ಗೋಣಿಕೊಪ್ಪಲು, ಏ.೧೧: ಕಳೆದ ನಾಲ್ಕು ತಿಂಗಳ ಹಿಂದೆ ನಗರದ ಬೈಪಾಸ್ ರಸ್ತೆಯ ಸಮೀಪವಿರುವ ಕೈತೋಡು ಹಾಗೂ ಕೀರೆ ಹೊಳೆ ಬದಿಯನ್ನು ಒತ್ತುವರಿ ಮಾಡಿಕೊಂಡಿದ್ದ ಜಾಗವನ್ನು ಆಗಿನ ತಹಶೀಲ್ದಾರ್ ಯೋಗಾನಂದ್ ಬಹುತೇಕ ತೆರವು ಮಾಡಿದ್ದಾರೆ. ಈ ವೇಳೆ ಹೊಳೆ ಬದಿಯಲ್ಲಿ ಅಳವಡಿಸಲಾಗಿದ್ದ ವಿದ್ಯುತ್ ಕಂಬಗಳು ಬೀಳುವ ಹಂತಕ್ಕೆ ತಲುಪಿದ್ದವು. ಇದೀಗ ಮುಂದಿನ ಮಳೆಗಾಲದಲ್ಲಿ ಹೊಳೆ ಬದಿಯ ವಿದ್ಯುತ್ ಕಂಬಗಳು ಬೀಳುವ ಸಂಭವವಿರುವುದನ್ನು ಗಮನಿಸಿರುವ ಪೊನ್ನಂಪೇಟೆ ತಾಲೂಕು ತಹಶೀಲ್ದಾರ್ ಈ ಬಗ್ಗೆ ಭೂದಾಖಲೆಯ ಸಹಾಯಕ ನಿರ್ದೇಶಕರಿಗೆ ಪತ್ರ ಬರೆದು ಹೊಳೆ ಬದಿಯಲ್ಲಿರುವ ಸಾರ್ವಜನಿಕರು ತಮ್ಮ ಮನೆ ಕಟ್ಟಡ ಇತ್ಯಾದಿಯನ್ನು ಮಳೆಯಿಂದ ರಕ್ಷಿಸಿಕೊಳ್ಳಲು ತಾವಾಗಿಯೇ ತಡೆಗೋಡೆ ನಿರ್ಮಿಸಿಕೊಳ್ಳಲು ಹೊಳೆದಂಡೆಯ ಹದ್ದುಬಸ್ತನ್ನು ನಿಗದಿಪಡಿಸಲು ಇಬ್ಬರು ಸರ್ವೆ ಅಧಿಕಾರಿಗಳನ್ನು ನೇಮಿಸಿಕೊಡುವಂತೆ ಪತ್ರದಲ್ಲಿ ಕೋರಿದ್ದಾರೆ.