ಗೋಣಿಕೊಪ್ಪ ವರದಿ, ಏ. 19 : ಕೊಡಗು ಹಿಂದೂ ಮಲಯಾಳಿ ಸಮಾಜದ ವತಿಯಿಂದ ಆಯೋಜಿಸಿರುವ ಕೊಡಗು ಹಿಂದೂ ಫುಟ್ಭಾಲ್ ಕಪ್ ಟೂರ್ನಿಗೆ ಇಲ್ಲಿನ ಸರ್ಕಾರಿ ಪ್ರಾಥಮಿಕ ಶಾಲಾ ಮೈದಾನದಲ್ಲಿ ಚಾಲನೆ ನೀಡಲಾಯಿತು. ಹಿರಿಯ ಫುಟ್ಭಾಲ್ ಕ್ರೀಡಾಪಟು ಕಳ್ಳಿಚಂಡ ಪ್ರಸಾದ್ ದೀಪ ಬೆಳಗಿಸುವ ಮೂಲಕ ಸಭಾ ಕಾರ್ಯಕ್ರಮ ಉದ್ಘಾಟಿಸಿ, ಚೆಂಡು ತಳ್ಳುವ ಮೂಲಕ ಕ್ರೀಡಾಕೂಟಕ್ಕೆ ಚಾಲನೆ ನೀಡಿದರು. ನಂತರ ಮಾತನಾಡಿ, ಕ್ರೀಡಾಕೂಟಗಳು ಆಟಗಾರರಿಗೆ ಅವಕಾಶ ಕಲ್ಪಿಸುತ್ತದೆ. ಇದನ್ನು ಅರಿತು ಅವಕಾಶ ಸದುಪಯೋಗ ಪಡೆಯುವಲ್ಲಿ ಆಟಗಾರರು ಸಫಲರಾಗಬೇಕು ಎಂದರು.

ಕೊಡಗು ಹಿಂದೂ ಮಲಯಾಳಿ ಸಮಾಜದ ಅಧ್ಯಕ್ಷ ಪಿ. ಎಸ್. ಶರತ್‍ಕಾಂತ್ ಮಾತನಾಡಿ, ಹಿಂದೂ ಫುಟ್ಭಾಲ್ ಮೂಲಕ ಎಲ್ಲಾರನ್ನೂ ಒಂದುಗೂಡಿಸುವ ಪ್ರಯತ್ನ ನಡೆಸಲಾಗುತ್ತಿದೆ. ಸಮಾಜದ ಸದಸ್ಯರು ಒಂದಾಗಲು ಸಾಧ್ಯವಾಗಲಿದೆ ಎಂದರು.

ಸ್ಥಳೀಯ ಗ್ರಾಮ ಪಂಚಾಯ್ತಿ ಅಧ್ಯಕ್ಷೆ ಸೆಲ್ವಿ, ಜಿ. ಪಂ. ಸದಸ್ಯೆ ಶ್ರೀಜಾ ಶಾಜಿ, ಮಲಯಾಳಿ ಸಮಾಜದ ಗೌರವ ಅಧ್ಯಕ್ಷ ಪಿ, ಭಾಸ್ಕರನ್, ಕಾನೂನು ಸಲಹೆಗಾರ ಕೆ. ಬಿ. ಸಂಜೀವನ್,

ಕೆಎನ್‍ಎಸ್‍ಎಸ್ ಗೋಣಿಕೊಪ್ಪ ಶಾಖೆ ಅಧ್ಯಕ್ಷ ಪಿ. ಈ. ಪವಿತ್ರನ್, ವಿಶ್ವಕರ್ಮ ಸಮಾಜ ಗೋಣಿಕೊಪ್ಪ ಶಾಖೆ ಅಧ್ಯಕ್ಷ ಕೆ. ಎ. ವಿನೋದ್, ಸಮಾಜದ ಪ್ರ. ಕಾರ್ಯದರ್ಶಿ ವಿ.ವಿ. ಅರುಣ್‍ಕುಮಾರ್, ಖಜಾಂಜಿ ಸುಬ್ರಮಣಿ ಉಪಸ್ಥಿತರಿದ್ದರು. ಅನುಷಾ ಪ್ರಾರ್ಥಿಸಿದರು. ಸುಬ್ರಮಣಿ ವಂದಿಸಿದರು. ತಾ. 21 ರವರೆಗೆ ನಡೆಯುವ ಕ್ರೀಡಾಕೂಟದಲ್ಲಿ 30 ತಂಡಗಳು ಪಾಲ್ಗೊಂಡಿವೆ.

- ಸುದ್ದಿಪುತ್ರ