರ್ಚೆಯಿಂದ ದೇಶವನ್ನು ಕಟ್ಟಲು ನ್ಯಾಯದ ಪರ ಧ್ವನಿಗೂಡಿಸಲು ಸಾಧ್ಯ ಎಂದರು.

ಮೂಡಾ ಮಾಜಿ ಅಧ್ಯಕ್ಷ ಮುನೀರ್ ಅಹಮದ್ ಮಾತನಾಡಿ, ಚರ್ಚಾ ಸ್ಪರ್ಧೆಯು ಮುಂದಿನ ದಿನಗಳಲ್ಲಿ ವಿದ್ಯಾರ್ಥಿಗಳು ನ್ಯಾಯದ ಪರ ಧ್ವನಿಯೆತ್ತಲು ಅವಕಾಶ ಮಾಡಿಕೊಡುತ್ತದೆ. ವಿದ್ಯಾರ್ಥಿಗಳು ಇಂತಹ ಅವಕಾಶಗಳನ್ನು ಬಳಸಿಕೊಳ್ಳಬೇಕು ಎಂದರು.

ತೀರ್ಪುಗಾರರಾದ ಡಾ.ಅರ್ಶಕ್, ರಕ್ಷಿತ್ ಗೌಡ ಅವರನ್ನು ಹಾಗೂ ಎಲ್ಲ ಶಾಲೆಯ ಚರ್ಚಾ ಸ್ಪರ್ಧೆಯ ಮುಖ್ಯಸ್ಥರನ್ನು ಸನ್ಮಾನಿಸಲಾಯಿತು.