ಚೆಟ್ಟಳ್ಳಿ, ಮಾ. 27: ಈರಳೆ ಗ್ರಾಮದ ಪೊವ್ವೋದಿ (ಭಗವತಿ) ಉತ್ಸವ ಶ್ರದ್ಧಾಭಕ್ತಿಯಿಂದ ನೆರವೇರಿತು. ದೇವಾಲಯದ ಸಂಪ್ರದಾಯದಂತೆ ಊರವರೆಲ್ಲ ಸೇರಿ ದೇವತಕ್ಕ ಹಾಗೂ ಭಂಡಾರ ತಕ್ಕ ಪೊರಿಮಂಡ ನಾಣಯ್ಯ ಅವರ ಮನೆಯಿಂದ ದುಡಿಕೊಟ್ಟ್ ಹಾಡಿನೊಂದಿಗೆ ದೇವರ ಭಂಡಾರ, ಎತ್ತ್ ಪೋರಾಟದೊಂದಿಗೆ ದೇವಾಲಯಕ್ಕೆ ಬರಲಾಯಿತು. ನಂತರ ಪರೆಯ ಹೊಡೆತಕ್ಕೆ - ದುಡಿಕೊಟ್ಟ್ ಹಾಡಿಗೆ ಊರಿನವರು ಸರದಿ ಸಾಲಿನಲ್ಲಿ ಬೊಳಕಾಟ್ ಹಾಗೂ ಚೌರಿ ಆಟ್ ನೃತ್ಯ ಮಾಡಿ ದೇವರನ್ನು ಕೊಂಡಾಡಿದರು. ದೇವರಿಗೆ ವಿಶೇಷ ಪೂಜೆ ಸಲ್ಲಿಸಿದ ನಂತರ ಭಂಡಾರವನ್ನು ಅರ್ಪಿಸಿ ದೇವರ ಪ್ರಸಾದವನ್ನು ಸ್ವೀಕರಿಸಿದರು.