ಶ್ರೀಮಂಗಲ, ಮಾ. 27: ದಕ್ಷಿಣ ಕೊಡಗಿನ ಬಿರುನಾಣಿ ಗ್ರಾಮದಲ್ಲಿನ ಶ್ರೀ ಪುತ್ತ್ ಭಗವತಿ ದೇವಸ್ಥಾನದ ವಾರ್ಷಿಕ ಉತ್ಸವದ ಅಂಗವಾಗಿ ನಡೆಯುವ ವಿಶಿಷ್ಟವಾದ ಪೊಮ್ಮಂಗಲ (ಎಡಮೆ ಮಂಗಲ) ಹರಕೆ ಸಲ್ಲಿಸುವ ಆಚರಣೆ ಸಾಂಪ್ರದಾಯಿಕ ಪದ್ಧತಿಯಂತೆ ನಡೆಯಿತು.ತಮ್ಮ ಮನೆಗಳಲ್ಲಿ ಸಾಂಪ್ರದಾಯಿಕ ಪದ್ಧತಿಯಂತೆ ಬೆಳಿಗ್ಗೆಯಿಂದಲೇ ಹರಕೆ ಸಲ್ಲಿಸುವವರು ತಳಿರು ತೋರಣ ಕಟ್ಟಿ ಮದುವೆ ಮನೆಯ ಸಂಭ್ರಮದಲ್ಲಿ ಆಚರಣೆ ಮಾಡಿದರು. ಮಧ್ಯಾಹ್ನದ ನಂತರ ಪುತ್ತ್ ಭಗವತಿ ದೇವಸ್ಥಾನಕ್ಕೆ ಆಗಮಿಸಿ ದುಡಿಕೊಟ್ಟ್ ಪಾಟ್‍ನೊಂದಿಗೆ ದೇವಸ್ಥಾನಕ್ಕೆ ಪ್ರದಕ್ಷಿಣೆ ಹಾಕಿ ಹರಕೆ ಸಲ್ಲಿಸಿದರು. ಈ ಬಾರಿ 18 ಭಕ್ತಾಧಿಗಳು ಪೊಮ್ಮಂಗಲದ ಹರಕೆ ಸಲ್ಲಿಸಿದ್ದು ವಿಶೇಷವಾಗಿದೆ. ಪೊಮ್ಮಂಗಲದ ವಿಶೇಷತೆ ಹಾಗೂ ಹಿನ್ನೆಲೆಯ ವಿವರ : ಪಾಕೇರಿನಾಡು ಬಿರುನಾಣಿಯ ಶ್ರೀ ಪುತ್ತ್ ಭಗವತಿ ದೇವಸ್ಥಾನದ ವಾರ್ಷಿಕ ಉತ್ಸವದಲ್ಲಿ ಕೊಡವ ಮದುವೆ ಪದ್ಧತಿಯಲ್ಲಿ ವಧು-ವರರು ಧರಿಸುವ ಉಡುಗೆಯನ್ನು ಪರಸ್ಪರ ಅದಲು ಬದಲಾಗಿ ಧರಿಸಿ ಹರಕೆ ತೀರಿಸುವದು ವಿಶೇಷವಾಗಿದೆ. ಅಂದರೆ ಗಂಡು ಮಕ್ಕಳಿಗೆ ಸ್ತ್ರೀಯರಂತೆ ಸೀರೆ-ರವಿಕೆ ಉಡುಗೆ ಹಾಗೂ ಹೆಣ್ಣು ಮಕ್ಕಳಿಗೆ ಪುರುಷರಂತೆ ಬಿಳಿ (ಕುಪ್ಯಚೇಲೆ)
(ಮೊದಲ ಪುಟದಿಂದ) ಕುಪ್ಪಸದ ಉಡುಪನ್ನು ಧರಿಸಿ ಅವರವರ ಮನೆಯಲ್ಲಿ ಕೊಡವ ಮದುವೆ ಸಂದರ್ಭ ಮಾಡುವ ಎಲ್ಲಾ ಸಾಂಪ್ರದಾಯಿಕ ಪದ್ಧತಿಯ ವಿಧಿ-ವಿಧಾನಗಳನ್ನು ಮಾಡಲಾಗುತ್ತದೆ.
ಸಾಂಪ್ರದಾಯಿಕ ಮೂರು ಕಾಲಿನ ಮುಕ್ಕಲಿ (ಮೂರು ಕಾಲಿನ ಸಣ್ಣ ಸ್ಟೂಲು)ನಲ್ಲಿ ಕೂರಿಸಿ ಮದುವೆಯಲ್ಲಿ ಜನರು ಆಶೀರ್ವಾದಿಸುವಂತೆ ‘ಪೊಮ್ಮಂಗಲ’ದಲ್ಲಿ ನಡೆಯುತ್ತದೆ. ಉಡುಪು ಧರಿಸಿದವರು ಹಿರಿಯರ ಕಾಲು ಹಿಡಿದು ಆಶೀರ್ವಾದ ಪಡೆದುಕೊಳ್ಳುತ್ತಾರೆ. ಮನೆಯಲ್ಲಿನ ಸಂಪ್ರದಾಯ ನಂತರ ದೇವಸ್ಥಾನಕ್ಕೆ ಬಂದು 3 ಸುತ್ತು ಪ್ರದಕ್ಷಿಣೆ ಹಾಕಿ ಹರಕೆ ತೀರಿಸುತ್ತಾರೆ. ಇದೊಂದು ನಂಬಿದ ದೇವರಿಗೆ ಹರಕೆಯಾಗಿದ್ದು ಮಕ್ಕಳಿಗೆ ಅನಾರೋಗ್ಯ ಕಾಣಿಸಿಕೊಂಡ ಸಂದರ್ಭ ವಾಸಿಯಾಗಲು, ಮದುವೆಯಾಗಿ ಮಕ್ಕಳಾಗದವರಿಗೆ ಮಕ್ಕಳಾಗುವಂತೆ ಕೋರಿಕೆ ಸಲ್ಲಿಸಿ ಅದಕ್ಕಾಗಿ ಹರಕೆ ಕಟ್ಟಿಕೊಳ್ಳುತ್ತಾರೆ. ಮಕ್ಕಳ ಆರೋಗ್ಯ ವಾಸಿಯಾದ ನಂತರ ಆ ಮಕ್ಕಳನ್ನು ತಂದೆ-ತಾಯಿ ಪೊಮ್ಮಂಗಲ ಮಾಡಿಸುತ್ತಾರೆ.
ಹಾಗೆಯೇ ಮದುವೆಯಾಗಿ ಮಕ್ಕಳಾಗದವರು ಮಕ್ಕಳಾಗುವಂತೆ ಹರಕೆ ಮಾಡಿಕೊಂಡು ಹುಟ್ಟುವ ಮಗುವನ್ನು ಇಲ್ಲಿ ಪೊಮ್ಮಂಗಲ ಮಾಡಿಸುತ್ತಾರೆ. ಮಕ್ಕಳಿಗೆ ತಾಯಿ-ತಂದೆ ಪೊಮ್ಮಂಗಲದ ಹರಕೆ ಮಾಡಿಕೊಂಡು ತೀರಿಸದಿದ್ದರೆ ಅಂತ ಮಕ್ಕಳಿಗೆ ಕಂಕಣಭಾಗ್ಯ ಒದಗಿ ಬರುವದಿಲ್ಲವೆಂಬ ನಂಬಿಕೆಯೂ ಇದೆ. ಆದ್ದರಿಂದ ಮಕ್ಕಳು ಪ್ರೌಢಾವಸ್ಥೆಗೆ ಬರುವ ಮೊದಲು ಅಂದರೆ ವಿಶೇಷವಾಗಿ ಹೆಣ್ಣು ಮಕ್ಕಳನ್ನು ಪ್ರೌಢಾವಸ್ಥೆಗೆ ಮೊದಲೇ ಈ ಹರಕೆ ತೀರಿಸಬೇಕು. ಗಂಡು ಮಕ್ಕಳು ತಡವಾಗಬಾರದು.
ಈ ಸಂದರ್ಭ ಕೊಡವ ಜಾನಪದ ಬಾಳೋಪಾಟ್‍ನೊಂದಿಗೆ ಕಳಶ ಹೊತ್ತು ಭಗವತಿ ದೇವಿಗೆ ಹರಕೆ ಒಪ್ಪಿಸುವ ಪದ್ಧತಿ ಪುರಾತನ ಕಾಲದಿಂದಲೂ ಸ್ಥಳೀಯ ಜನರ, ಭಕ್ತಾಧಿಗಳ ನಂಬಿಕೆಯಲ್ಲಿ ನಡೆದುಕೊಂಡು ಬಂದಿದೆ. ಪುತ್ತ್ ಭಗವತಿ ದೇವಸ್ಥಾನದ ವಾರ್ಷಿಕ ಉತ್ಸವದ ಅಂಗವಾಗಿ ತಾ. 28ರಂದು (ಇಂದು) ದೇವರ ಅವಭೃತ ಸ್ನಾನ, ವಿಶೇಷ ಪೂಜೆ ನಡೆಯಲಿದೆ. ಪೊಮ್ಮಂಗಲ ಸಂದರ್ಭ ದೇವಸ್ಥಾನದ ಆಡಳಿತ ಮಂಡಳಿಯ ಅಧ್ಯಕ್ಷ ಕಾಳಿಮಾಡ ಮುತ್ತಣ್ಣ, ಕಾರ್ಯದರ್ಶಿ ಕಳಕಂಡ ಜೀತು ಕುಶಾಲಪ್ಪ, ದೇವತಕ್ಕ ಅಣ್ಣಳಮಾಡ ಗಿರೀಶ್ ಹಾಗೂ ಆಡಳಿತ ಮಂಡಳಿಯ ಸದಸ್ಯರು ಮತ್ತು ಗ್ರಾಮಸ್ಥರು ಉಸ್ತುವಾರಿ ವಹಿಸಿದ್ದರು.
- ಹರೀಶ್