ಕುಶಾಲನಗರ, ಏ.೧೧ : ಕುಶಾಲನಗರ ಪಟ್ಟಣ ವ್ಯಾಪ್ತಿಯಲ್ಲಿ ಮೊಬೈಲ್ ಕಳ್ಳತನ ದಂಧೆ ದಿನೇ ದಿನೇ ಏರಿಕೆಯಾಗುತ್ತಿದೆ. ಸಾರ್ವಜನಿಕ ಸ್ಥಳಗಳಾದ ಬಸ್ ನಿಲ್ದಾಣ, ಹೊಟೇಲ್‌ಗಳು, ಮಾರುಕಟ್ಟೆ ಸೇರಿದಂತೆ ಸಾರ್ವಜನಿಕ ಸ್ಥಳಗಳಲ್ಲಿ ದಿನನಿತ್ಯ ಮೊಬೈಲ್ ಕಳ್ಳತನ ಮಾಡಿ ಮಾರಾಟ ಮಾಡುತ್ತಿರುವ ಪ್ರಕರಣಗಳು ಬೆಳಕಿಗೆ ಬಂದಿವೆ.

ಹೆಚ್ಚಿನ ಸಂಖ್ಯೆ ಪ್ರಕರಣಗಳು ಕುಶಾಲನಗರ ಸರಕಾರಿ ಬಸ್ ನಿಲ್ದಾಣದಲ್ಲಿ ಕಂಡುಬರುತ್ತಿವೆ. ಸರಕಾರಿ ಬಸ್ ನಿಲ್ದಾಣದಲ್ಲಿ ಕಳ್ಳರಿದ್ದಾರೆ ಎನ್ನುವ ಮಾಹಿತಿ ಮೈಕ್ ಮೂಲಕ ನಿತ್ಯ ಸಾರುತ್ತಿದ್ದರು, ಇಲ್ಲಿ ಕಳ್ಳತನಕ್ಕೆ ಮಾತ್ರ ಕಡಿವಾಣ ಬಿದ್ದಿಲ್ಲ. ಹೆಚ್ಚಿನ ಪ್ರಯಾಣಿಕರು ತುರ್ತಾಗಿ ಪ್ರಯಾಣಿಸಬೇಕಾದ ಸಂದರ್ಭ ತಮ್ಮ ಮೊಬೈಲ್ ಕಳ್ಳತನ ಮಾಡಿರುವ ಬಗ್ಗೆ ದೂರು ನೀಡಲು ಕೂಡ ಆಗದೆ ಸಮಸ್ಯೆಗೆ ಒಳಗಾಗುತ್ತಿರುವುದು ಸಾಮಾನ್ಯವಾಗಿದೆ. ದಂಧೆಕೋರರು ಹೊಟೇಲುಗಳು ಮತ್ತಿತರ ಸ್ಥಳಗಳಲ್ಲಿ ಬ್ಯಾಟರಿ ಚಾರ್ಜಿಗೆ ಇಟ್ಟಿರುವ ಮೊಬೈಲ್‌ಗಳನ್ನು ಕಳವು ಮಾಡುತ್ತಿರುವುದು ಇತ್ತೀಚಿನ ನಿರಂತರ ಬೆಳವಣಿಗೆಯಾಗಿದೆ.

ಇತ್ತೀಚೆಗೆ ರಾತ್ರಿ ಕುಶಾಲನಗರದ ಸರ್ಕಾರಿ ಬಸ್ ನಿಲ್ದಾಣದ ಮುಂಭಾಗದ ಒಂದರಲ್ಲಿ ಬ್ಯಾಟರಿ ಚಾರ್ಜಿಗೆ ಇರಿಸಿದ ಭಾರಿ ಮೌಲ್ಯದ ಮೊಬೈಲ್ ಒಂದನ್ನು ಕಳವು ಮಾಡಲಾಗಿತ್ತು. ಈ ಬಗ್ಗೆ ಮೊಬೈಲ್ ಮಾಲೀಕರು ತಕ್ಷಣ ಪೊಲೀಸ್ ಠಾಣೆಗೆ ತೆರಳಿ ಮೌಖಿಕ ದೂರು ಸಲ್ಲಿಸಿದ್ದರು. ಮೊಬೈಲ್ ಹುಡುಕಿ ಸಿಗದ ಸಂದರ್ಭ ನೂತನ ಮೊಬೈಲ್ ಖರೀದಿಸಲು ಪಕ್ಕದ ಅಂಗಡಿಯೊAದಕ್ಕೆ ಗುರುವಾರ ತೆರಳಿದ ಸಂದರ್ಭ ಕಳವಾಗಿದ್ದ ಮೊಬೈಲನ್ನು ಓರ್ವ ವ್ಯಕ್ತಿ ಮಾರಾಟ ಮಾಡಲು ಯತ್ನಿಸುತ್ತಿರುವುದು ಕಂಡುಬAತು. ತಕ್ಷಣ ಮೊಬೈಲ್ ಕಳೆದುಕೊಂಡ ವ್ಯಕ್ತಿ ಅದನ್ನು ಗಮನಿಸಿ ಆ ಮೊಬೈಲ್ ತನ್ನದೆಂದು ವಾದಿಸಿ ಕಳ್ಳತನದ ಮೂಲ ಹುಡುಕಿದಾಗ ಕುಶಾಲನಗರ ಸರಕಾರಿ ಬಸ್ ನಿಲ್ದಾಣದ ಅಂಗಡಿಯೊAದರಲ್ಲಿ ಈ ದಂಧೆ ಕಾರ್ಯಾಚರಣೆ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ.

ಈ ಬಗ್ಗೆ ಬಸ್ ನಿಲ್ದಾಣದ ಅಧಿಕಾರಿಯ ಗಮನಕ್ಕೆ ತಂದಾಗ ತನ್ನ ಮೊಬೈಲನ್ನು ಕೂಡ ಯಾರೋ ಕದ್ದಿರುವುದಾಗಿ ತನ್ನ ಅಳಲನ್ನು ವ್ಯಕ್ತಪಡಿಸಿದ್ದು ಇನ್ನೂ ಸೋಜಿಗವೆನಿಸಿತು. ಇಲ್ಲಿ ವಿಶೇಷ ಅಂಶ ಎಂದರೆ ಸಿಸಿ ಕ್ಯಾಮೆರಾ ಇದ್ದರೂ, ಕಳ್ಳನನ್ನು ಹುಡುಕುವಲ್ಲಿ ಅಧಿಕಾರಿಗಳು ವಿಫಲರಾಗಿದ್ದಾರೆ.

ಕಳವು ಮಾಡಿದ ಮೊಬೈಲ್‌ನ್ನು ಸರ್ಕಾರಿ ಬಸ್ ನಿಲ್ದಾಣದ ಸಾರಿಗೆ ನಿಯಂತ್ರಣ ಅಧಿಕಾರಿ ಕಚೇರಿ ಪಕ್ಕದ ಅಂಗಡಿಯಲ್ಲಿ ಅಡವಿಟ್ಟು ತುರ್ತಾಗಿ ಅಲ್ಪ ಪ್ರಮಾಣದ ಹಣ ಪಡೆಯುವುದು ಕಳವು ಮಾಡುವ ದಂಧೆಕೋರರ ರೂಢಿಯಾಗಿದೆ ಎಂದು ತಿಳಿದುಬಂದಿದೆ.

ಈ ಬಗ್ಗೆ ‘ಶಕ್ತಿ’ ಅಂಗಡಿ ಮಾಲೀಕನಲ್ಲಿ ಪ್ರತಿಕ್ರಿಯೆ ಬಯಸಿದಾಗ ಜನರು ತುರ್ತಾಗಿ ಹಣ ಬೇಕಾದಾಗ ಮೊಬೈಲನ್ನು ತನ್ನ ಬಳಿ ಅಡವಿಟ್ಟು ಹಣ ಪಡೆಯುವುದು ಹಲವು ಸಮಯಗಳಿಂದ ನಡೆಯುತ್ತಿದೆ ಎಂದು ಮೊಬೈಲ್ ದಂಧೆಕೋರರ ಚಟುವಟಿಕೆಗಳ ಬಗ್ಗೆ ಬೆಳಕು ಚೆಲ್ಲಿದ್ದಾರೆ.

ಮೊಬೈಲ್ ಕಳೆದುಕೊಂಡ ಹೊಟೇಲ್ ಮಾಲೀಕ ತನ್ನ ಮೊಬೈಲ್ ಕಳವಾಗಿ ಮತ್ತೆ ದೊರಕಿರುವ ಬಗ್ಗೆ ಕುಶಾಲನಗರ ಪಟ್ಟಣ ಪೊಲೀಸ್ ಠಾಣೆಗೆ ಇದೀಗ ಮಾಹಿತಿ ನೀಡಿದ್ದು ಈ ಬಗ್ಗೆ ಕುಶಾಲನಗರ ಪೊಲೀಸರು ಸರಕಾರಿ ಬಸ್ ನಿಲ್ದಾಣದ ಅಂಗಡಿಗೆ ಭೇಟಿ ನೀಡಿ ವಿಚಾರಣೆ ಕೈಗೊಂಡಿದ್ದಾರೆ.

ಒಟ್ಟಾರೆ ಕುಶಾಲನಗರ ಪಟ್ಟಣದಲ್ಲಿ ಅಧಿಕಗೊಂಡಿರುವ ಮೊಬೈಲ್ ಕಳ್ಳತನ ದಂಧೆಕೋರರನ್ನು ಪತ್ತೆ ಹಚ್ಚಿ ಕಾನೂನು ಕ್ರಮ ಕೈಗೊಳ್ಳುವ ಕೆಲಸ ಕೂಡಲೇ ಪೊಲೀಸರು ಕೈಗೊಳ್ಳುವಂತೆ ಸ್ಥಳೀಯರು ಪತ್ರಿಕೆ ಮೂಲಕ ಆಗ್ರಹಿಸಿದ್ದಾರೆ.

-ಚಂದ್ರಮೋಹನ್