ಮಡಿಕೇರಿ, ಏ. 1: ಪಶ್ಚಿಮ ಬಂಗಾಳದ 9 ಜನ, ತಮಿಳುನಾಡಿನ 3, ದಾವಣಗೆರೆಯ 6 ಮತ್ತು ಮಡಿಕೇರಿಯ ಒಬ್ಬ ವಯೋವೃದ್ದೆ ಸೇರಿದಂತೆ ದಿನಗೂಲಿಗಾಗಿ ಜಿಲ್ಲೆಗೆ ಆಗಮಿಸಿದ್ದ 19 ಜನರಿದ್ದು, ಇದರಲ್ಲಿ 9 ಕಟ್ಟಡ ಕಾರ್ಮಿಕರು, 3 ಬೀದಿ ಬದಿ ವ್ಯಾಪಾರಸ್ಥರು, 6 ಕೂಲಿ ಕಾರ್ಮಿಕರು ಮತ್ತು 1 ವಯೋವೃದ್ಧೆ ಅಜ್ಜಿಗೆ ಜಿಲ್ಲಾಡಳಿತ, ಕಾರ್ಮಿಕ ಇಲಾಖೆ ವತಿಯಿಂದ ಅಗತ್ಯ ದಿನಸಿ ಸಾಮಗ್ರಿಗಳನ್ನು ವಿತರಿಸಲಾಯಿತು.

ಸಿದ್ದಾಪುರದ ವಿಜಯನರವರ ಮನೆ, ಕರಡಿಗೋಡು ರಸ್ತೆ, ಮೈಸೂರು ರಸ್ತೆ, ಟ್ಯಾಂಕ್‍ಸೈಟ್ ಎಸ್ಟೇಟ್, ಮುತ್ತೆತೋಡು ಮತ್ತು ಮಾರ್ಕೆಟ್ ರಸ್ತೆಯ ಬಾಡಿಗೆ ಮನೆಯಲ್ಲಿ ವಾಸವಿದ್ದ ಕಾರ್ಮಿಕರಿಗೆ ಬುಧವಾರ ಅಧಿಕಾರಿಗಳ ಮತ್ತು ಜನಪ್ರತಿನಿಧಿಗಳ ಸಮಕ್ಷಮದಲ್ಲಿ ಅಗತ್ಯ ದಿನಸಿ ಪದಾರ್ಥಗಳನ್ನು ಉಚಿತವಾಗಿ ಪೂರೈಸಲಾಯಿತು.

ಮಡಿಕೇರಿ ತಾಲೂಕು ಹಿರಿಯ ಕಾರ್ಮಿಕ ನಿರೀಕ್ಷಕ ಎಂ.ಎಂ. ಯತ್ನಟಿ, ಸಿದ್ದಾಪುರ ಗ್ರಾ.ಪಂ. ಅಧ್ಯಕ್ಷೆ ಮಣಿ ಎಮ್ ಕೆ, ಸಿದ್ದಾಪುರ ಗ್ರಾ.ಪಂ. ಮಾಜಿ ಉಪಾಧ್ಯಕ್ಷ ಎಂ.ಎಚ್ ಮೂಸಾ, ಸಿದ್ದಾಪುರ ಗ್ರಾ.ಪಂ. ಸದಸ್ಯರಾದ ಪ್ರೇಮಾ, ಅಬ್ದುಲ್ ಸುಕೂರ, ಸೌಕತ್ ಅಲಿ ಮತ್ತು ಟಿ ಹೆಚ್ ಮಂಜುನಾಥ ಹಾಗೂ ಸಿದ್ದಾಪುರ ಗ್ರಾ.ಪಂ. ಪಿಡಿಒ ವಿಶ್ವನಾಥ ಕೆ.ಸಿ ಮತ್ತು ಸಿಬ್ಬಂದಿ ಸುರೇಶ ಎಮ್.ಎಮ್ ಹಾಗೂ ಇತರರು ಇದ್ದರು.