ಕೂಡಿಗೆ, ಏ. ೧೧ ಕೂಡಿಗೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಮದಲಾಪುರ ವ್ಯಾಪ್ತಿಯಲ್ಲಿ ನಿನ್ನೆ ಸಂಜೆ ಬೀಸಿದ ಭಾರೀ ಗಾಳಿ ಮಳೆಗೆ ಮದಲಾಪುರ ಗ್ರಾಮದ ಭ್ಯಾಗ ಈರಯ್ಯ ಎಂಬವರ ಮನೆಯ ಮೇಲ್ಛಾವಣಿಯ ೩೫ ಸಿಮೆಂಟ್ ಶೀಟ್‌ಗಳು ಹಾರಿದ ಪರಿಣಾಮ ಮನೆಯ ಎಲ್ಲಾ ಸಾಮಗ್ರಿಗಳು ಮಳೆಗೆ ಆಹುತಿಯಾಗಿ ನಷ್ಟವಾಗಿದೆ. ಮನೆಯಲ್ಲಿದ್ದ ಭ್ಯಾಗಮ್ಮ ಮತ್ತು ಅವರ ಮಕ್ಕಳು ಮೊಮ್ಮಕ್ಕಳು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಮನೆ ಪಕ್ಕದಲ್ಲಿ ನಿಲ್ಲಿಸಲಾಗಿದ್ದ ಪಿಕ್‌ಅಪ್ ವಾಹನ ಮೇಲೆ ಶೀಟ್‌ಗಳು ಬಿದ್ದ ಪರಿಣಾಮ ವಾಹನಕ್ಕೂ ಹಾನಿಯಾಗಿದೆ. ಕೂಡಿಗೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೂಡಿಗೆ ಕೊಪ್ಪಲು ಗ್ರಾಮದ ಮಲ್ಲಿಕಾರ್ಜುನ ಎಂಬುವರ ಮನೆಯ ಗೋಡೆಗೂ ಹಾನಿಯಾಗಿದೆ. ಹಂಚುಗಳು ಹಾರಿವೆ. ಸ್ಥಳಕ್ಕೆ ಕೂಡಿಗೆ ಗ್ರಾಮ ಲೆಕ್ಕಾಧಿಕಾರಿ ಗುರುದರ್ಶನ್ ಮತ್ತು ಸಿಬ್ಬಂದಿ ಭೇಟಿ ನೀಡಿ ಪರಿಶೀಲಿಸಿದರು.