ಶ್ರೀಮಂಗಲ, ಸೆ. 1: ಅರಣ್ಯದಿಂದ ಕಾಡಾನೆಗಳು ಗ್ರ್ರಾಮದೊಳಕ್ಕೆ ನುಗ್ಗಿ ಬೆಳೆಗಾರರ ಬೆಳೆಗಳನ್ನು ನಷ್ಟಪಡಿಸುವದನ್ನು ತಪ್ಪಿಸಲು ಶಾಶ್ವತ ಯೋಜನೆ ರೂಪಿಸಲು ಅರಣ್ಯದಂಚಿನಲ್ಲಿ ವಾಹನ ಸಂಚರಿಸುವ ಯೋಗ್ಯ ರಸ್ತೆ ನಿರ್ಮಿಸಲು ಆದ್ಯತೆ ನೀಡಬೇಕು. ಇದರಿಂದ ಅರಣ್ಯದಂಚಿನಲ್ಲಿ ರೈಲ್ವೆ ಹಳಿಯ ಬೇಲಿ, ಕಂದಕ ನಿರ್ಮಾಣ, ತಡೆಗೋಡೆ ಇತ್ಯಾದಿ ಯೋಜನೆ ರೂಪಿಸಲು, ಸಾಮಗ್ರಿ ಇಳಿಸಲು ಅನುಕೂಲವಾಗಲಿದೆ. ಆದ್ದರಿಂದ ಅರಣ್ಯದಂಚಿನಲ್ಲಿ ಸೂಕ್ತ ರಸ್ತೆ ನಿರ್ಮಿಸಲು ಆದ್ಯತೆ ನೀಡಬೇಕೆಂದು ಶ್ರೀಮಂಗಲದಲ್ಲಿ ನಡೆದ ಅರಣ್ಯ ಇಲಾಖೆಯೊಂದಿಗೆ ಜನ ಸಂಪರ್ಕ ಸಭೆಯಲ್ಲಿ ವಿವಿಧ ಸಂಘಟನೆಯ ಪ್ರಮುಖರು ಅರಣ್ಯಾಧಿಕಾರಿಗಳನ್ನು ಆಗ್ರಹಿಸಿದರು.

ಶ್ರೀಮಂಗಲ ಗ್ರಾ.ಪಂ. ಅಧ್ಯಕ್ಷೆ ಅಜ್ಜಮಾಡ ಮುತ್ತಮ್ಮ ಅವರ ಅಧ್ಯಕ್ಷತೆಯಲ್ಲಿ ನಡೆದ ಜನ ಸಂಪರ್ಕ ಸಭೆಯಲ್ಲಿ ವನ್ಯ ಜೀವಿ ವಿಭಾಗದ ಬಿ.ಸಿ.ಎಫ್ ಜಯ ಅವರು ಬಾರದೆ ಇರುವದಕ್ಕೆ ಸಭೆಯಲ್ಲಿ ಆಕ್ರೋಶ ವ್ಯಕ್ತವಾಯಿತು. ಈ ಸಂದರ್ಭ ಎ.ಸಿ.ಎಫ್ ಸೀಮಾ ಅವರು ಮಾತನಾಡಿ, ಡಿ.ಸಿ.ಎಫ್. ಅರಣ್ಯ ಇಲಾಖೆಯ ತುರ್ತು ಸಭೆಗಾಗಿ ಬಂಡಿಪುರಕ್ಕೆ ತೆರಳಿದ್ದು ಈ ಕಾರಣದಿಂದ ಬರಲು ಸಾಧ್ಯವಾಗುವದಿಲ್ಲ. ಸಭೆಯಲ್ಲಿ ತೆಗೆದುಕೊಂಡ ತೀರ್ಮಾನ ಹಾಗೂ ಬೆಳೆಗಾರರ ಅಹವಾಲುಗಳನ್ನು ಡಿ.ಸಿ.ಎಫ್ ಅವರಿಗೆ ವರದಿ ಸಲ್ಲಿಸಲಾಗುವದು, ಸದ್ಯದಲ್ಲಿಯೇ ಡಿ.ಸಿ.ಎಫ್ ಅವರ ನೇತೃತ್ವದಲ್ಲಿ ಮತ್ತೆ ಜನ ಸಂಪರ್ಕ ಸಭೆ ಕರೆಯುವ ಭರವಸೆ ನೀಡಿದರು.

ಜಿಲ್ಲಾ ಬೆಳೆಗಾರ ಒಕ್ಕೂಟದ ಅಧ್ಯಕ್ಷ ಅಜ್ಜಮಾಡ ಶಂಕರು ನಾಚಪ್ಪ ಮಾತನಾಡಿ, ಅರಣ್ಯದೊಳಗೆ ಮೇವು ಬೆಳೆಸಿ ವನ್ಯಪ್ರಾಣಿಗಳು ಆಹಾರ ಅರಸಿ ಗ್ರ್ರಾಮಗಳಿಗೆ ನುಗ್ಗದಂತೆ ತಡೆಗಟ್ಟಿ. ಅರಣ್ಯದೊಳಗೆ ತೇಗ ಮರದ ಪ್ಲಾಂಟೇಷನ್‍ಗಳನ್ನು ತೆಗೆದು ಹಾಕಿ. ಹಸಿ ಹುಲ್ಲು, ಜೋಳ ಇತ್ಯಾದಿ ಬೆಳೆಗಳನ್ನು ಬೆಳೆಸಿ. ಅರಣ್ಯದಂಚಿನಲ್ಲಿ ವನ್ಯಪ್ರಾಣಿಗಳು ಗ್ರ್ರಾಮಗಳಿಗೆ ನುಸುಳದಂತೆ ವೈಜ್ಞಾನಿಕ ಹಾಗೂ ಗುಣಮಟ್ಟದ ಯೋಜನೆ ರೂಪಿಸಿ ಎಂದು ಆಗ್ರಹಿಸಿದರು.

ಜಿಲ್ಲಾ ಸಾರ್ವಜನಿಕ ಹಿತ ರಕ್ಷಣಾ ಸಮಿತಿ ಅಧ್ಯಕ್ಷ ಅಜ್ಜಮಾಡ ಕಟ್ಟಿ ಮಂದಯ್ಯ ಮಾತನಾಡಿ, ವನ್ಯ ಪ್ರಾಣಿಗಳಿಂದ ಬೆಳೆ ನಷ್ಟ, ಜಾನುವಾರು ನಷ್ಟವಾದಾಗ ಕೃಷಿ ಇಲಾಖೆ, ತೋಟಗಾರಿಕಾ ಇಲಾಖೆ ಹಾಗೂ ಪಶು ವೈದ್ಯಾಧಿಕಾರಿಗಳು ನಷ್ಟದ ಪ್ರಮಾಣ ನಮೂದಿಸುವಷ್ಟು ಪರಿಹಾರ ನೀಡಬೇಕು ಎಂದು ಒತ್ತಾಯಿಸಿದರು.

ರೈತ ಸಂಘದ ಜಿಲ್ಲಾ ಸಂಚಾಲಕ ಚಿಮ್ಮಂಗಡ ಗಣೇಶ್ ಮಾತನಾಡಿ, ಅರಣ್ಯದಂಚಿನಲ್ಲಿ ಸೂಕ್ತ ರಸ್ತೆಗಳಿಲ್ಲ. ಇದರಿಂದ ಈಗಿರುವ ಕಂದಕ, ಸೋಲಾರ್ ಬೇಲಿಗಳು ನಿರ್ವಹಣೆ ಇಲ್ಲದೆ ಹಾಳಾಗಿವೆ. ಆದ್ದರಿಂದ ಅರಣ್ಯದಂಚಿನ ಉದ್ದಕ್ಕೂ ವಾಹನ ಸಂಚರಿಸಲು ಯೋಗ್ಯವಾದ ರಸ್ತೆ ನಿರ್ಮಿಸಿ. ಶ್ರೀಮಂಗಲ ವಲಯ ಅರಣ್ಯಾಧಿಕಾರಿಗಳ ಹುದ್ದೆಗೆ ಖಾಯಂ ಅಧಿಕಾರಿಗಳನ್ನು ನೇಮಿಸಿ ಎಂದು ಒತ್ತಾಯಿಸಿದರು.

ಶ್ರೀಮಂಗಲ ವಲಯ ಕಾಂಗ್ರೆಸ್ ಅಧ್ಯಕ್ಷ ಕುಂಞಂಗಡ ಬೋಸ್ ಮಾದಪ್ಪ ಮಾತನಾಡಿ ಅರಣ್ಯದೊಳಗೆ ಸಂಚರಿಸಿ ಅರಣ್ಯ ರಕ್ಷಿಸುತ್ತಿರುವ ಅರಣ್ಯ ಸಿಬ್ಬಂದಿಗಳಿಗೆ ಹಲವು ತಿಂಗಳಿನಿಂದ ವೇತನ ಬಿಡುಗಡೆ ಆಗಿಲ್ಲ. ಗುಡ್ಡಗಾಡು ಅರಣ್ಯದಲ್ಲಿ ಹಾಗೂ ಅತಿ ಹೆಚ್ಚು ಮಳೆ ಬೀಳುವ ಪ್ರದೇಶವಾದ ಈ ವ್ಯಾಪ್ತ್ತಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಸಿಬ್ಬಂದಿಗಳಿಗೆ ಸೂಕ್ತ ಸೌಲಭ್ಯ ದೊರೆಯುತ್ತಿಲ್ಲ. ಇರ್ಪು ಜಲಾಶಯ ವೀಕ್ಷಣೆಗೆ ಆಗಮಿಸುವ ಪ್ರವಾಸಿಗರಿಂದ ಸಂಗ್ರಹಿಸಿದ ಪ್ರವೇಶ ಶುಲ್ಕದಲ್ಲಿ ಸಿಬ್ಬಂದಿಗಳ ವೇತನ ಪಾವತಿಸುವಂತೆ ಅರಣ್ಯಾಧಿಕಾರಿಗಳನ್ನು ಆಗ್ರಹಿಸಿದರು.

ಅಧ್ಯಕ್ಷತೆ ವಹಿಸಿ ಮಾತನಾಡಿದ ಗ್ರಾ.ಪಂ. ಅಧ್ಯಕ್ಷೆ ಅಜ್ಜಮಾಡ ಮುತ್ತಮ್ಮ ಅವರು, ಶಾಶ್ವತ ಯೋಜನೆ ರೂಪಿಸಲು ಬಹಳಷ್ಟು ಸಮಯ ಹಿಡಿಯಬಹುದು. ಆದರೆ ಕಾಡಾನೆ, ಕಾಡು ಕೋಣಗಳ ಹಾವಳಿಯಿಂದ ಬೆಳೆಗಳನ್ನು ಕಾಪಾಡಿಕೊಳ್ಳುವದೇ ದೊಡ್ಡ ಸಾಹಸವಾಗಿದೆ. ಈ ನಿಟ್ಟಿನಲ್ಲಿ ಬೆಳೆ ಹಾನಿ ತಡೆಗಟ್ಟಲು ಹೆಚ್ಚುವರಿ ಸಿಬ್ಬಂದಿಗಳನ್ನು ನೇಮಿಸಿ ಅಗತ್ಯ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದರು. ಈ ಸಂದರ್ಭ ಮಾತನಾಡಿದ ಎ.ಸಿ.ಎಫ್ ಸೀಮಾ ಅವರು ಬ್ರಹ್ಮಗಿರಿ ಅಭಯಾರಣ್ಯದ 67 ಕಿ.ಮೀ ಅಂಚಿನಲ್ಲಿ ಕಾಡಾನೆ ಹಾವಳಿ ತಡೆಗಟ್ಟಲು 1 ಕೋಟಿ ರೂ. ಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಆದರೆ ಈ ವ್ಯಾಪ್ತಿಯಲ್ಲಿ ಸೂಕ್ತ ರಸ್ತೆಯಿಲ್ಲದಿರುವದರಿಂದ ರೈಲ್ವೆ ಕಂಬಿ ಸೇರಿದಂತೆ ತಡೆಗೋಡೆ ಇತ್ಯಾದಿ ಯೋಜನೆ ರೂಪಿಸಲು ಕರೆದಿರುವ ಟೆಂಡರ್‍ಗಳಿಗೆ ಗುತ್ತಿಗೆದಾರರು ಬರುತ್ತಿಲ್ಲ ಎಂದು ಹೇಳಿದರು.

ಶ್ರೀಮಂಗಲ ವಲಯ ಅರಣ್ಯಾಧಿಕಾರಿ (ಉಸ್ತುವಾರಿ) ಪೌಲ್ ಆಂಟೋನಿ ಮಾತನಾಡಿ, ಅರಣ್ಯದಂಚಿನಲ್ಲಿ ರಸ್ತೆ ನಿರ್ಮಾಣಕ್ಕೆ ಮೊದಲು ಆದ್ಯತೆ ನೀಡಲು ಕ್ರಮ ಕೈಗೊಳ್ಳಲಾಗುವದು. ತದನಂತರ ಹಂತಹಂತವಾಗಿ ವನ್ಯಪ್ರಾಣಿಗಳ ನುಸುಳುವಿಕೆ ತಡೆಗಟ್ಟಲು ಯೋಜನೆ ರೂಪಿಸಲು ಕ್ರಮ ಕೈಗೊಳ್ಳಲಾಗುವದು ಎಂದು ಹೇಳಿದರು.

ಸಭೆಯಲ್ಲಿ ಶ್ರೀಮಂಗಲ ಗ್ರಾ.ಪಂ. ಮಾಜಿ ಅಧ್ಯಕ್ಷ ಅಜ್ಜಮಾಡ ಲವ ಕುಶಾಲಪ್ಪ, ಸಹಕಾರ ಸಂಘದ ಅಧ್ಯಕ್ಷ ಎ.ಎಸ್. ಕರುಂಬಯ್ಯ, ಗ್ರಾ.ಪಂ. ಸದಸ್ಯರುಗಳಾದ ಅಜ್ಜಮಾಡ ಜಯ, ಚೋನೀರ ಕಾಳಯ್ಯ, ಶ್ರೀಮಂಗಲ ಬೆಳೆಗಾರ ಒಕ್ಕೂಟದ ಅಧ್ಯಕ್ಷ ಕಾಳಿಮಾಡ ತಮ್ಮು ಮುತ್ತಣ್ಣ ಮತ್ತಿತರರು ಹಾಜರಿದ್ದರು.