ಮಡಿಕೇರಿ, ಮಾ. 31: ಮಡಿಕೇರಿ ರೋಟರಿ ಕ್ಲಬ್ ವತಿಯಿಂದ ನಗರದ ಸರ್ಕಾರಿ ಜೂನಿಯರ್ ಕಾಲೇಜಿನ ಕಂಪ್ಯೂಟರ್ ಪ್ರಯೋಗಾಲಯಕ್ಕೆ ಕಾಯಕಲ್ಪ ನೀಡಲಾಯಿತು.

ಜೂನಿಯರ್ ಕಾಲೇಜಿನ ಕಂಪ್ಯೂಟರ್ ಪ್ರಯೋಗಾಲಯಕ್ಕೆ ಕಂಪ್ಯೂಟರ್ ಟೇಬಲ್, ಕುರ್ಚಿಗಳನ್ನು ಒದಗಿಸುವುದರೊಂದಿಗೆ ಲ್ಯಾಬ್‍ಗೆ ನೆಲಹಾಸನ್ನೂ ರೋಟರಿ ಕ್ಲಬ್ ವತಿಯಿಂದ ರೂ. 60 ಸಾವಿರ ವೆಚ್ಚದಲ್ಲಿ ಕಲ್ಪಿಸಲಾಯಿತು. ರೋಟರಿ ಜಿಲ್ಲಾ ಯೋಜನೆಯಿಂದ ಈ ಹಣವನ್ನು ನೀಡಲಾಯಿತು. ನೂತನ ಕಂಪ್ಯೂಟರ್ ಲ್ಯಾಬ್‍ನ್ನು ಜಿಲ್ಲೆಯ ರೋಟರಿ ಮಾಜಿ ರಾಜ್ಯಪಾಲ ಮಾತಂಡ ಸುರೇಶ್ ಚಂಗಪ್ಪ ಉದ್ಘಾಟಿಸಿದರು.

ಈ ಸಂದರ್ಭ ಸರ್ಕಾರಿ ಜೂನಿಯರ್ ಕಾಲೇಜಿನ ಪ್ರಾಂಶುಪಾಲ ವಿಜಯ್, ಮಡಿಕೇರಿ ರೋಟರಿ ಕ್ಲಬ್ ಅಧ್ಯಕ್ಷ ಕೆ.ಎಸ್. ರತನ್ ತಮ್ಮಯ್ಯ, ಕಾರ್ಯದರ್ಶಿ ಕೆ.ಸಿ. ಕಾರ್ಯಪ್ಪ, ನಿರ್ದೇಶಕರುಗಳಾದ ಪಾರ್ಥ ಚಂಗಪ್ಪ, ಅನಿಲ್ ಕೃಷ್ಣಾನಿ, ಅಮರ್ ಶರ್ಮಾ ಹಾಜರಿದ್ದರು.