ಮಡಿಕೇರಿ, ಸೆ. 10: 60 ವರ್ಷಗಳನ್ನು ಯಶಸ್ವಿಯಾಗಿ ಪೂರೈಸಿರುವ ಭಾರತೀಯ ಜೀವ ವಿಮಾ ನಿಗಮದ ವಜ್ರ ಮಹೋತ್ಸವದ ಅಂಗವಾಗಿ ಮಡಿಕೇರಿ ಶಾಖಾ ಕಚೇರಿಯಲ್ಲಿ ವಿಮಾ ಸಪ್ತಾಹದ ಕಾರ್ಯಕ್ರಮಗಳಿಗೆ ಚಾಲನೆ ನೀಡಲಾಯಿತು.ಶಾಖೆಗೆ ಭೇಟಿ ನೀಡಿದ ಮೊದಲ ಪಾಲಿಸಿದಾರರಾದ ಬಿ.ಟಿ. ಸರೋಜ ಅವರು ಕಾರ್ಯಕ್ರಮವನ್ನು ಉದ್ಘಾಟಿಸಿದರು. ಈ ಸಂದರ್ಭ ಮಾತನಾಡಿದ ಶಾಖಾಧಿಕಾರಿ ಎಂ.ಎಸ್. ಜೀವನ್ ಕುಮಾರ್, ಕಳೆದ 60 ವರ್ಷಗಳಿಂದ ಭಾರತೀಯ ಜೀವ ವಿಮಾ ನಿಗಮ ಬೆಳೆದು ಬಂದ ರೀತಿ ಹಾಗೂ ಗ್ರಾಹಕರಿಗೆ ಒದಗಿಸುತ್ತಿರುವ ಸೇವೆಯ ಬಗ್ಗೆ ಮಾಹಿತಿ ನೀಡಿದರು. ರಾಷ್ಟ್ರದ ಅಭಿವೃದ್ಧಿಯಲ್ಲೂ ಮಹತ್ತರ ಪಾತ್ರವನ್ನು ವಹಿಸಿರುವ ಜೀವ ವಿಮಾ ನಿಗಮ ದೇಶದ ಸಾಮಾಜಿಕ ಮತ್ತು ಆರ್ಥಿಕ ಭದ್ರತೆಗೆ ನೆರವು ನೀಡುತ್ತಿದೆ ಎಂದು ತಿಳಿಸಿದರು.

ನಿಗಮವು ದೇಶದಾದ್ಯಂತ 2,048 ಶಾಖೆಗಳನ್ನು ಹಾಗೂ 1,404 ಉಪ ಶಾಖಾ ಕಚೇರಿಗಳನ್ನು ಹೊಂದಿ, ಸುಮಾರು 10 ಹೊರ ರಾಷ್ಟ್ರಗಳಲ್ಲಿ ತನ್ನ ಕಾರ್ಯ ವ್ಯಾಪ್ತಿಯನ್ನು ವಿಸ್ತರಿಸಿಕೊಂಡಿದೆ. 29 ಕೋಟಿಗಿಂತಲೂ ಹೆಚ್ಚು ಪಾಲಿಸಿ ಗಳನ್ನು ಮಾರಾಟ ಮಾಡಿ, ಕಳೆದ ಸಾಲಿನಲ್ಲಿ 99.75 ರಷ್ಟು ಕ್ಲೇಮ್‍ನ್ನು ಪಾವತಿ ಮಾಡಲಾಗಿದೆ ಎಂದು ಮಾಹಿತಿ ನೀಡಿದರು. ಕಾರ್ಯಕ್ರಮ ವನ್ನು ಅಭಿವೃದ್ಧಿ ಅಧಿಕಾರಿ ಎಂ. ಬಸವರಾಜು ನಿರೂಪಿಸಿದರು.

ಪಾಲಿಸಿದಾರರು, ಪ್ರತಿನಿಧಿಗಳು ಹಾಗೂ ಕಚೇರಿ ಸಿಬ್ಬಂದಿಗಳು ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು.