ಕಣಿವೆ, ಏ. ೧೪: ಕುಶಾಲನಗರದಿಂದ ಕೂಡಿಗೆ ಸಂಪರ್ಕಿಸುವ ರಾಜ್ಯ ಹೆದ್ದಾರಿಯನ್ನು ಒಂದಿಷ್ಟು ವಿಶಾಲಗೊಳಿಸಿ ವಿಭಜಕ ಮಾಡಲಾಗಿದೆ. ಮುಳ್ಳುಸೋಗೆಯಿಂದ ಕೂಡ್ಲೂರು ಗ್ರಾಮದ ಮಾವಿನ ತೋಟದವರೆಗೆ ಕೈಗೊಂಡಿರುವ ಹೆದ್ದಾರಿಯ ವಿಸ್ತಾರ ಹಾಗೂ ವಿಭಜಕ ನಿರ್ಮಾಣ ಕಾಮಗಾರಿಯನ್ನು ಕೋಟಿ ರೂಪಾಯಿಗಳನ್ನು ವ್ಯಯಿಸಿ ತಿಂಗಳ ಹಿಂದಷ್ಟೇ ಮಾಡಲಾಗಿದೆ. ಆದರೆ, ಸಂಬAಧಪಟ್ಟ ಇಲಾಖೆಯ ಅಧಿಕಾರಿಗಳ ದೂರದೃಷ್ಟಿಯ ಕೊರತೆ ಇಲ್ಲಿ ಅಪಾಯವನ್ನು ಆಹ್ವಾನಿಸಿದಂತಿದೆ. ಅಂದರೆ ಮೊದಲೇ ಹೆದ್ದಾರಿ ಅಗಲವಾಗಿದ್ದು, ವಿಭಜಕ ಮಾಡಿರುವ ಕಾರಣ ವೇಗದಲ್ಲಿ ಬರುವ ವಾಹನಗಳು ಈ ಸ್ಥಳದಲ್ಲಿ ಕಕ್ಕಾಬಿಕ್ಕಿಗೊಂಡು ಅವಘಡಗಳಿಗೆ ತುತ್ತಾಗುವ ಅಪಾಯವಿದೆ. ಈಗಲೇ ಮೂರ್ನಾಲ್ಕು ವಾಹನಗಳು ಇಲ್ಲಿ ಅವಘಡಕ್ಕೆ ತುತ್ತಾಗಿವೆ.

ಇದೇ ವಿಭಜಕದ ಬಳಿ ರಸ್ತೆಯಂಚಿನಲ್ಲಿ ಖಾಸಗಿಯಾಗಿ ನಡೆಸುತ್ತಿರುವ ಶಾಲೆಯೂ ಇರುವುದರಿಂದ ಮಕ್ಕಳು ಹೆಚ್ಚಿನ ಸಂಖ್ಯೆಯಲ್ಲಿ ಸೇರುವ ಕಾರಣ ವೇಗವಾಗಿ ಬರುವ ವಾಹನಗಳು ಚಾಲಕನ ನಿಯಂತ್ರಣ ಕಳೆದುಕೊಂಡು ಅಪಾಯವನ್ನು ಉಂಟುಮಾಡುವ ಸಾಧ್ಯತೆ ಇರುವುದರಿಂದ ಕೂಡಲೇ ಈ ವಿಭಜಕದ ಬಳಿ ಚಾಲಕರ ಅರಿವಿಗೆ ಬರುವಂತೆ ಎಚ್ವರಿಕೆಯ ನಾಮಫಲಕವನ್ನು ಅಳವಡಿಸುವ ಕೆಲಸ ಅತೀ ತುರ್ತಾಗಿ ಆಗಬೇಕಿದೆ.