ನಾಪೋಕ್ಲು, ಏ. ೧೦: ಸಮೀಪದ ಬಲ್ಲಮಾವಟಿ ಗ್ರಾಮದ ಬಜರಂಗಿ ಯೂತ್ ಕ್ಲಬ್ ವತಿಯಿಂದ ಟೆನ್ನಿಸ್ ಬಾಲ್ ಕ್ರಿಕೆಟ್ ಪಂದ್ಯಾಟಕ್ಕೆ ಗ್ರಾಮದ ನೇತಾಜಿ ಪ್ರೌಢಶಾಲೆಯ ಆಟದ ಮೈದಾನದಲ್ಲಿ ಶನಿವಾರ ಚಾಲನೆ ನೀಡಲಾಯಿತು.

ಬಲ್ಲಮಾವಟಿ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಮಣವಟ್ಟೀರ ಹರೀಶ್ ಕುಶಾಲಪ್ಪ ಪಂದ್ಯಾಟಕ್ಕೆ ಚಾಲನೆ ನೀಡಿದರು. ಆರಂಭಿಕ ಪಂದ್ಯವು ಲಕ್ಕಿ ಬಾಯ್ಸ್ ಕುಂಜಿಲ ಹಾಗೂ ಪಡಿಯಾಣಿ ಬಾಯ್ಸ್ ತಂಡಗಳ ನಡುವೆ ನಡೆಯಿತು. ಮೊದಲು ಬ್ಯಾಟ್ ಮಾಡಿದ ಪಡಿಯಣಿ ಬಾಯ್ಸ್ ತಂಡವು ನಿಗದಿತ ಐದು ಓವರ್‌ಗಳಲ್ಲಿ ಎಲ್ಲಾ ವಿಕೆಟ್ ಕಳೆದುಕೊಂಡು ೨೫ ರನ್‌ಗಳಿಸಿತು. ಬಳಿಕ ಬ್ಯಾಟಿಂಗ್ ಮಾಡಿದ ಕುಂಜಿಲದ ಲಕ್ಕಿ ಬಾಯ್ಸ್ ತಂಡವು ಒಂದು ವಿಕೆಟ್ ನಷ್ಟಕ್ಕೆ ಗುರಿ ಸಾಧಿಸಿ ಮುಂದಿನ ಸುತ್ತು ಪ್ರವೇಶಿಸಿತು. ಪಂದ್ಯಾಟದಲ್ಲಿ ೩೨ ತಂಡಗಳು ಪಾಲ್ಗೊಂಡಿವೆ. ನೇತಾಜಿ ಪ್ರೌಢಶಾಲೆಯ ಮುಖ್ಯ ಶಿಕ್ಷಕ ಸಿ.ಎಸ್. ಸುರೇಶ್, ಗ್ರಾಮ ಪಂಚಾಯಿತಿ ಸದಸ್ಯ ಬಾಬಿ ಭೀಮಯ್ಯ, ಬಜರಂಗಿ ಯೂತ್ ಕ್ಲಬ್ ಸದಸ್ಯರಾದ ಎಡಿಕೇರಿ ಪ್ರಸನ್ನ, ಎಡಿಕೇರಿ ರಾಜೇಶ್, ಕೋಟೇರ ನೂತನ್, ಎಡಿಕೇರಿ ಕೀರ್ತನ್, ವಚನ್, ಸುಧೀರ್, ಚರಣ್ ಪಾಲ್ಗೊಂಡಿದ್ದರು.