ಮಡಿಕೇರಿ, ಮಾ. 31 : ಕೊರೊನಾ ಎಂಬ ಮೂರಕ್ಷರದ ವೈರಸ್ ಜಗತ್ತನ್ನೇ ನಡುಗಿಸುತ್ತಿದೆ. ಇಂದು ಮೂರಕ್ಷರ ಜಗತ್ತನ್ನೇ ಅಲ್ಲಾಡಿಸುತ್ತಿದೆ. ಪ್ರಪಂಚಕ್ಕೆ ದೊಡ್ಡಣ್ಣ ಎಂಬ ಖ್ಯಾತಿ ಪಡೆದಿರುವ ಅಮೇರಿಕಾ ದೇಶಕ್ಕೆ ಪಾಠ. ಏನು ಮಾಡಲೂ ಆಗುತ್ತಿಲ್ಲ. ಇದೀಗ ಬ್ರಿಟನ್ ಪ್ರಧಾನಿ ಬೋರಿಸ್ ಜಾನ್ಸನ್ ಅವರೂ ಕೊರೊನಾ ವೈರಸ್‍ಗೆ ಸಿಲುಕಿ ನಲುಗುತ್ತಿದ್ದಾರೆ. ಒಂದು ದೇಶದ ಪ್ರಧಾನಿಯೇ ಈ ಖಾಯಿಲೆಗೆ ತುತ್ತಾದರೆ ನಮ್ಮಂತ ಜನಸಾಮಾನ್ಯರ ಪರಿಸ್ಥಿತಿ ಯೋಚನೆ ಮಾಡುವಂತದ್ದೆ. ನಮ್ಮ ದೇಶದ ಪ್ರಧಾನಿ ದೇಶದ ಪ್ರತಿ ರಾಜ್ಯಗಳ ಮೇಲೆ ನಿಗಾವಿಟ್ಟು ಈ ವೈರಸ್‍ನಿಂದ ಪಾರಾಗಿ ದೇಶದ ಜನತೆಯನ್ನು ಪಾರುಮಾಡಲು ಪಣತೊಟ್ಟು ನಿಂತಿದ್ದಾರೆ. ಅದಕ್ಕಾಗಿ ಭಾರತೀಯರಾದ ನಮ್ಮೆಲ್ಲರ ಸಹಕಾರ ಅತ್ಯಗತ್ಯವಾಗಿದೆ.

ಮೂರು ತಾಲೂಕುಗಳನ್ನು ಹೊಂದಿರುವ ನಮ್ಮ ಪುಟ್ಟ ಜಿಲ್ಲೆ ಕೊಡಗು. ಇದೀಗ ಸಂಪೂರ್ಣ ಬಂದ್‍ಗೆ ಒಳಪಟ್ಟಿದೆ. ಅಗತ್ಯ ವಸ್ತುಗಳ ಖರೀದಿಗೆ ಸಮಯ ನಿಗದಿಪಡಿಸಿದ ಸಮಯದಲ್ಲಿ ಪಡೆದು ಮುಂದಿನ ಲಾಕ್‍ಔಟ್ ಸಮಯ ಅಂದರೆ ಏಪ್ರಿಲ್ 14 ನಂತರ ಮತ್ತೆ ಲಾಕ್‍ಔಟ್ ಆಗಿ ಜನಜೀವನ ಅಸ್ತವ್ಯಸ್ಥ ಆಗುವುದಕ್ಕಿಂತ ಎಚ್ಚೆತ್ತು ಈ ಮಾರಕ ಖಾಯಿಲೆಯಿಂದ ಪಾರಾಗೋಣ. ಕರ್ನಾಟಕದಲ್ಲಿ ದಿನವೂ ಕೊರೊನಾ ಕೇಸ್ ಹೆಚ್ಚಾಗುತ್ತಿದೆ. ಅಲ್ಲದೆ, ಕೊಡಗಿನಲ್ಲಿ ಈಗಾಗಲೇ ಕಾಲಿರಿಸಿದೆ. ಇಡೀ ದೇಶದಲ್ಲಿಯೇ ಇತಿಹಾಸದ ಮೊದಲ ಬಾರಿಗೆ 21 ದಿನಗಳ ಕಫ್ರ್ಯೂವನ್ನು ನಮ್ಮ ದೇಶದ ಪ್ರಧಾನಿ ಹಾಕಿದ್ದಾರೆ. ಇದಕ್ಕೆ ಯಾವ ವಿರೋಧ ಪಕ್ಷಗಳು ವಿರೋಧ ವ್ಯಕ್ತಪಡಿಸುತ್ತಿಲ್ಲ. ಏಕೆಂದರೆ ಪರಿಸ್ಥಿತಿಯ ಗಂಭೀರತೆ ಆ ರೀತಿ ಇದೆ. ಅಲ್ಲದೆ ಇತ್ತೀಚೆಗೆ ಪ್ರಧಾನಿಯವರು ಮಾತನಾಡಿ, ಕೊರೊನಾ ಭಯಬಿಡಿ ಹಸಿದಿರಬೇಡಿ ಎಂದು ರೂ. 1.7 ಲಕ್ಷ ಕೋಟಿಯ ವಿಶೇಷ ಪ್ಯಾಕೇಜ್ ಘೋಷಿಸಿದ್ದಾರೆ. ಇಂದು ನಮ್ಮ ಪುಟ್ಟ ಜಿಲ್ಲೆಯನ್ನು ಜಿಲ್ಲೆಯ ಎಲ್ಲ ಗಡಿಭಾಗ ವನ್ನು ಬಂದ್ ಮಾಡಿ ಕಾಯಲಾಗು ತ್ತಿದೆ. ಜಿಲ್ಲೆಯ ಗಡಿಗೇಟ್‍ಗಳಾದ ಕುಶಾಲನಗರದ ಕೊಪ್ಪಗೇಟ್, ಕೇರಳದ ಗಡಿ ಮಾಕುಟ್ಟಗೇಟ್, ದಕ್ಷಿಣ ಕನ್ನಡ ಭಾಗದ ಸಂಪಾಜೆ ಗೇಟ್, ಮತ್ತೊಂದು ಭಾಗದ ಕೇರಳ ಗಡಿ ಕರಿಕೆಯ ಚಂಬೆರಿಗೇಟ್ ಎಲ್ಲವನ್ನು ಬಂದ್ ಮಾಡಿ ಕೊಡಗು ಜಿಲ್ಲಾಡಳಿತ ಜನಪ್ರತಿನಿಧಿಗಳ ಸಹಕಾರದಿಂದ ಸೂಕ್ತ ಬಂದೋಬಸ್ತ್ ವ್ಯವಸ್ಥೆ ಮಾಡಿದೆ. ಮುಖ್ಯವಾಗಿ ಇಂದು ಜನತೆ ಪಕ್ಷಾತೀತ, ಜಾತ್ಯತೀತವಾಗಿ ಎಲ್ಲರು ಒಂದಾಗಿ ಈ ಮಹಾಮಾರಿಯನ್ನು ತೊಲಗಿಸುವ ಕಾರ್ಯಕ್ಕೆ ಕೈಜೋಡಿಸಬೇಕಾಗಿದೆ. ಏನೇ ಆಗಲಿ ಈ ಜಗತ್ತು ಕೊರೊನಾದಿಂದ ಪಾರಾಗಲಿ ಎಂದು ಪ್ರಾರ್ಥಿಸೋಣ.

- ಗಣೇಶ್ ಕುಡೆಕ್ಕಲ್, ಗುಡ್ಡೆಹೊಸೂರು.