ನಾಪೋಕ್ಲು, ಏ. ೧೦: ಮೂರ್ನಾಡು ವಿದ್ಯಾಸಂಸ್ಥೆಯ ಬಾಚೆಟ್ಟೀರ ಲಾಲು ಮುದ್ದಯ್ಯ ಕ್ರೀಡಾಂಗಣದಲ್ಲಿ ನಡೆದ ಹಿಂದೂ ಕಪ್ ಕ್ರಿಕೆಟ್ ಕಪ್ ಟೂರ್ನಿಯ ಅಂತಿಮ ಪಂದ್ಯದಲ್ಲಿ ಮಡಿಕೇರಿಯ ಟೀಮ್ ಮ್ಯಾಕ್ಸ್ವೆಲ್ ತಂಡವು ಗೆಲುವು ಸಾಧಿಸುವುದರೊಂದಿಗೆ ಎರಡನೇ ವರ್ಷದ ಹಿಂದೂ ಕಪ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತು.

ಮೂರ್ನಾಡಿನ ಭಜರಂಗಿ ಬಾಯ್ಸ್ ತಂಡವು ದ್ವಿತೀಯ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು. ೩೨ ತಂಡಗಳು ಪಾಲ್ಗೊಂಡಿದ್ದ ಟೂರ್ನಿಯಲ್ಲಿ ಪ್ರಶಸ್ತಿಗಾಗಿ ಭಜರಂಗಿ ಬಾಯ್ಸ್ ಹಾಗೂ ಟೀಮ್ ಮ್ಯಾಕ್ಸ್ವೆಲ್ ತಂಡಗಳ ನಡುವೆ ಸೆಣಸಾಟ ನಡೆಯಿತು. ಮೊದÀಲು ಬ್ಯಾಟ್ ಮಾಡಿದ ಭಜರಂಗಿ ಬಾಯ್ಸ್ ತಂಡವು ೮ ಓವರ್‌ಗಳಲ್ಲಿ ಏಳು ವಿಕೆಟ್ ನಷ್ಟಕ್ಕೆ ೭೧ ರನ್ ಗಳಿಸಿತು.

ಈ ಮೊತ್ತವನ್ನು ಸುಲಭವಾಗಿ ಬೆನ್ನಟ್ಟಿದ ಟೀಮ್ ಮ್ಯಾಕ್ಸ್ವೆಲ್ ತಂಡವು ೨ ವಿಕೆಟ್ ನಷ್ಟಕ್ಕೆ ಗುರಿ ಸಾಧಿಸಿ ರೂ. ೫೦,೦೦೦ ನಗದು ಹಾಗೂ ಟ್ರೋಫಿಯನ್ನು ಮುಡಿಗೇರಿಸಿಕೊಂಡಿತು. ಭಜರಂಗಿ ಬಾಯ್ಸ್ ತಂಡವು ರೂ. ೩೦,೦೦೦ ಹಾಗೂ ಟ್ರೋಫಿಯನ್ನು ತನ್ನದಾಗಿಸಿಕೊಂಡಿತು. ತೃತೀಯ ಸ್ಥಾನ ಪಡೆದ ಹಾತೂರಿನ ವಿರಾಟ್ ಕ್ರಿಕೆಟರ್ಸ್ ತಂಡಕ್ಕೆ ರೂ. ೨೦,೦೦೦ ಹಾಗೂ ಟ್ರೋಫಿ ಲಭಿಸಿದರೆ ನಾಲ್ಕನೇ ಸ್ಥಾನಗಳಿಸಿದ ಮೂರ್ನಾಡಿನ ಜಿವೈಎಸ್ ಕ್ರಿಕೆಟರ್ಸ್ ತಂಡವು ರೂ. ೧೦,೦೦೦ ಹಾಗೂ ಟ್ರೋಫಿಯನ್ನು ಗಳಿಸಿತು.

ಸಮಾರೋಪ ಸಮಾರಂಭದಲ್ಲಿ ವಿಧಾನ ಪರಿಷತ್ ಸದಸ್ಯ ಮಂಡೇಪAಡ ಸುಜಾ ಕುಶಾಲಪ್ಪ ಅವರನ್ನು ಕ್ರೀಡೋತ್ಸವದ ಆಯೋಜಕರು ಸನ್ಮಾನಿಸಿದರು. ಸನ್ಮಾನ ಸ್ವೀಕರಿಸಿ ಮಾತನಾಡಿದ ಅವರು ದೈಹಿಕವಾಗಿ ಹಾಗೂ ಮಾನಸಿಕವಾಗಿ ವಿಕಸನಗೊಳ್ಳಲು ಕ್ರೀಡೆ ಸಹಕಾರಿ. ಜಿಲ್ಲೆಯ ಕ್ರೀಡಾಪಟುಗಳು ಕ್ರಿಕೆಟ್ ಹಾಗೂ ಹಾಕಿಯಲ್ಲಿ ಹೆಸರು ಮಾಡಿದ್ದು ಕ್ರೀಡೆಯಿಂದ ಭವಿಷ್ಯ ರೂಪಿಸಲು ಸಾಧ್ಯ ಎಂದು ತೋರಿಸಿಕೊಟ್ಟಿದ್ದಾರೆ ಎಂದರು. ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಸುಜಾತ ಚಂದ್ರಶೇಖರ್ ಮಾತನಾಡಿದರು. ಕ್ರೀಡೋತ್ಸವದ ಆಯೋಜಕ ಅರುಣ್ ಕುಮಾರ್ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ಭಜರಂಗ ದಳದ ಜಿಲ್ಲಾ ಸಂಚಾಲಕ ಅನೀಶ್, ವಿಶ್ವ ಹಿಂದೂ ಪರಿಷತ್ತಿನ ಜಿಲ್ಲಾಧ್ಯಕ್ಷ ಕೃಷ್ಣಮೂರ್ತಿ, ಭಜರಂಗದ ದಳದ ಮೂರ್ನಾಡು ಘಟಕದ ಅಧ್ಯಕ್ಷ ಮೋಹನ್ ಪಾಲ್ಗೊಂಡಿದ್ದರು.

ಟೂರ್ನಿಯ ಉತ್ತಮ ಬೌಲರ್ ಪ್ರಶಸ್ತಿ ಹರೀಶ್, ಉತ್ತಮ ಬ್ಯಾಟ್ಸ್ ಮನ್ ಪ್ರಶಸ್ತಿ ಅಕ್ಷಯ್ ಉನ್ನಿ, ಮ್ಯಾನ್ ಆಫ್‌ದ ಸೀರೀಸ್ ಯತೀಶ್, ಬೆಸ್ಟ್ ಕ್ಯಾಚರ್ ತ್ರಿವನ್, ಬೆಸ್ಟ್ ಟೀಮ್ ಭಗವತಿ ಮುತ್ತಾರುಮುಡಿ, ಬೆಸ್ಟ್ ಕೀಪರ್ ಸಚಿನ್, ಮ್ಯಾನ್ ಆಫ್ ದ ಸೀರೀಸ್ ಯತೀಶ್ ಪಡೆದುಕೊಂಡರು.