ಮಡಿಕೇರಿ, ಅ.14: ಕೊಡಗಿನಲ್ಲಿ ನಡೆದ ಪ್ರಕೃತಿ ವಿಕೋಪಕ್ಕೆ ಸಂಬಂಧಿಸಿದಂತೆ ಪ್ರಕೃತಿ ಉಳಿಸುವ ನಿಟ್ಟಿನಲ್ಲಿ ಜನರಲ್ಲಿ ಜಾಗೃತಿ ಮೂಡಿಸುವ ಸಲುವಾಗಿ ಆಸ್ಟ್ರೇಲಿಯಾದ ಸಿಡ್ನಿಯ ಕಲಾವಿದೆ ಸಿಲ್ವಿಯಾ ಕೆಮರೋನ್ ನಿರ್ದೇಶಿಸಿ ಅಭಿನಯಿಸಿದ ‘ಹೀಲ್ ದಿ ವಲ್ರ್ಡ್’ ಎಂಬ ಹಾಡು ಶೀಘ್ರದಲ್ಲಿ ಬಿಡುಗಡೆಗೊಳ್ಳಲಿದೆ ಎಂದು ಸಹನಿರ್ದೇಶಕ ಅಕ್ಷಯ್ ರೈ ತಿಳಿಸಿದ್ದಾರೆ.

ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕೊಡಗಿನಲ್ಲಿ ಪ್ರಕೃತಿ ವಿಕೋಪದಿಂದ ಸಾಕಷ್ಟು ಆಸ್ತಿ ಪಾಸ್ತಿ ನಷ್ಟ, ಸಾವು-ನೋವು ಸಂಭವಿಸಿದೆ. ಪರಿಸರ ನಾಶ ಇದಕ್ಕೆ ಮೂಲ ಕಾರಣವಾಗಿದ್ದು, ಪ್ರಕೃತಿಯನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಜನರಲ್ಲಿ ಜಾಗೃತಿ ಮೂಡಿಸುವ ಅವಶ್ಯಕತೆ ಇದೆ. ಈ ಹಿನ್ನೆಲೆ ಆಸ್ಟ್ರೇಲಿಯಾದ ಸಿಡ್ನಿಯ ಕಲಾವಿದೆ ಸಿಲ್ವಿಯಾ ಕೆಮರೋನ್ ಆರ್ಕಿನಾ ಎಂಬ ಪಾತ್ರದಲ್ಲಿ ತಮ್ಮ ಹಾಡಿನ ಮೂಲಕ ಜನರಲ್ಲಿ ಪರಿಸರ ಉಳಿಸಲು ಕರೆ ನೀಡಿದ್ದು, ಈ ಸಂಬಂಧ ಕೊಡಗಿನಲ್ಲೇ ಹಾಡಿನ ಸಂಪೂರ್ಣ ಚಿತ್ರೀಕರಣ ನಡೆಸಿದ್ದಾರೆ. ಚಾನಲ್ 24 ಕರ್ನಾಟಕ ಸಹಯೋಗದೊಂದಿಗೆ ಶೀಘ್ರದಲ್ಲಿ ವೀಡಿಯೋವನ್ನು ಬಿಡುಗಡೆ ಮಾಡಲಾಗುತ್ತದೆ ಎಂದು ತಿಳಿಸಿದರು.

ಸಿಲ್ವಿಯಾ ಕೆಮರೋನ್ ಪತಿ ಇಯಾನ್ ಕೆಮರೋನ್, ನಿರ್ದೇಶಕ ಜೇರಿಯಸ್ ಥಾಮಸ್ ಅಲೆಕ್ಸಾಂಡರ್, ಚಾನಲ್ 24 ಕರ್ನಾಟಕದ ಆಸೀಪ್, ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.