ಮೂರ್ನಾಡು: ಇಲ್ಲಿನ ನವಚೇತನ ಆಟೋ ಮಾಲೀಕರ ಮತ್ತು ಚಾಲಕರ ಸಂಘದ ವತಿಯಿಂದ ಸಾಮೂಹಿಕ ಆಯುಧ ಪೂಜೆಯನ್ನು ಬಾಚೆಟ್ಟಿರ ಲಾಲು ಮುದ್ದಯ್ಯ ಕ್ರೀಡಾಂಗಣದಲ್ಲಿ ನೆರೆವೇರಿಸಲಾಯಿತು. ಸಂಘದ ಅಧ್ಯಕ್ಷ ಹೆಚ್.ಸಿ. ಸತೀಶ್, ಉಪಾಧ್ಯಕ್ಷ ಆಶೀಫ್, ಪ್ರಧಾನ ಕಾರ್ಯದರ್ಶಿ ಗಣೇಶ್, ಕಾರ್ಯದರ್ಶಿ ಪ್ರಶಾಂತ್, ಖಜಾಂಚಿ ವೇಣುಗೋಪಾಲ್ ಹಾಗೂ ಸದಸ್ಯರುಗಳು ಹಾಜರಿದ್ದರು.

ನಾಪೋಕ್ಲು: ಸಮೀಪದ ನರಿಯಂದಡ ಗ್ರಾಮದ ಅಯ್ಯಪ್ಪ ಯುವಕ ಸಂಘದ ವತಿಯಿಂದ ಸಾಮೂಹಿಕ ಆಯುಧಾ ಪೂಜಾ ಕಾರ್ಯಕ್ರಮ ನಡೆಯಿತು. ಅಧ್ಯಕ್ಷ ತೋಟಂಬೈಲು ಅನಂತಕುಮಾರ್ ಅಧ್ಯಕ್ಷತೆ ವಹಿಸಿದ್ದರು.

ಪೆರಾಜೆ: ಸಾರ್ವಜನಿಕ ಶ್ರೀ ಶಾರದಾಂಬ ಉತ್ಸವ ಸಮಿತಿ ಪೆರಾಜೆ ವತಿಯಿಂದ 15ನೇ ವರ್ಷದ ಶಾರದಾಂಬ ಉತ್ಸವವು ಪೆರಾಜೆಯ ಅನ್ನಪೂರ್ಣೇಶ್ವರಿ ಕಲಾಮಂದಿರದಲ್ಲಿ ನಡೆಯಿತು. ಇದರ ಪ್ರಯುಕ್ತ ತ್ರಿಮದರ ಯುಕ್ತ ಸಹಸ್ರ ಕದಳಿ-ಲಲಿತಾ ಸಹಸ್ರನಾಮ, ಮಹಾಗಣಪತಿ ಹೋಮ ನಡೆದು ತದನಂತರ ಶಾರದಾಂಬ ಪ್ರತಿಷ್ಠಾಪನೆ ನಡೆಯಿತು.

ಕೋಲ್ಚಾರು ಶಾರದಾಂಬ ಭಜನ ಸಂಘದ ವತಿಯಿಂದ ಭಜನೆ, ಹೋಮ,ಶಾಲಾ ಮಕ್ಕಳಿಗೆ ಸ್ಪರ್ಧೆಗಳು, ಅಕ್ಷರಾಭ್ಯಾಸ, ಪೂರ್ಣಾಹುತಿ, ಮಹಾಪೂಜೆ, ಪ್ರಸಾದ ವಿತರಣೆ ನಡೆಯಿತು ವಿವಿಧ ಕ್ಷೇತ್ರದಲ್ಲಿ ಸಾಧನೆ ಹಾಗೂ ಸೇವೆ ಮಾಡಿದವರನ್ನು ಸನ್ಮಾನಿಸಲಾಯಿತು.

ಮುಖ್ಯ ಅತಿಥಿಗಳಾಗಿ ಪೆರಾಜೆ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಜಯಲಕ್ಷ್ಮಿ ಧರಣೀಧರ, ತಾಲೂಕು ಪಂಚಾಯಿತಿ ಸದಸ್ಯ ನಾಗೇಶ್ ಕುಂದಲ್ಪಾಡಿ, ಸುದ್ದಿ ಸಂಸ್ಥೆಯ ವ್ಯವಸ್ಥಾಪಕ ಡಾ. ಯು.ಪಿ. ಶಿವಾನಂದ, ಉತ್ಸವ ಸಮಿತಿ ಪದಾಧಿಕಾರಿಗಳಾದ ವೇದವ್ಯಾಸ, ಉಮೇಶ್, ತಿರುಮಲೇಶ್ವರ, ದಾಸಪ್ಪ ಸೇರಿದಂತೆ ಜನಪ್ರತಿನಿಧಿಗಳು ಗ್ರಾಮಸ್ಥರು ಉಪಸ್ಥಿತರಿದ್ದರು.ಸೋಮವಾರಪೇಟೆ: ವಿಜಯದಶಮಿ ಪ್ರಯುಕ್ತ ಕಳೆದ ಒಂಭತ್ತು ದಿನಗಳಿಂದ ನಡೆದ ವಿವಿಧ ಪೂಜಾ ಕಾರ್ಯಕ್ರಮಗಳಿಗೆ ಮಂಗಳವಾರ ತೆರೆಬಿದ್ದಿತು. ದಿನಕ್ಕೊಂದು ಅಲಂಕಾರದೊಂದಿಗೆ ವಿವಿಧ ಪೂಜಾ ಕಾರ್ಯಗಳೂ ಬಸವೇಶ್ವರ ಹಾಗೂ ಸೋಮೇಶ್ವರ ದೇವಾಲಯ ಸೇರಿದಂತೆ ವಿವಿಧ ದೇವಾಲಯಗಳಲ್ಲಿ ನಡೆದವು.

ನವಮಿಯಂದು ಬ್ರಾಹ್ಮಣ ಸಮಾಜದ ಸೋಮೇಶ್ವರ ದೇವಾಲಯದಲ್ಲಿ ದೇವಿಗೆ ಬೆಳ್ಳಿ ಕವಚ ಅಲಂಕಾರ ಸೇರಿದಂತೆ ವಿವಿಧ ಪೂಜೆಗಳು ನಡೆಯಿತು. ದಶಮಿಯಂದು ದೇವಿಯ ಮೂರ್ತಿಯನ್ನು ಅಲಂಕೃತ ಮಂಟಪದಲ್ಲಿಟ್ಟು, ಪಟ್ಟಣ ಪ್ರಮುಖ ರಸ್ತೆಗಳಲ್ಲಿ ಡೊಳ್ಳು ಕುಣಿತ, ಕಂಸಾಳೆ ಸೇರಿದಂತೆ ಮೆರವಣಿಗೆಯ ಮೂಲಕ ಆನೆಕೆರೆ ಬಳಿ ಬಂದು ಬನ್ನಿಯನ್ನು ಸ್ನೇಹ ಧ್ಯೋತಕವಾಗಿ ಹಂಚಿ, ನಂತರ ಆನೆಕೆರೆಯಲ್ಲಿ ಉತ್ಸವ ಮೂರ್ತಿಯನ್ನು ವಿಸರ್ಜಿಸಲಾಯಿತು. ಬಸವೇಶ್ವರ ದೇವಾಲಯದಲ್ಲಿ ನವದುರ್ಗಾ ದೇವಿಗೆ ವಿಶೇಷ ತಿನಿಸುಗಳ ಅಲಂಕಾರ ಮಾಡಲಾಗಿತ್ತು. ನಂತರ ದೇವಿ ಮಹಾತ್ಮೆ ಪಾರಾಯಣ ಮುಕ್ತಾಯ ಹಾಗೂ ಬನ್ನಿ ಮುಡಿದು, ವಿಜಯದಶಮಿ ಆಚರಣೆ ನಡೆಸಲಾಯಿತು. ಶ್ರೀ ಅಮ್ಮನವರಿಗೆ ಉಯ್ಯಾಲೋತ್ಸವ, ಕುಂಕುಮಾರ್ಚನೆ, ಮಹಾಮಂಗಳಾರತಿ ನಡೆಯಿತು.

ಸುಂಟಿಕೊಪ್ಪ: ಕಂಬಿಬಾಣೆಯ ಶ್ರೀ ರಾಮ ಮತ್ತು ಶ್ರೀ ಚಾಮುಂಡೇಶ್ವರಿ ದೇವಸ್ಥಾನ ವತಿಯಿಂದ 64ನೇ ವರ್ಷದ ನವರಾತ್ರಿಯ ಅಂಗವಾಗಿ ದೇವಸ್ಥಾನವನ್ನು ವಿದ್ಯುತ್ ದೀಪಗಳಿಂದ ಅಲಂಕರಿಸಲಾಗಿತ್ತು. ಆರಂಭಿಕ ದಿನವಾದ ದೇವಸ್ಥಾನದಲ್ಲಿ ಗಣಹೋಮದೊಂದಿಗೆ ಚಾಲನೆ ನೀಡಲಾಯಿತು.

ನವರಾತ್ರಿಯ ಅಂಗವಾಗಿ ವಿವಿಧ ಪೂಜಾ ಕೈಂಕರ್ಯ, ಸಾಂಸ್ಕøತಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿತ್ತು. ಗ್ರಾಮಸ್ಥರು ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡು ಉಲ್ಲಾಸವನ್ನು ಹಂಚಿಕೊಂಡರು.

ತಾ. 4 ರಂದು ದುರ್ಗಾಪೂಜೆ ಹೋಮ, ತಾ. 6 ರಂದು ಝೇಂಕಾರ ವಾದ್ಯಗೋಷ್ಠಿ ತಂಡದ ವತಿಯಿಂದ ರಸಮಂಜರಿ ಕಾರ್ಯಕ್ರಮ ಜನಮನ ತಣಿಸಿತು. ತಾ. 7 ರಂದು ಸಂಜೆ 6 ಗಂಟೆಯಿಂದ ವಾಹನ ಪೂಜೆಗಳು, ತಾ. 8 ರಂದು ರಾತ್ರಿ 7 ಗಂಟೆಯಿಂದ ಶ್ರೀ ರಾಮ ಮತ್ತು ಶ್ರೀ ಚಾಮುಂಡೇಶ್ವರಿ ದೇವಸ್ಥಾನದ ವಿದ್ಯುತ್ ಅಲಂಕೃತ ಮಂಟಪ, ಚಿಕ್ಲಿಹೊಳೆಯ ಶ್ರೀ ಚಾಮುಂಡೇಶ್ವರಿ ದೇವಸ್ಥಾನದ ವಿದ್ಯುತ್ ಅಲಂಕೃತ ಮಂಟಪಗಳು ಕಂಬಿಬಾಣೆಯ ಪ್ರಮುಖ ಬೀದಿಗಳಲ್ಲಿ ವಾದ್ಯಗೋಷ್ಠಿಯೊಂದಿಗೆ ಮೆರವಣಿಗೆ ಸಾಗಿದವು.

ದೇವಸ್ಥಾನ ಆಡಳಿತ ಮಂಡಳಿ ಅಧ್ಯಕ್ಷ ಶಶಿಕಾಂತ ರೈ, ಕಾರ್ಯದರ್ಶಿ ಜವಾಹರ್, ಖಜಾಂಚಿ ಆನಂದ, ಮಂಜುನಾಥ್, ಜಯಂತ್ ಕುಮಾರ್, ರವಿ, ಸಿದ್ಧಪ್ಪ, ಕೃಷ್ಣ, ಹಾಗೂ ದಿನೇಶ್ ಮತ್ತಿತರರು ಇದ್ದರು.

ಚೆಟ್ಟಳ್ಳಿ: ಕುಶಾಲನಗರದ ನಿಸರ್ಗಧಾಮ ಟೂರಿಸ್ಟ್ ಸೆಂಟರ್‍ನಲ್ಲಿ ಜಾತಿ, ಧರ್ಮವನ್ನು ಬದಿಗಿಟ್ಟು ಎಲ್ಲಾ ಹಬ್ಬ ಹರಿದಿನಗಳನ್ನು ಆಚರಿಸುತ್ತಾ ಬರುತ್ತಿದ್ದು, ನಿಸರ್ಗಧಾಮ ಟೂರಿಸ್ಟ್ ಸೆಂಟರ್‍ನಲ್ಲಿ ಎನ್.ಟಿ.ಸಿ. ವರ್ತಕರು ಆಯುಧ ಪೂಜೆಯನ್ನು ಆಚರಿಸಿ ಗಮನ ಸೆಳೆದರು.

ಪ್ರತೀ ವರ್ಷ ನಿಸರ್ಗಧಾಮ ಟೂರಿಸ್ಟ್ ಸೆಂಟರ್‍ನಲ್ಲಿ ಗಣೇಶ ಚತುರ್ಥಿ, ರಂಜಾನ್, ಕ್ರಿಸ್‍ಮಸ್, ಕೈಲ್ ಪೊಳ್ದ್ ಸೇರಿದಂತೆ ಸರ್ವ ಧರ್ಮಿಯರ ಹಬ್ಬವನ್ನು ಇಲ್ಲಿನ ವರ್ತಕರು ಒಗ್ಗೂಡಿ ಆಚರಿಸುವದು ಇಲ್ಲಿನ ವಿಶೇಷ. ಅದರಂತೆ ಆಯುಧಪೂಜೆಯ ಅಂಗವಾಗಿ ಎನ್.ಟಿ.ಸಿ.ಯ ಅಂಗಡಿ ಮಳಿಗೆಗಳಿಗೆ ಹಾಗೂ ವಾಹನಗಳಿಗೆ ಪೂಜೆ ಸಲ್ಲಿಸಲಾಯಿತು.

ಕಳೆದ ಮೂರು ದಿನಗಳಿಂದ ಸರ್ಕಾರಿ ರಜಾ ದಿನಗಳಿದ್ದ ಹಿನ್ನೆಲೆ ಪ್ರವಾಸಿಗರು ಕೊಡಗಿನ ಪ್ರವಾಸಿತಾಣಗಳಿಗೆ ಭೇಟಿ ನೀಡುತ್ತಿದ್ದು, ಪ್ರವಾಸಿ ತಾಣಗಳು ಪ್ರವಾಸಿಗರಿಂದ ನೆರೆದು ಕಂಗೊಳಿಸುತ್ತಿವೆ. ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸುತ್ತಿರುವ ಹಿನ್ನೆಲೆ ಪ್ರವಾಹದಿಂದ ಕಂಗಾಲಾಗಿದ್ದ ಎನ್.ಟಿ.ಸಿ. ವರ್ತಕರ ಮೊಗದಲ್ಲಿ ಸಂತಸ ಮೂಡಿದೆ.

ಈ ಸಂದರ್ಭ ಎನ್.ಟಿ.ಸಿ. ಮಾಲೀಕ ಅಬ್ದುಲ್ ಸಲಾಂ ರಾವತರ್, ಕಚೇರಿ ಮುಖ್ಯಸ್ಥ ರಮೇಶ್, ವ್ಯವಸ್ಥಾಪಕ ಹಕೀಂ, ವರ್ತಕರಾದ ದಿನೇಶ್, ಲೋಕೇಶ್, ಮುರುಳಿ, ತಪಾಸ್ ಹಾಗೂ ಇನ್ನಿತರರು ಇದ್ದರು.

ಮೂರ್ನಾಡು: ಕೋಡಂಬೂರು ಶ್ರೀ ಭದ್ರಕಾಳಿ ದೇವಸ್ಥಾನದ ಸಾನಿಧ್ಯದಲ್ಲಿ ನವರಾತ್ರಿ ಉತ್ಸವ ಅಂಗವಾಗಿ ವಿಶೇಷವಾದ ವಿವಿಧ ಪೂಜಾ ಕಾರ್ಯಕ್ರಮಗಳು ನಡೆದವು.

ನವರಾತ್ರಿ ಉತ್ಸವದ ಅಂಗವಾಗಿ ದೇವಿಗೆ ಅಲಂಕಾರ ಪೂಜೆ ಮತ್ತು ರಂಗಪೂಜೆ ನಡೆಯಿತು. ಬಾದಾಮಿ, ಹಸಿದ್ರಾಕ್ಷಿ, ದಾಳಿಂಬೆ, ಅರಶಿನ, ಕಡಲೆ, ಬಟಾಣಿ, ಗೋಡಂಬಿ, ದ್ರಾಕ್ಷಿ, ಕುಂಕುಮ ಹಾಗೂ ಹಸಿಜೋಳದ ಧಾನ್ಯಗಳಿಂದ ಅಲಂಕಾರ ಪೂಜೆಯನ್ನು ಮಾಡಲಾಯಿತು. ಇದಲ್ಲದೆ ರಂಗಪೂಜೆ, ಕುಂಕುಮಾರ್ಚನೆ, ದೀಪಾರಾದನೆ, ಮಹಾಪೂಜೆಗಳು ಜರಗಿದವು.

ಅರ್ಚಕ ರಘುಪತಿ ಭಟ್ ನೇತೃತ್ವದಲ್ಲಿ ನಡೆದ ಪೂಜೆಯಲ್ಲಿ ಕೋಡಂಬೂರು ಮತ್ತು ಸುತ್ತಮುತ್ತಲಿನ ಗ್ರಾಮದ ಭಕ್ತಾದಿಗಳು ಪಾಲ್ಗೊಂಡಿದ್ದರು. ಭಕ್ತಾದಿಗಳಿಗೆ ಪ್ರಸಾದ, ಅನ್ನದಾನವನ್ನು ವ್ಯವಸ್ಥೆ ಮಾಡಲಾಗಿತ್ತು ಎಂದು ದೇವಸ್ಥಾನ ಸಮಿತಿಯ ಅಧ್ಯಕ್ಷ ಮೂಡೇರ ಅಶೋಕ್ ಅಯ್ಯಪ್ಪ ತಿಳಿಸಿದರು.