ಸೋಮವಾರಪೇಟೆ, ಏ.೧೧: ೧೨ ವರ್ಷಗಳ ಬಳಿಕ ನಡೆಯುತ್ತಿದ್ದ ದೇವರಕೋಲ ಸಂದರ್ಭ ಕುಟುಂಬ ಸದಸ್ಯರುಗಳ ನಡುವೆ ಏರ್ಪಟ್ಟ ಜಗಳವು ವಿಕೋಪಕ್ಕೆ ತಿರುಗಿ ವ್ಯಕ್ತಿಯೋರ್ವ ತನ್ನ ರಿವಾಲ್ವರ್ನಿಂದ ಗುಂಡು ಹಾರಿಸಿದ ಪರಿಣಾಮ ಮೂವರು ಗಾಯಗೊಂಡಿರುವ ಘಟನೆ ಸಮೀಪದ ನಗರಳ್ಳಿ ಗ್ರಾಮದಲ್ಲಿ ಇಂದು ಸಂಜೆ ನಡೆದಿದೆ.
ನಗರಳ್ಳಿ ಗ್ರಾಮ ನಿವಾಸಿ ಜಿ.ಡಿ. ವೀರೇಶ್ ಎಂಬವರು ತನ್ನ ರಿವಾಲ್ವರ್ನಿಂದ ಗುಂಡು ಹಾರಿಸಿದ್ದು, ಕುಟುಂಬ ಸದಸ್ಯರಾದ ಮಹೇಶ್, ನಂದೀಶ್, ಚಂದ್ರಶೇಖರ್ ಗಾಯಗೊಂಡಿದ್ದಾರೆ.
ಇದರಲ್ಲಿ ಮಹೇಶ್ ಅವರಿಗೆ ಸೊಂಟದ ಕೆಳಭಾಗಕ್ಕೆ ಗುಂಡೇಟು ತಗುಲಿದ್ದು, ಗಂಭೀರ ಸ್ಥಿತಿಯಲ್ಲಿದ್ದಾರೆ. ಉಳಿದ ಈರ್ವರ ಕೈಗೆ ಗುಂಡೇಟು ತಗುಲಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ಗುಂಡು ಹಾರಿಸಿದ ವೀರೇಶ್ ಅವರ ಮೇಲೂ ಹಲ್ಲೆ ನಡೆದಿದ್ದು, ಗಂಭೀರ ಗಾಯಗಳಾಗಿವೆ. ಗಾಯಾಳುಗಳನ್ನು ಸೋಮವಾರಪೇಟೆ ಸರ್ಕಾರಿ ಆಸ್ಪತ್ರೆಗೆ ಸಾಗಿಸಿ ಪ್ರಾಥಮಿಕ ಚಿಕಿತ್ಸೆ ನೀಡಿದ್ದು, ಹೆಚ್ಚಿನ ಚಿಕಿತ್ಸೆಗಾಗಿ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ.
ನಗರಳ್ಳಿ ಗ್ರಾಮದಲ್ಲಿ ೫ ಕುಟುಂಬಸ್ಥರು ಸೇರಿ ೧೨ ವರ್ಷಗಳ ನಂತರ ಕೋಲ ಪೂಜೆ ಆಯೋಜಿಸಿದ್ದು, ನಿನ್ನೆ ಮತ್ತು ಇಂದು ಪೂಜೆ ನಡೆದಿದೆ. ಇಂದು ಸಂಜೆ ತೆರೆ ಕಟ್ಟುವುದು ಹಾಗೂ ಹಣದ ವಿಷಯದಲ್ಲಿ
(ಮೊದಲ ಪುಟದಿಂದ) ವೀರೇಶ್‌ನಿಗೂ ಕುಟುಂಬ ಸದಸ್ಯರಿಗೂ ಜಗಳವಾಗಿದೆ.
ಮಾತಿನ ಚಕಮಕಿಯು ಸಂಘರ್ಷಕ್ಕೆ ಎಡೆಮಾಡಿಕೊಟ್ಟಿದ್ದು, ವೀರೇಶ್ ತನ್ನ ಬಳಿಯಿದ್ದ ರಿವಾಲ್ವರ್ನಿಂದ ಏಕಾಏಕಿ ಗುಂಡು ಹಾರಿಸಿ ಗಾಯಗೊಳಿಸಿರುವುದಾಗಿ ಗಾಯಾಳುಗಳು ಆಸ್ಪತ್ರೆಯಲ್ಲಿ ಹೇಳಿಕೆ ನೀಡಿದ್ದಾರೆ. ಈ ಬಗ್ಗೆ ಸೋಮವಾರಪೇಟೆ ಪೊಲೀಸರು ಮೊಕದ್ದಮೆ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.