ಕೂಡಿಗೆ, ಅ. 10: 2018ರಲ್ಲಿ ಕೊಡಗಿನಲ್ಲಿ ಸಂಭವಿಸಿದ ಜಲ ಪ್ರಯಳಯದ ಸಂದರ್ಭ ಹಾರಂಗಿ-ಕಾವೇರಿ ನದಿಯ ಸಂಗಮದ ದಡದ ಸಮೀಪದ ಜಮೀನಿನಲ್ಲಿ ವಾಸವಿದ್ದ ಯೋಗೇಶ್ ಮನೆ ನೆಲಸಮಗೊಂಡು ಸಂತ್ರಸ್ತರಾಗಿದ್ದರು.

ಇದನ್ನು ತಿಳಿದ ವೀರಶೈವ ಯುವ ವೇದಿಕೆಯ ರಾಜ್ಯಾಧ್ಯಕ್ಷ ಪ್ರಶಾಂತ್ ಕಲ್ಲೂರ್ ಅವರು ತಮ್ಮ ಸ್ವಂತ ಖರ್ಚಿನಲ್ಲಿ ಕೂಡು ಮಂಗಳೂರಿನ ಯೋಗೇಶ್ ಅವರಿಗೆ ಮನೆಯನ್ನು ನಿರ್ಮಿಸಿಕೊಡುವ ಉದ್ದೇಶದಿಂದ ಸಿದ್ಧಗಂಗಾ ಶ್ರೀಗಳ ಆಶೀರ್ವಾದದಿಂದ ಇಟ್ಟಿಗೆಗಳನ್ನು ತಂದು ಭೂಮಿ ಪೂಜೆ ನೆರವೇರಿಸಿದ್ದರು. ಇದೀಗ ರೂ.7 ಲಕ್ಷ ವೆಚ್ಚದ ಮನೆ ನಿರ್ಮಾಣ ಕಾಮಗಾರಿ ಶೇ.90ರಷ್ಟು ಮುಗಿದಿದೆ.

ಇದೀಗ ಕಿರಿಕೊಡ್ಲಿ ಮಠದ ಸದಾಶಿವ ಸ್ವಾಮೀಜಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಈ ಸಂದರ್ಭ ಮನೆಗೆ ಸಿದ್ಧಗಂಗಾ ನಿಲಯ ಎಂದು ಹೆಸರಿಟ್ಟು, ನವೆಂಬರ್ 5 ರಂದು ಸಿದ್ಧಗಂಗಾ ಮಠಾಧೀಶರಾದ ಶ್ರೀ ಸಿದ್ಧಲಿಂಗ ಮಹಾಸ್ವಾಮೀಜಿಗಳು ಮನೆಯನ್ನು ಹಸ್ತಾಂತರಿಸಲಿದ್ದಾರೆ ಎಂದರು. ಈ ಸಂದರ್ಭ ಕೂಡು ಮಂಗಳೂರು ವೀರಶೈವ ಸಮಾಜದ ಅಧ್ಯಕ್ಷ ವಿಶ್ವೇಶ್ವರಯ್ಯ, ಮುಖಂಡರಾದ ಮಂಜುನಾಥ್, ಹರೀಶ್ ಸೇರಿದಂತೆ ಪದಾಧಿಕಾರಿಗಳು ಇದ್ದರು.