ವೀರಾಜಪೇಟೆ, ಏ. 1: ಕೊರೊನಾ ವೈರಸ್ ಹರಡುವ ಭೀತಿಯಲ್ಲಿ ಮುಂಜಾಗೃತಾ ಕ್ರಮವಾಗಿ ಲಾಕ್‍ಡೌನ್ ಆರು ಗಂಟೆಗಳ ಕಾಲ ಸಡಿಲಿಸಿದ್ದರೂ ಜನ ಸಂಚಾರ ವಿರಳವಾಗಿದ್ದು, ಮಾರ್ಜಿನ್ ಫ್ರೀ ಇತರ ದಿನಸಿ ಅಂಗಡಿಗಳಲ್ಲಿ ಆಯ್ದ ಅಗತ್ಯ ಸಾಮಗ್ರಿಗಳ ಅಭಾವ ಕಂಡು ಬಂದಿದ್ದರಿಂದ ಸಾಮಗ್ರಿಗಳಿಗಾಗಿ ಗ್ರಾಹಕರು ಪರದಾಡುತ್ತಿದ್ದುದು ಕಂಡು ಬಂತು.
ಅಗತ್ಯ ಸಾಮಗ್ರಿಗಳ ಕೊರತೆಗೆ ಸಂಬಂಧಿಸಿದಂತೆ ಮಾರ್ಜಿನ್ ಫ್ರೀ ಮಾಲೀಕರನ್ನು ಸಂಪರ್ಕಿಸಿದಾಗ ತಾಲೂಕು ಆಡಳಿತದಿಂದ ಸಾಮಗ್ರಿಗಳನ್ನು ತರಲು ಸಾಗಾಣಿಕೆ ಪಾಸು ನೀಡಿದ್ದರೂ, ಮೈಸೂರಿನ ಆರ್.ಎಂ.ಸಿ. ಯಾರ್ಡ್‍ನಲ್ಲಿ ಅಗತ್ಯ ದಿನಸಿ ಸಾಮಗ್ರಿಗಳು ದೊರೆಯುತ್ತಿಲ್ಲ. ಹೊರ ಜಿಲ್ಲೆಯಿಂದ ಸಾಮಗ್ರಿಗಳು ಬರುತ್ತಿಲ್ಲ ಎಂದು ಪ್ರತಿಕ್ರಿಯೆ ನೀಡಿದರು.
ಇಂದು ಬೆಳಗ್ಗಿನಿಂದಲೇ ಪಟ್ಟಣದ ವಿವಿಧೆಡೆಗಳಲ್ಲಿರುವ ದಿನಸಿ ಅಂಗಡಿಗಳು ತೆರೆದಿದ್ದರೂ ವ್ಯಾಪಾರ ವಹಿವಾಟು ನಿರೀಕ್ಷಿತ ಮಟ್ಟದಲ್ಲಿರಲಿಲ್ಲ. ವೀರಾಜಪೇಟೆ ಪಟ್ಟಣದಲ್ಲಿ ತರಕಾರಿಗಳ ಮಾರಾಟಕ್ಕಾಗಿ ಪ್ರತಿ ವಾರ್ಡ್‍ಗೆ ಒಂದರಂತೆ ಹದಿನೆಂಟು ವಾರ್ಡ್‍ಗಳಲ್ಲಿ ತರಕಾರಿ ಮಾರಾಟ ಮಾಡಲು ಅನುಮತಿ ನೀಡಲಾಗಿದ್ದರಿಂದ ಮುಖ್ಯಬೀದಿ, ಖಾಸಗಿ ಬಸ್ಸು ನಿಲ್ದಾಣದಲ್ಲಿ ತರಕಾರಿ ಖರೀದಿದಾರರ ಸಂಖ್ಯೆ ವಿರಳವಾಗಿತ್ತು. ಪಟ್ಟಣದಲ್ಲಿ ಗೂಡ್ಸ್ ವಾಹನ ಗಳಲ್ಲಿಯೂ ಪಟ್ಟಣ ಸೇರಿದಂತೆ ಹತ್ತಿರದ ಗ್ರಾಮಾಂತರ ಪ್ರದೇಶಗಳಲ್ಲಿ ಗ್ರಾಹಕರ ಬೇಡಿಕೆಗೆ ತಕ್ಕಂತೆ ತರಕಾರಿ ವಿತರಿಸಲು ಹತ್ತು ಗೂಡ್ಸ್ ವಾಹನಗಳಿಗೆ ಅನುಮತಿ ನೀಡಲಾಗಿರುವುದರಿಂದ ಆಯ್ದ ಆಟೋರಿಕ್ಷಾಗಳು ಹಾಗೂ ಗೂಡ್ಸ್ ವಾಹನಗಳಲ್ಲಿ ಮನೆ ಮನೆಗೆ ತೆರಳಿ ತರಕಾರಿ ಮಾರಾಟ ಮಾಡುತ್ತಿದ್ದರು.
ಬೇಕರಿ ಅಂಗಡಿಗಳನ್ನು ತೆರೆಯಲು ಜಿಲ್ಲಾಡಳಿತ ಅನುಮತಿ ಯನ್ನು ಹಿಂದಕ್ಕೆ ಪಡೆದುದರಿಂದ ಇಲ್ಲಿನ ದೊಡ್ಡಟ್ಟಿ ಚೌಕಿ, ಮುಖ್ಯರಸ್ತೆ ಹಾಗೂ ಗಡಿಯಾರ ಕಂಬದ ಬಳಿಯ ಬೇಕರಿಗಳನ್ನು ಪಟ್ಟಣ ಪಂಚಾಯಿತಿ ಅಧಿಕಾರಿಗಳು ಮುಚ್ಚಿಸಿದರು. ಪರವಾನಗಿಯ ಷರತ್ತುಗಳನ್ನು ಉಲ್ಲಂಘಿಸಿ ನಿರ್ಬಂಧದ ಅವಧಿಯಲ್ಲಿ ವ್ಯಾಪಾರ ಮಾಡುತ್ತಿದ್ದ ಇಲ್ಲಿನ ಗಡಿಯಾರ ಕಂಬದ ಬಳಿಯ ವ್ಯಾಪಾರಿ ನಂಬೀಶನ್ ಎಂಬವರಿಗೆ ಇಲ್ಲಿನ ಸರ್ಕಲ್ ಇನ್ಸ್‍ಪೆಕ್ಟರ್ ಕ್ಯಾತೆಗೌಡರ ಸಮ್ಮುಖದಲ್ಲಿ ಪಟ್ಟಣ ಪಂಚಾಯಿತಿ ಅಧಿಕಾರಿಗಳು ಎರಡು ಸಾವಿರ ರೂಪಾಯಿ ದಂಡ ವಿಧಿಸಿ ಬೇಕರಿಯನ್ನು ಮುಚ್ಚಿಸಿದರು.
ವೀರಾಜಪೇಟೆ ರಸ್ತೆ ಸಾರಿಗೆ ಸಂಸ್ಥೆಯ ಬಸ್ ನಿಲ್ದಾಣದಲ್ಲಿ ನಕಲಿ ಮಾಸ್ಕ್‍ಗಳನ್ನು ತಲಾ ರೂ. 30ರಂತೆ ಮಾರಾಟ ಮಾಡುತ್ತಿದ್ದ ಸಕ್ಲೇನ್ ಎಂಬವರಿಗೆ ಪಟ್ಟಣ ಪಂಚಾಯಿತಿ ಅಧಿಕಾರಿಗಳು, ಪೊಲೀಸ್ ಅಧಿಕಾರಿಗಳ ಸಮ್ಮುಖದಲ್ಲಿ ರೂ. 500 ದಂಡ ವಿಧಿಸಿ 350 ನಕಲಿ ಮಾಸ್ಕ್‍ಗಳನ್ನು ವಶ ಪಡಿಸಿಕೊಂಡರು. ಈ ಮಾಸ್ಕ್‍ಗಳನ್ನು ಇಲ್ಲಿನ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಪರಿಶೀಲನೆಗೊಳಪಡಿಸಿದಾಗ ಎಲ್ಲ ಮಾಸ್ಕ್‍ಗಳು ನಕಲಿ ಎಂದು ವೈದ್ಯರು ದೃಢಪಡಿಸಿದ ನಂತರ ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ ಎ.ಎಂ. ಶ್ರೀಧರ್ ಕ್ರಮ ಕೈಗೊಂಡಿದ್ದಾರೆ.
ವೀರಾಜಪೇಟೆಯಲ್ಲಿ ಇಂದು ಬೆಳಗಿನಿಂದ ಜನಸಂಖ್ಯೆ ವಿರಳವಾದ ಬೆನ್ನಲ್ಲೇ ಬ್ಯಾಂಕ್‍ಗಳು ತೆರೆದಿದ್ದರೂ ಅಪರಾಹ್ನ ಹನ್ನೆರಡು ಗಂಟೆ ವೇಳೆಗೆ ಗ್ರಾಹಕರು ಬ್ಯಾಂಕ್‍ನೊಳಗೆ ಬಾರದಂತೆ ಬಾಗಿಲು ಮುಚ್ಚಲಾಗಿತ್ತು.
ಪೊಲೀಸರು ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ ರಸ್ತೆ, ಮುಖ್ಯ ರಸ್ತೆಯಲ್ಲಿದ್ದ ವಾಹನ ನಿಲ್ದಾಣಗಳನ್ನು ಇಲ್ಲಿನ ಖಾಸಗಿ ಬಸ್ಸು ನಿಲ್ದಾಣ, ಮಲಬಾರ್ ರಸ್ತೆಯಲ್ಲಿರುವ ಸರಕಾರಿ ಪದವಿ ಕಾಲೇಜು ಮೈದಾನಕ್ಕೆ ಹಾಗೂ ಸಾರಿಗೆ ಸಂಸ್ಥೆ ನಿಲ್ದಾಣಕ್ಕೆ ಸ್ಥಳಾಂತರಿಸಿದ್ದರಿಂದ ಮುಖ್ಯ ರಸ್ತೆಯಲ್ಲಿ ವಾಹನ ದಟ್ಟಣೆ ಕಡಿಮೆಯಾಗಿತ್ತು. ನಿರ್ಬಂಧ ಸಡಿಲಿಕೆ ಸಮಯದಲ್ಲಿ ಕೆಲವು ಆಟೋ ರಿಕ್ಷಾಗಳು ಮಾತ್ರ ಸಂಚರಿಸುತ್ತಿದ್ದವು.
ಲಾಕ್ ಡೌನ್ ನಿರ್ಬಂಧದ ಸಮಯದಲ್ಲಿ ಪೊಲೀಸರ ಬಂದೋಬಸ್ತ್ ಮುಂದುವರೆದಿದ್ದು ಅಪರಾಹ್ನ ಹನ್ನೆರಡು ಗಂಟೆಯಾಗುತ್ತಿದ್ದಂತೆ ಪೊಲೀಸರು ಎಲ್ಲ ಅಂಗಡಿಗಳನ್ನು ಮುಚ್ಚಿಸಿದ್ದರು. ಇಲ್ಲಿನ ತರಕಾರಿ ವ್ಯಾಪಾರಿಗಳು ಫುಟ್‍ಪಾತ್‍ನಲ್ಲಿಯೂ ತರಕಾರಿಗಳನ್ನು ಮಾರಾಟ ಮಾಡಿದರು.