ಮಡಿಕೇರಿ, ಮಾ. 27: 2018ರ ಇಸವಿಯಲ್ಲಿ ಬೇಸಿಗೆಯ ಸಂದರ್ಭದಿಂದಲೇ ಕೊಡಗು ಜಿಲ್ಲೆಯ ಬಹುತೇಕ ಕಡೆಗಳಲ್ಲಿ ಆಗಿಂದಾಗ್ಗೆ ಮಳೆ ಸುರಿದಿರುವದು ಹಾಗೂ ಮಳೆಗಾಲ ಆರಂಭದಿಂದಲೇ ಇನ್ನಷ್ಟು ಪ್ರತಾಪ ತೋರಿರುವ ಮಳೆ ಜಿಲ್ಲೆಯಲ್ಲಿ ಪ್ರಾಕೃತಿಕ ವಿಕೋಪವನ್ನೂ ಸೃಷ್ಟಿಸಿರುವ ಘಟನೆ ಇನ್ನೂ ಎಲ್ಲರ ನೆನಪಿನಲ್ಲಿದೆ. ಆಗಸ್ಟ್, ಸೆಪ್ಟೆಂಬರ್ ಹಾಗೂ ಅಕ್ಟೋಬರ್ ತಿಂಗಳಿನಲ್ಲೂ ಮಳೆಯಾಗಿದ್ದು, ಹಲವಾರು ಅವಾಂತರಗಳು ಸೃಷ್ಟಿಯಾಗಿದ್ದವು.ಆದರೆ ಆ ನಂತರ ವರುಣ ಮರೆಯಾದಂತಿದೆ. ಪ್ರಸಕ್ತ ವರ್ಷವಾದ 2019ರಲ್ಲಿ ಕೃಷಿ ಪ್ರಧಾನವಾದ ಅದರಲ್ಲೂ ಜಿಲ್ಲೆಯ ಆರ್ಥಿಕತೆಯ ಬೆನ್ನೆಲುವಾದ ಕಾಫಿ ಬೆಳೆಗೆ ಅಗತ್ಯವಾಗಿರುವ ಈ ವೇಳೆಗಾಗಲೇ ನಡು ನಡುವೆ ಸುರಿಯಬೇಕಾಗಿದ್ದ ಮಳೆ ಜಿಲ್ಲೆಯ ಬಹುತೇಕ ಕಡೆಗಳಲ್ಲಿ ಬಿದ್ದಿಲ್ಲ. ಕೆಲವೇ ಕೆಲವು ಪ್ರದೇಶಗಳಲ್ಲಿ ಒಂದಷ್ಟು ಅಧಿಕ ಹಾಗೂ ಇನ್ನು ಹಲವೆಡೆ ಕೇವಲ ಮಳೆಯ ಸಿಂಚನವಾಗಿರುವದನ್ನು ಹೊರತುಪಡಿಸಿದರೆ, ಜಿಲ್ಲೆಯ ಜನತೆ ನಿರೀಕ್ಷಿಸುತ್ತಿರುವ ಬೇಸಿಗೆ ಸಂದರ್ಭ ಹೂ ಮಳೆಯಾಗಿಲ್ಲ. ಇದೀಗ ಮಾರ್ಚ್ ತಿಂಗಳು ಪೂರ್ಣಗೊಳ್ಳುತ್ತಿದ್ದು, ಬೇಸಿಗೆಯ ಪರ್ವ ಕಾಲವೂ ಮುಂದುವರಿಯುತ್ತಿದೆ. ರಾತ್ರಿ ವೇಳೆಯಲ್ಲಿ ವಾತಾವರಣ ತುಸು ತಂಪೆರೆಯುತ್ತಿದ್ದರೂ, ಹಗಲಿನ ವೇಳೆಯಲ್ಲಿ ಬಿಸಿಲಿನ ಪ್ರಖರತೆ ದಿನೇ ದಿನೇ ಹೆಚ್ಚಾಗುತ್ತಿದೆ. ನೀರು ಕಾಣದ ಕಾಫಿ ತೋಟಗಳು, ಕರಿಮೆಣಸು ಬಳ್ಳಿಗಳು ಸೊರಗುತ್ತಿದೆ, ಏರುತ್ತಿರುವ ತಾಪಮಾನದಿಂದಾಗಿ ಜನತೆಯೂ ಬಿಸಿಲಿನ ಧಗೆಯನ್ನು ಅನುಭವಿಸುತ್ತಿದ್ದಾರೆ. ಇದು ಮಾತ್ರವಲ್ಲ ಎಲ್ಲಾ ಜಲಮೂಲಗಳಲ್ಲಿ ನದಿಗಳಲ್ಲಿ ನೀರು ಕ್ಷೀಣಗೊಳ್ಳುತ್ತಿದ್ದು, ಕುಡಿಯುವ ನೀರಿಗೂ ಹಾಹಾಕಾರ ಕಂಡು ಬರುತ್ತಿದೆ. ಪಟ್ಟಣ, ನಗರ ಪ್ರದೇಶಗಳಲ್ಲಿ ನೀರು ಪೂರೈಕೆಗೂ ಇದರಿಂದಾಗಿ ಸಮಸ್ಯೆ ಉಲ್ಬಣಗೊಳ್ಳುತ್ತಿದ್ದು, ಇನ್ನೂ ಬೇಸಿಗೆಯ ಸಮಯ ಹಲವಷ್ಟು ಇರುವದು ಈಗಿನಿಂದಲೇ ಆತಂಕವನ್ನು ಸೃಷ್ಟಿಸುತ್ತಿದೆ. ಜಿಲ್ಲೆಯ ಬಹುತೇಕ ಭಾಗದಲ್ಲಿ ಉಷ್ಣಾಂಶ ಹೆಚ್ಚಾಗುತ್ತಿದೆ.

(ಮೊದಲ ಪುಟದಿಂದ) ಜಿಲ್ಲಾ ಕೇಂದ್ರವಾದ ಮಡಿಕೇರಿಯಲ್ಲಿ ತಾ. 25 ರಂದು ಈ ವರ್ಷದ ಅತಿ ಹೆಚ್ಚಿನ ಉಷ್ಣಾಂಶ 32.5 ಡಿಗ್ರಿಯಷ್ಟು ದಾಖಲಾಗಿದೆ.

ಕುಶಾಲನಗರದಲ್ಲಿ ಈಗಾಗಲೇ ಟ್ಯಾಂಕರ್ ಮೂಲಕ ನೀರು ಪೂರೈಸುತ್ತಿರುವ ಸನ್ನಿವೇಶವೂ ಕಂಡು ಬಂದಿದೆ. ಇದರೊಂದಿಗೆ ಜಿಲ್ಲಾಡಳಿತದಿಂದಲೂ ಕಾನೂನು ಕ್ರಮದ ಎಚ್ಚರಿಕೆಯನ್ನು ನೀಡಲಾಗಿದೆ. ಕಾವೇರಿ ನದಿ ಮೂಲಗಳಲ್ಲಿ ಪಂಪ್‍ಸೆಟ್ ಅಳವಡಿಸಿ ತೋಟಗಳಿಗೆ ನೀರು ಹಾಯಿಸುವದಾಗಲಿ ಅಥವಾ ಇನ್ನಿತರ ಕೆಲಸಗಳಿಗೆ ಕಾವೇರಿ ನದಿಗೆ ಪಂಪ್‍ಸೆಟ್ ಅಳವಡಿಸುವದನ್ನು ನಿಷೇಧಿಸುವದರೊಂದಿಗೆ ಸೆಕ್ಷನ್ 144ನ್ನು ಕೂಡ ಜಾರಿಗೊಳಿಸಿ ಜಿಲ್ಲಾಧಿಕಾರಿಗಳು ಆದೇಶ ಹೊರಡಿಸಿದ್ದಾರೆ.

ಪ್ರಸ್ತುತ ಜಿಲ್ಲೆಯಾದ್ಯಂತ ದೇವರ ಉತ್ಸವಗಳು ಜರುಗುತ್ತಿರುವದು ಒಂದೆಡೆಯಾದರೆ, ಮತ್ತೊಂದೆಡೆ ಲೋಕಸಭಾ ಚುನಾವಣೆಯ ಕಾವು ಹೆಚ್ಚಾಗುತ್ತಿದೆ. ಹಬ್ಬದ ಕಟ್ಟುಪಾಡುಗಳಿಗೆ, ಚುನಾವಣೆಯ ಭರಾಟೆಗೂ ಬಿಸಿಲಿನ ಬೇಗೆ ಪ್ರಯಾಸ ನೀಡುತ್ತಿವೆ. ಏರುತ್ತಿರುವ ಧಗೆ, ಕಂಡು ಬಾರದ ಮಳೆಯಿಂದಾಗಿ ಕಾಯುತ್ತಿರುವ ಇಳೆ - ಬೆಳೆಗಾಗಿ ವರುಣ ದೇವರನ್ನು ಜನತೆ ಪ್ರಾರ್ಥಿಸುತ್ತಿರುವದು ಕಂಡು ಬರುತ್ತಿದೆ. ಈಗಾಗಲೇ ಮಳೆಗಾಗಿ ಕೋರಿ ತಲಕಾವೇರಿ ಕ್ಷೇತ್ರ ಹಾಗೂ ಶ್ರೀ ಇಗ್ಗುತಪ್ಪ ದೇವರ ಸನ್ನಿಧಿಯಲ್ಲಿ ವಿಶೇಷ ಪೂಜೆ, ಪ್ರಾರ್ಥನೆಗಳು ಕೂಡ ನಡೆದಿದ್ದು, ಭುವಿಯನ್ನು ತಂಪಾಗಿಸಲು ಪ್ರಸ್ತುತದ ಸನ್ನಿವೇಶದಲ್ಲಿ ಮಳೆಯಾಗ ಬೇಕಿರುವದು ಅತ್ಯಗತ್ಯವಾಗಿದೆ. ಹವಾಮಾನ ಇಲಾಖೆಯ ಮಾಹಿತಿಯನ್ನು ಜನತೆ ದಿನಂಪ್ರತಿ ಅವಲೋಕಿಸುತ್ತಿದ್ದು, ಮಳೆಗಾಗಿ ಆಶಾಭಾವನೆಯಿಂದ ಕಾಯುತ್ತಿದ್ದಾರೆ.

- ಶಶಿ