ಮಡಿಕೇರಿ, ಏ. ೧೦: ಕೋಟ್ರಂಗಡ ಸಜನಿ ಸೋಮಯ್ಯ ವಿರಚಿತ `ಬಾಳ್ಕ್ ಬೊಳಿ' ಕಾದಂಬರಿ ಆಧಾರಿತ ಕೊಡವ ಚಲನಚಿತ್ರ `ನೆಲ್ಚಿ ಬೊಳಿ' ತಾ. ೧೫ ರಂದು ಬಿಡುಗಡೆ ಯಾಗಲಿದೆ ಎಂದು ಸಿನಿಮಾ ತಂಡ ಮಾಹಿತಿ ನೀಡಿದೆ.
ನಗರದ ಪತ್ರಿಕಾ ಭವನದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಿನಿಮಾ ನಿರ್ಮಾಪಕ ಹಾಗೂ ನಿರ್ದೇಶಕ ಕಾಳಿಮಾಡ ದಿನೇಶ್ ನಾಚಪ್ಪ, ಕೊಡವ ಆಚಾರ, ವಿಚಾರ, ಸಂಸ್ಕೃತಿಯನ್ನು ಬಿಂಬಿಸುವ ಜೊತೆಗೆ ಮನರಂಜನಾತ್ಮಕವಾಗಿ ಸಿನಿಮಾ ಮೂಡಿಬಂದಿದೆ. ತಾಂತ್ರಿಕವಾಗಿ ಉತ್ತಮ ಗುಣಮಟ್ಟದಲ್ಲಿ ಸಿನಿಮಾ ನಿರ್ಮಾಣವಾಗಿದೆ. ಅನುಭವಿ ಹಾಗೂ ಹೊಸ ಕಲಾವಿದರು ಸೇರಿ ಒಟ್ಟು ೩೮ ಕಲಾವಿದರುಗಳು ಸಿನಿಮಾಕ್ಕೆ ಬಣ್ಣ ಹಚ್ಚಿದ್ದಾರೆ. ಕರುಣೆ ಮತ್ತು ಪ್ರೀತಿಯ ನಡುವಿನ ಕಥೆ ಇದಾಗಿದೆ. ಕನ್ನಡ, ತಮಿಳು ಸೇರಿ೧೦೦ ಕ್ಕೂ ಹೆಚ್ಚು ಚಿತ್ರಗಳಿಗೆ ಹಿನ್ನೆಲೆ ಸಂಗೀತ ಸಂಯೋಜಿಸಿರುವ ರಾಜ್ ಬಾಸ್ಕರ್ ನೆಲ್ಚಿ ಬೊಳಿಗೆ ಸಂಗೀತ ನೀಡಿದ್ದಾರೆ.
ತಾ. ೧೫ ರಂದು ಸಿನಿಮಾ ಬಿಡುಗಡೆಯಾಗಲಿದ್ದು, ವೀರಾಜಪೇಟೆ ಟೌನ್ ಹಾಲ್ನಲ್ಲಿ ಬೆಳಿಗ್ಗೆ ೧೦.೩೦, ಮಧ್ಯಾಹ್ನ ೨.೩೦ ಹಾಗೂ ಸಂಜೆ ೬ ಗಂಟೆಗೆ ಸಿನಿಮಾ ಪ್ರದರ್ಶನವಾಗಲಿದೆ ಎಂದರು. ಸಿನಿಮಾ ಟಿಕೆಟ್ ಮೇಲಿರುವ ಎ.ಆರ್. ಕೋಡ್ ಸ್ಕಾö್ಯನ್ ಮಾಡುವ ಮೂಲಕ ಸಿನಿಮಾ ಟ್ರೆöÊಲರ್ ವೀಕ್ಷಿಸಬಹುದಾಗಿದ್ದು, ಇದು ಭಾರತೀಯ ಸಿನಿಮಾದ ಪ್ರಥಮ ಪ್ರಯೋಗ ಎಂದು ವಿವರಿಸಿದರು.
ಕಲಾವಿದ ನೆರವಂಡ ಉಮೇಶ್ ಮಾತನಾಡಿ, ಸಿನಿಮಾ ಅಚ್ಚುಕಟ್ಟಾಗಿ ಮೂಡಿಬಂದಿದೆ. ಕೊಡವ ಸಿನಿಮಾ ಪ್ರದರ್ಶನಕ್ಕೆ ಉತ್ತಮ ಚಿತ್ರಮಂದಿರವಿಲ್ಲದ ಬಗ್ಗೆ ಬೇಸರ ವ್ಯಕ್ತಪಡಿಸಿದ ಅವರು, ಜಿಲ್ಲೆಯಲ್ಲಿ ಜನತಾ ಥಿಯೇಟರ್ ಆರಂಭಕ್ಕೆ ಜನಪ್ರತಿನಿಧಿಗಳು ಮುಂದಾಗಬೇಕು. ಚಲನಚಿತ್ರ ಹಾಗೂ ಕೊಡವ ಅಕಾಡೆಮಿ ಕೈಜೋಡಿಸಬೇಕೆಂದರು.
ಗೋಷ್ಠಿಯಲ್ಲಿ ಕಲಾವಿದರಾದ ಮಂಡೀರ ಬೋಪಣ್ಣ, ಮಂಡೀರ ಪದ್ಮ ಬೋಪಯ್ಯ, ಕಳ್ಳಿಚಂಡ ಡಿಂಪಲ್, ಹಿನ್ನೆಲೆ ಸಂಗೀತಗಾರ ರಾಜ್ ಬಾಸ್ಕರ್ ಇದ್ದರು.