ಮಡಿಕೇರಿ, ಮಾ.31 : ದೇಶದಾದ್ಯಂತ ಲಾಕ್‍ಡೌನ್ ಹಿನ್ನೆಲೆ ರಸ್ತೆಗಳೆಲ್ಲ ಮುಖ್ಯವಾಗಿ ಹೆದ್ದಾರಿಗಳು, ವಾಹನ ಸಂಚಾರವಿಲ್ಲದೆ ಖಾಲಿ-ಖಾಲಿಯಾಗಿವೆ. ಇದರ ಸದುಪಯೋಗವನ್ನು ಕೆಲವು ಕಾಡುಪ್ರಾಣಿಗಳು ಪಡೆದು ವಿಶಾಲವಾಗಿ ಯಾವುದೇ ಭಯವಿಲ್ಲದೆ ರಸ್ತೆಗಳಲ್ಲಿ ಓಡಾಡುವ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ.

ನಾವು ಏನು ಕಡಿಮೆ ಇಲ್ಲ ಎಂಬಂತೆ ಆನೆಕಾಡಿನ ಆನೆ ಶಿಬಿರದ ಸಾಕಾನೆಗಳು ತಮ್ಮ ದೈನಂದಿನ ಆಹಾರವನ್ನು ಕಾಡಿನಿಂದ ಶಿಬಿರದತ್ತ ಕೊಂಡೊಯ್ಯುವ ದೃಶ್ಯ ಇಂದು ಕಂಡು ಬಂದಿತು. ವಾರಾಂತ್ಯಗಳಲ್ಲಿ ವಾಹನ ದಟ್ಟನೆಯಿಂದ ಕೂಡುತ್ತಿದ್ದ ಕುಶಾಲನಗರ-ಪಿರಿಯಾಪಟ್ಟಣ ರಸ್ತೆಯಲ್ಲಿ ಹಲವು ವಾಹನಗಳು ಶಿಸ್ತು ಪಾಲಿಸದೆ ಅಜಾಗರೂಕತೆಯಿಂದ ಅಪಘಾತಕ್ಕೆ ಎಡೆಮಾಡುತ್ತಿದ್ದವು. ಆನೆಗಳಿಗೆ ಬಸ್‍ಗಳು ಅಪ್ಪಳಿಸಿ ಆನೆ ಸಾವನ್ನಪ್ಪಿರುವ ಘಟನೆಯೂ ನಡೆದಿದೆ. ಆದರೆ ಇದೀಗ ಯಾವುದೇ ಭಯವಿಲ್ಲದೆ “ಲೇನ್ ಶಿಸ್ತು” ಪಾಲಿಸಿ ಒಂದರ ಹಿಂದೆ ಒಂದಂತೆ ಆರಾಮವಾಗಿ ಆನೆಗಳು ಶಿಬಿರದತ್ತ ಸಾಗುತ್ತಿವೆ.