ವೀರಾಜಪೇಟೆ, ಅ. 10: ಅಮ್ಮತ್ತಿ ಒಂಟಿಅಂಗಡಿಯಲ್ಲಿರುವ ಬೈರಂಬಾಡ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದಲ್ಲಿ ಹಿಂದಿನ ಆಡಳಿತ ಮಂಡಳಿಯಿಂದ ರೂ. ಒಂದು ಕೋಟಿಗೂ ಅಧಿಕ ಹಣ ದುರುಪಯೋಗಗೊಂಡಿರುವದನ್ನು ಪ್ರಸ್ತುತ ಆಡಳಿತ ಮಂಡಳಿ ಪತ್ತೆ ಹಚ್ಚಿದ್ದು ಸಂಘದ ಹಿಂದಿನ ಹತ್ತು ವರ್ಷಗಳ ಲೆಕ್ಕ ಪರಿಶೋಧನೆ ಮಾಡಲು ತುರ್ತು ಕ್ರಮ ಕೈಗೊಂಡಿರುವದಾಗಿ ಸಂಘದ ಅಧ್ಯಕ್ಷ ಎಂ.ಕೆ.ನಾಚಪ್ಪ ತಿಳಿಸಿದ್ದಾರೆ.ಇಲ್ಲಿನ ಪ್ರೆಸ್‍ಕ್ಲಬ್‍ನಲ್ಲಿ ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ನಾಚಪ್ಪ ಅವರು ಹಿಂದಿನ ಆಡಳಿತ ಮಂಡಳಿಯಿಂದ ಹಣ ದುರುಪಯೋಗ ಮಾಡಿರುವ ಬಗ್ಗೆ ಕೆಲವರು ಈಗಿನ ಆಡಳಿತ ಮಂಡಳಿಯ ಮೇಲೆ ಆರೋಪ ಹೊರಿಸಿ ಅಪಪ್ರಚಾರ ಮಾಡುತ್ತಿ ರುವದು ಸರಿಯಲ್ಲ. ಸಂಘದ ಕಾರ್ಯ ದರ್ಶಿಯ ಕಣ್ತಪ್ಪಿನಿಂದ ಹಾಗೂ ಕೇಂದ್ರ ಸಹಕಾರ ಬ್ಯಾಂಕ್‍ನ ಅಮ್ಮತ್ತಿ ಶಾಖೆಯ
(ಮೊದಲ ಪುಟದಿಂದ) ಬೇಜವಾಬ್ದಾರಿಕೆ ಯಿಂದ ಎಂ.ಕೆ.ಬೋಪಯ್ಯ ಅವರ ಖಾತೆಗೆ ರೂ ಹತ್ತು ಲಕ್ಷ ಜಮಾವಣೆಯಾಗಿದ್ದನ್ನು ವಸೂಲಾತಿ ಮಾಡಿ ಪುನ: ಸಂಘದ ಖಾತೆಗೆ ಜಮಾ ಮಾಡಲಾಗಿದೆ. ಸಂಘದ ಗುಮಾಸ್ತೆ ಕೆ.ಎನ್.ರಾಜೇಶ್ವರಿ ಅವರು ಸಂಘದ ಹಣ ದುರುಪಯೋಗದಲ್ಲಿ ಭಾಗಿಯಾಗಿರುವದರಿಂದ ಅವರನ್ನು ಸೇವೆಯಿಂದ ಅಮಾನತುಗೊಳಿಸಲಾಗಿದೆ. ಈ ಹಿಂದೆ ಸಂಘದ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿ ಈಗ ನಿವೃತ್ತಿ ಹೊಂದಿರುವ ಎಂ.ಕೆ.ಪಾರ್ವತಿ ಹಾಗೂ ಸಿಬ್ಬಂದಿ ಕೆ.ಎನ್.ರಾಜೇಶ್ವರಿಯವರು ಸಂಘದ ಸದಸ್ಯರ ಸಂಚಯ ಖಾತೆಯ ಠೇವಣಿ ಹಣದಲ್ಲಿ ರೂ 4,57,636 ಹಣ ವ್ಯತ್ಯಾಸ ಕಂಡು ಬಂದಿದ್ದು, (ಖೋತಾ) ಇದರ ವಸೂಲಿಗಾಗಿ ಇಬ್ಬರಿಗೂ ನೋಟೀಸ್ ಜಾರಿ ಮಾಡಲಾಗಿದೆ. ಇಲಾಖೆಯ ಮೇಲಧಿಕಾರಿಗಳಿಗೂ ದೂರು ನೀಡಿದ್ದು ಪೊಲೀಸ್ ಇಲಾಖೆಗೂ ದೂರು ನೀಡಲಾಗಿದೆ ಎಂದರು.
ಹಿಂದಿನ ಆಡಳಿತ ಮಂಡಳಿಯ ಅವಧಿಯಲ್ಲಿ ಸಂಘದ ಸದಸ್ಯರುಗಳ ಅರವತ್ತಕ್ಕೂ ಹೆಚ್ಚಿನ ಖಾತೆಗಳಲ್ಲಿ ನಮೂದಿಸಿದ್ದ ರೂಪಾಯಿಗಳ ಮೌಲ್ಯದ ಸಂಖ್ಯೆಗಳನ್ನು ಬಿಳಿ ಶಾಯಿಯಿಂದ (ವೈಟನರ್ ಪೆನ್) ಅಳಿಸಿ ಹಣವನ್ನು ದುರುಪಯೋಗಪಡಿಸಿರುವದು ಲೆಕ್ಕ ಪತ್ರಗಳ ಲೆಡ್ಜರ್‍ಗಳ ಪರಿಶೀಲನೆಯಿಂದ ಗೊತ್ತಾಗಿದೆ. ಸುಮಾರು ನಾಲ್ಕಕ್ಕೂ ಅಧಿಕ ದಾಖಲೆಯ ಲೆಡ್ಜರ್‍ಗಳು ಇತರ ದಾಖಲೆಗಳು ಸಂಘದಿಂದ ನಾಪತ್ತೆಯಾಗಿರುವದಾಗಿ ನಾಚಪ್ಪ ತಿಳಿಸಿದರು.
ಗೋಷ್ಠಿಯಲ್ಲಿ ಸಂಘದ ನಿರ್ದೇಶಕರುಗಳಾದ ವಿ.ಆರ್.ಹರೀಶ್, ಎಸ್.ಪಿ.ದೇವಯ್ಯ, ಬಿ.ಪಿ.ಗಣಪತಿ, ಎ.ಎಂ.ಕುಶಾಲಪ್ಪ ಹಾಗೂ ವ್ಯವಸ್ಥಾಪಕ ವಿ.ಸಿ.ತಮ್ಮಯ್ಯ ಹಾಜರಿದ್ದರು.